TLEN TELPOKAMEJ KINEKIJ KIMATISEJ
¿Tlake nechpaleuis ma nimoiljui tlen kuali?
¿Kenijkatsa mitsixmatij?
Nochipa yolpaktok
“Nijchiua kampeka nochipa niyolpaktos uan kuali nijyolmatis” (Valerie).
Nochipa moyolkokoua
“Kema nechiljuiaj se tlamantli tlen kuali, ouij nijmati nijneltokas pampa nimoiljuia amo nelia melauak” (Rebecca).
Kiita nochi tlamantli kej kinamiki
“Tlaj nochipa tiyolpaktos uelis timoyolkokos. Tlaj nochipa timoyolkokos amo kuali tijyolmatis. Pero tlaj tikita nochi tlamantli kej kinamiki tlauel mitspaleuis” (Anna).
¿Kenke tlauel ipati?
Ipan Biblia kiijtoua se katli yolpaktok “mojmostla kiita keja eliskia iljuitl” (Proverbios 15:15). Maseualmej katli moiljuiaj tlen kuali, yolpakij, nochi tlen kichiuaj kisa kuali uan kinpiaj miakej ininuampoyouaj. Kema se akajya nochipa moyolkokojtok uan motekipachojtok amo aka kineki mouampojchiuas iuaya.
Maske kiampa onka se keski tlamantli tlen uelis kichiuas ma moyolkokokaj maske tlauel yolpakij. Ma tikitakaj se keski tlamantli:
Ipan noticias nesi onka tlauilankayotl, maseualmej temiktiaj uan kichiuaj tlen amo kuali.
Nochi tochampoyouaj kipiaj kuesoli.
Nochi tijchiuaj kampeka tijchiuasej tlen kuali pampa titlajtlakolejkej.
Kemantika touampoyouaj techyolkokouaj.
Amo ximoiljui amo tleno pano uan amo san ximoiljui tlen mitspano pampa nopa kichiuas tlauel ximoyolkoko, más kuali xikita kej kinamiki tlen mitspano. Tlaj timoiljuis tlen kuali, mitspaleuis amo ximoiljui tlen amo kuali uan maske tikixnamikis tlaouijkayotl uelis tiyolpakis.
Uelis tikijiyouis tlen mitspano pampa tijmati teipa kuali tiitstos
Tlen uelis tijchiuas
Xikita kej kinamiki kema timokuapoloua.
Biblia kiijtoua: “Ipan nochi ni tlaltipaktli axonka niyon se tlakatl tlen nochipa kichiua tlen kuali uan axkema tlajtlakolchiua” (Eclesiastés 7:20). Pampa titlajtlakole o timokuapoloua amo kiijtosneki amo tleno ueli tijchiua.
¿Tlake mitspaleuis tikitas kej kinamiki? Xijchiua kampeka kuali tijchiuas se tlamantli pero amo ximoiljui nochipa kuali kisas. Se telpokatl katli itoka Caleb kiijtoua: “Nijchiua kampeka amo san nimoiljuijtos ipan tlake tlamantli nimokuapolok”. Nojkia kiijtoua: “Más kuali nikitas tlake tlamantli nojua kuali nijchiuas”.
Amo xikita tlen sekinok kichiuaj ika tlen tijchiua.
Biblia kiijtoua amo ma timoueyimatikaj “amo ma timotlanikaj se ika seyok uan amo ma timokokolikaj” (Gálatas 5:26). Tlaj nochipa tikita tlaixkopinkayotl tlen kitlaliaj mouampoyouaj ipan internet uan tikita moyolpakiltiaj uan amo mitstlanejkej uelis tlauel timoyolkokos. Uan timoiljuis mouampoyouaj ayokmo mitsikneliaj.
¿Tlake mitspaleuis amo kiampa ximoiljui? Xikilnamiki amo nochipa mitstlaneuisej ipan se iljuitl. Nojkia, tlen kitlalia ipan internet amo nochipa kiijtoua tlen melauak. Se ichpokatl katli itoka Alexis kiijtoua: “Ipan internet san kitlaliaj kema moyolpakiltiaj”. Ya nojua kiijtoua: “Maseualmej amo kitlaliaj tlen mojmostla kinpano”.
Kuali ximouika ininuaya mochampoyouaj.
Biblia kiijtoua: “Hasta kampa inuelij, xijtemolikaj kenijkatsa kuali inmouikasej ininuaya nochi maseualmej” (Romanos 12:18). Amo uelis tikiniljuis sekinok tlake moneki kichiuasej, pero kena uelis tijnauatis tlen timoiljuijtok tijchiuas. San ta tijtlapejpenis iuaya ajkia timouikas.
¿Tlake mitspaleuis kuali ximouika ininuaya? Xijchiua kampeka kuali timouikas ininuaya mochampoyouaj uan amo nima xikualani, sanse kej tijchiuaskia ika sekinok maseualmej. Se ichpokatl katli itoka Melinda kiijtoua: “Amo aka kichiua tlen kuali, pampa kemantika tikinyolkokouaj sekinok”. Uan kiijtoua: “Moneki tojuantij tijtlapejpenisej tlaj kuali timouikasej ininuaya sekinok o amo”.
Xijnexti titetlaskamatilia.
Biblia kiijtoua: “Xijnextikaj intetlaskamatij” (Colosenses 3:15). Titetlaskamatilis mitspaleuis tikitas nopa kuajkuali tlamantli tlen mitspano uan amo ipan tlamantli tlen timoiljuia amo ueli tijchiua.
Tlake mitspaleuis tikitas kej kinamiki tlen mitspano: Maske tijpia kuesoli, nojkia uelis timoiljuis ipan tlamantli tlen kuali mitspanotok. Se ichpokatl katli itoka Rebecca kiijtoua: “Mojmostla nikijkuiloua se kuali tlamantli tlen nechpanok”. Nojkia kiijtoua: “Nechpaktia nikilnamikis, nochi nopa kuajkuali tlamantli”.
Xikita kenijkatsa elij mouampoyouaj.
Biblia kiijtoua: “Tlaj se akajya mouika iuaya se katli amo kuali monejnemiltia, ayokmo kichiuas nopa kuali tlamantli tlen momajtoya kichiua” (1 Corintios 15:33). Tlaj timouika ininuaya katli tekokoliaj, katli tetlaijiljuia uan katli amo yolpakij, uelis teipa nojkia kiampa tijchiuas.
¿Tlake mitspaleuis kiampa tijchiuas? Kema mouampoyouaj kiixnamikij se tlaouijkayotl, uelis moiljuisej amo kuali tlen kichiuaj. Uelis tikinpaleuis, pero amo xijkaua nopa kuesoli tlen kinpano nojkia ma mitstlanaui. Se ichpokatl katli itoka Michelle kiijtoua “Amo xikinpia mouampoyouaj katli san moiljuiaj ipan tlen kinpano”.
¿Nojua tijneki tijmatis?
Biblia kiijtoua: “Ipan itlamia tonali, tlen mochijtos elis tlauel fiero uan ouij para kiijiyouisej” (2 Timoteo 3:1). Ouij tijmati timoiljuis tlen kuali pampa onka miak tlaouijkayotl. Tlaj nojua tijneki tijmatis xijpoua “¿Kenke kikaua toTeotsij ma titlaijiyouikaj?”.
