Biblia kiijtoua Jehová kinmakas miak tlamantli tlen kuali katli amo kikauaj (Salmo 84:11). ¿Tlake kiijtosneki amo tijkaua Jehová? Kiijtosneki tijchiua ipan monemilis tlen tijtenkauilik Jehová kema timotemaktilik (Eclesiastés 5:4, 5). ¿Tlake uelis tijchiuas uan kiampa amo tijkauas Jehová teipa kema timoatsonpoliuiltik?

Ipan ni tlamachtili tikitasej:

•  Nojua xikixnamiki tlaouijkayotl ika kuali

•  Amo xijchiua tlen amo kuali

•  Nojua xitlatekipano ika pakilistli

 Texto tlen mitspaleuis: “Moneki tipanotiasej miak [tlaouijkayotl] nikaj, uan teipa tikalakisej kampa toTeko tlanauatia” (Hechos 14:22).

 Tlen kiijtosneki: Nochi Cristo itokilijkauaj tikixnamikisej tlaouijkayotl. Uelis mitspinajtisej o mitstlatsakuiltisej pampa tijtekipanoua toTeotsij, uan nochi tikixnamikij tlaouijkayotl kej kema amo tijpiaj ika tlen timopanoltisej o timokokouaj.

 Tlen uelis panos: Uelis amo mitspaktis pampa kemantika mopatlas se keski tlamantli ipan monemilis. Biblia kiijtoua nochi uelis techpanos tlen amo kuali, maske tijtekipanouaj toTeotsij o amo (Eclesiastés 9:11).

 Tlen uelis tijchiuas: Ya tijmati tijpias se keski tlaouijkayotl, yeka nama moneki tijchiuas se keski tlamantli tlen uelis mitspaleuis kuali tikixnamikis. Xikita nopa tlaouijkayotl kej se tlamantli tlen uelis mitspaleuis nojua kuali xitlaneltoka ipan Jehová uan ximotemachi ipan ya (Santiago 1:2, 3). Teipa, uelis tikijtos kej apóstol Pablo: “Nochi niueli nijchiua ika nopa chikaualistli tlen [toTeotsij] nechmaka” (Filipenses 4:13).

 Uelis tijchiuas ni: Xikita sekinok tlamantli tlen kipanok José. Uelis tijpouas tlen kipanok ipan capítulos 37 uan 39-41 tlen amochtli Génesis. Ya kiixnamijki se keski tlaouijkayotl tlen amo moiljuijtoya. Ximotlatsintoki: “¿Tlake tlaouijkayotl kipixki José uan kenijkatsa kiixnamijki? ¿Kenijkatsa kipaleuik Jehová?”.

 ¿Tijneki ma mitspaleuikaj?

•   Xijpoua:

   “¿Qué puedo hacer si sufro una desgracia?”.

   “¿Me considero una persona resiliente?”.

   “Cómo adaptarse a los cambios”.

•   Xijkixti:

   “Cuando uno de tus padres está enfermo”.

 Texto tlen mitspaleuis: “Nopa tlamantli fiero tlen se tlakatl o se siuatl tlauel kineki kichiuas ipan itlalnamikilis, ya nopa kiyoltilana” (Santiago 1:14).

 Tlen kiijtosneki: Kemantika nochi tojuantij techyoltilana tijchiuasej se tlamantli tlen uelis kichiuas ma titlajtlakolchiuakaj.

 Tlen uelis panos: Kema ya timoatsonpoliuiltijtos, nojua tijnekis tijchiuas tlen amo kinamiki (2 Pedro 2:18). Uan uelis tijnekis timotekas iuaya se akajya maske ayamo timosenkaua.

 Tlen uelis tijchiuas: Ximoiljui tlake tijchiuas namantsi, kiampa amo titlajtlakolchiuas kema mitsyoltilanas se tlamantli. Xikilnamiki tlen Jesús kiijtok: “Axaka uelis kintekipanos omej itekojuaj” (Mateo 6:24). Ta tijtlapejpenis ajkia tijtekipanos. Xijtlapejpeni tijtekipanos Jehová. Maske tlauel mitsyoltilanas se tlamantli, uelis tijtlapejpenis amo titlajtlakolchiuas (Gálatas 5:16).

 Uelis tijchiuas ni: Xikita tlake tlamantli kuali tijchiua uan tlake amo. Xikintlapejpeni mouampoyouaj katli mitspaleuisej xijnexti kuajkuali tlamantli. Amo ximouika ika maseualmej katli amo mitspaleuisej uan amo xia yon xiitsto kampa uelis kichiuas xitlajtlakolchiua (Salmo 26:4, 5).

 ¿Tijneki ma mitspaleuikaj?

•   Xijpoua:

   “¿Qué puedo hacer para resistir las tentaciones?”.

   “¿Cómo puedo dejar de pensar en el sexo?”.

   “Cómo resistir la presión de tus compañeros”.

   “¿Timoiljuiaj kej Jehová?”.

 Texto tlen mitspaleuis: “Sejse inmojuantij xikiknelikaj toTeko hasta asis tonal para inmikisej. [...] Axtijnekij ximotlatskanekikaj” (Hebreos 6:11, 12).

 Tlen kiijtosneki: Se akajya katli amo mosentlalia ipan tlen kichiua, uelis ayokmo kuali kichiuas iteki uan motlatskanekis.

 Tlen uelis panos: Uelis kema ya timoatsonpoliuiltijtoya tlauel tiyolpakiyaya uan tijnekiyaya tijchiuas miak tlamantli pampa tijmatiyaya tlauel tikiknelia Jehová. Uan teipa, uelis ouij tijmajtiajki tijneltokas Jehová. Nopa uelis kichiuas ximotekipacho uan ayokmo tlauel xiyolpaki (Gálatas 5:7).

 Tlen uelis tijchiuas: Nojua xijchijto tlen kuali maske kemantika moyolo kinekis xijchiua seyok tlamantli (1 Corintios 9:27). Yeka, nojua xijchiua kampeka tijnechkauis toTeotsij Jehová. ¿Kenijkatsa uelis tijchiuas? Nochipa xijchiua kampeka timonojnotsas iuaya uan nojua kuali xikixmati. Nojkia tlauel mitspaleuis tlaj tikinpias mouampoyouaj katli nelnelia kinpaktia kitekipanosej Jehová.

 Uelis tijchiuas ni: Xikilnamiki Jehová tlauel mitsiknelia uan kineki mitspaleuis. Amo ximoiljui ya mitskualankaita san pampa namantsi tijmati kejuak ayokmo tlauel tiyolpaki tijtekipanos. Biblia kiijtoua: “Yajaya kinfuerzajmaka tlen siauij uan kinmaka yankuik chikaualistli tlen kuatij” (Isaías 40:29). Teipa, Jehová tlauel mitsteochiuas tlaj tijchiuas kampeka nojua titlatekipanos ika pakilistli.

 ¿Tijneki ma mitspaleuikaj?

•   Xijpoua:

   “Telpokamej uan ichpokamej: ‘xijchijtinemikaj tlen xitlauak” uan inmomakixtisej’ ”.

   “¿Y si no me atrae la idea de ser testigo de Jehová?”.

•   Xikita:

   Tlen telpokamej uan ichpokamej kiijtouaj: Tlauel kuali tlaj tijtekipanos toTeotsij.

 Uelis tikijtosej: Tlaj amo tijkaua Jehová, tijchiuas tlauel ma yolpaki (Proverbios 27:11). Ya tlauel yolpakis pampa tijtlapejpenik tijtekipanos uan mitspaleuis amo xitlajtlakolchiua kema Satanás kinekis kiampa xijchiua.