Tlauel miak xiuitl kinijilnamiktokej Jehová itlajtoltemakauaj pampa amo kikauaj ma kintlalilikaj estli. Inijuantij amo motlaliliaj pampa moyakanaj ika tlen kiijtoua Hechos 15:29, kampa kiijtoua amo kinamiki kitekiuisej estli. Mosentlalijtokej amo motlalilisej estli maske tepajtianij kiniljuiaj tlaj amo kikauaj ma kintlalilikaj uelis mikisej.

Kej panotia tonali, tlauel miakej tepajtianij kiijtouaj tlauel kuali tlaj amo kitekiuisej estli.

Nopa pilamochtsi Stanford Medicine Magazine, tlen kiski ipan primavera, 2013, katli kichiua nopa Escuela de Medicina de la Universidad de Stanford (Estados Unidos), kipia se tlamachtili tlen kamanalti tlen estli. Se tlen nopa tlamantli itoka “Against the Flow​—What’s Behind the Decline in Blood Transfusions?” (Amo kichiuaj kej miakej: ¿Kenke miakej ayokmo kitekiuiaj estli?). Nopa tepajtijketl Sarah C. P. Williams, katli tlajkuilok ipan nopa pilamochtsi, kiijtok: “Ipan matlaktli xiuitl tlen panotok, tikitstokej kenijkatsa ipan nochi Tlaltipaktli, tlauel miakej tepajtianij nochipa kitekiuiaj estli uan tlauel miak kintlaliliaj maseualmej maske amo kimonekiliaj, uan kintlaliliaj maske amo kintekij”.

Nopaya nojkia kiijtoua tlen kiijtok Patricia Ford, katli kipeualtik nopa Centro de Medicina y Cirugía sin Sangre ipan nopa Hospital tlen Pensilvania (Estados Unidos). Ya kiijtok: “Tlauel miakej tepajtianij nojua kineltokaj se akajya uelis mikis tlaj amo kipia miak estli ipan itlakayo, uan san uelis momanauis tlaj kitlalilisej estli. [...] Amo nochipa pano tlen moiljuiaj”. a

Sejse xiuitl, nopa tepajtijketl Ford kinpajtia se 700 Jehová itlajtoltemakauaj. Ya nojkia kiijtok: “Miakej tepajtianij katli ininuaya nimonojnotski moiljuiyayaj maseualmej mikiskiaj tlaj amo kintlaliliskiaj estli. Maske na nojkia kiampa nimoiljuiyaya, teipa nikitak san monekiyaya nijchiuas se keski tlamantli tlen amo ouij uan kiampa amo nikintlaliliskia estli”.

Ipan agosto, 2012, nopa pilamochtsi Archives of Internal Medicine kinextik tlake panok ika se estudio tlen uejkajki 28 xiuitl, tlen mochijki ipan se hospital kampa kintejkej se keskij maseualmej tlen ininyoltsi. Katli eliyayaj Jehová itlajtoltemakauaj nimantsi mochikajkej, uan katli kintlalilijkej estli achi uejkajkej. Nojkia amo tlauel ouijtijkej kema itstoyaj ipan hospital. Tepajtianij kiitakej tlauel kuali kiski tlen kichijkej kema kintejkej maske amo kintlalilijkej estli, uan kema panok 20 xiuitl, tlauel kuali itstoyaj sanse kej katli kintlalilijtoyaj estli.

Ipan abril 8, nopa pilamochtsi The Wall Street Journal, kiijtok: “Katli momachtijtokej ipan ininreligión amo kinamiki motlalilisej estli, tlauel kinpaleuijtok tlen kichiuaj tepajtianij katli amo kitekiuiaj estli (tlen sekinok temakatokej) kema kintekij [...]. Katli kitekiuiaj estli, moneki kikouasej, kinechikosej, kitlajtlachilijtosej uan kintlalilisej sekinok, uan nopa kichiua ma motekiui miak tomij. Yeka, tepajtianij katli amo kitekiuiaj, kiijtouaj kinpaleuia amo ma kitekiuikaj miak tomij. Uan nojkia kinpaleuia katli kinpajtiaj, pampa amo momauaj ika se kokolistli tlen eltok ipan sekinok inineso yon amo tlauel uejkauaj ipan hospital”.

Robert Lorenz, katli tlayakana ipan Clínica de Cleveland (Estados Unidos), kiijtok: “Kema tijtlaliliaj estli se akajya, maske timoiljuiaj tijpaleuiaj [...] nopa amo nelia, pampa teipa uelis kitlanauis”.