Tlamachtianij tlauel mitstetsopasej, sekinok telpokamej nojkia, tijchiuas exámenes tlen tlauel ouij uan miak tareas... Tlaj amo mitspaktia timomachtis, amo kenijki ximoiljui, miakej nojkia kiampa momachiliaj. a Se ichpokatl katli itoka Rachel b kiijtoua:

 “Nijnekiskia niitstos sejkanok uan amo ipan escuela. Nechpaktiskia niitstos ipan mar, ininuaya nouampoyouaj o hasta nikinpaleuis notatauaj kema tlakualchiuaj o tlapojpouaj”.

 Tlaj nojkia timoiljuia kej Rachel, uelis tikita escuela kej se carcel uan moneki tikijiyouis hasta kema tijtlamiltis. ¿Tlake mitspaleuis amo kiampa xijyolmati?.

 ¿Tijmajtoya? Tlaj tijchiua kampeka tikitas escuela kej se tlamantli tlen mitspaleuis, uelis tlauel mitspaktis uan ayokmo timoiljuis kej achtouia. Nopaya timomachtis sekinok tlamantli tlen mitspaleuis kema timoskaltis.

 Tlaj timosentlalia ipan tlen mitspaleuis, uelis mitspaktis escuela.

 Tijyekos tlen mitspaleuis. Tlaj más timomachtia, amo ouij tijmatis tijsenkauas kuesoli tlen tijpias ipan moteki o sejkanok, uan ayokmo tijchias sekinok ma kisenkauakaj tlen mitspano. Maske amo mitspaktia se keski tlamantli tlen escuela, uelis timotlatsintokis: “¿Kenijkatsa nechpaleuia tlen nimomachtia?”.

 Texto tlen mitspaleuis: “Xijpia kuali tlalnamikilistli uan xijtlakakili ni tlalnamijkatlajtoli, axkema xikinilkaua” (Proverbios 3:21).

 Timomatis kuali tijchiuas se keski tlamantli. Tlen tijchiua ipan escuela mitspaleuis kuali xijtekiui tonali, ximonauati uan kuali xitekiti. Ni tlamantli mitspaleuis kema timoskaltis, yeka ximotlatsintoki: “¿Kenijkatsa nechpaleuia escuela kuali ma nimonauati uan ma nitekiti? ¿Tlake tlamantli uelis nijpatlas?”.

 Texto tlen mitspaleuis: “Tlen tekitij kuali kiselisej inintlaxtlauil” (Proverbios 14:23).

 Mitspaleuis más xikamanalti ininuaya sekinok. Kema tiitstos ininuaya katli timomachtia, tijyekojtias kenijkatsa tikinkuamachilis uan tikintlepanitas. Se telpokatl katli itoka Joshua kiijtoua: “Kema tijmatis timokamanaljuis ininuaya sekinok eli tlauel ipati, sanse kej kema timomachtia historia o ciencias pampa nochipa mitspaleuis”. Ximotlatsintoki: “¿Kenijkatsa escuela nechpaleuijtok kuali ma nimouika ininuaya sekinok maske amo tijneltokaj o timomajtokej tijchiuaj sanse tlamantli?”.

 Texto tlen mitspaleuis: “Xijtemolikaj kenijkatsa initstosej ika tlaseuilistli ika nochi maseualmej” (Hebreos 12:14).

 Timokualchijchiuas. Ipan escuela uelis tikitas tlake tlamantli kuali tijchiua, uan timosentlalis tijchiuas sekinok tlamantli ika tlen ya tijyekoua. Se ichpokatl katli itoka Brooke kiijtoua: “Uelis nojkia timomachtis tlen mitspaleuis, sanse kej na. Kiampa kema tikisas tlen escuela ya tijmatis ika tlake titekitis”. Ximotlatsintoki: “¿Ika tlake nimopanoltis kema nikisas tlen escuela? ¿Tlake uelis nimomachtis uan kiampa uelis nijchiuas nopa tekitl?”.

 Texto tlen mitspaleuis: “Xijtlapejpeni se kuali ojtli para ipan tinemis” (Proverbios 4:26).