Se tlamantli tlen tlauel kinyolkokoua telpokamej eli kema inintatauaj kiixpolouaj nopa amatl kampa nesi mosenkajtokej. Tlaj kiampa mitspano, ¿tlake uelis mitspaleuis amo tlauel ximotetsopa?

Ipan ni tlamachtili tikitasej:

•  Eyi tlamantli tlen amo monekis tijchiuas

•  Eyi tlamantli tlen uelis tijchiuas

•  Tlen telpokamej uan ichpokamej kiijtouaj

 Eyi tlamantli tlen amo monekis tijchiuas

 1). Amo ximotlajtlakolti

 “Se tonali, nonana nechiljuik kema na nitlakatki pejki mokualaniaj. Yeka nimoiljuik eliyaya notlajtlakol pampa nama notatauaj ayokmo itstokej sansejko” (Diana).

 Xikilnamikto ni: Tlaj motatauaj kinekij kiixpolosej nopa amatl kampa nesi moamasenkajtokej pampa uelis ayokmo kuali mouikaj. Amo eli motlajtlakol uan amo uelis tikinpaleuis. Inijuantij moneki kisenkauasej nopa kuesoli.

 2). Amo xitekokoli

 “Tlauel nikualantok iuaya notata pampa kikajkayajki nonana. Nimoiljuia ayokmo uelis sampa nimotemachis ipan notata” (Rianna).

 Xikilnamikto ni: Uelis tikualantok ika tlen kinpano motatauaj, amo kenijki tlaj kiampa tijyolmati. Uan amo mitspaleuis tlaj titekokolis. Uelis kitlanauis motlakayo uan amo kuali tijyolmatis. Yeka kiijtouaj kema se tekokolia eli kejuak tikijiskiaj se tlamantli tlen techmiktis uan tijnekiskia ma kitlanaui seyok maseuali. a

 3). Amo ximoiljui ta nojkia amo kema tiyolpakis iuaya monamik

 “Nimajmaui nijchiuas sanse kej notata kichijki. Yeka amo nijneki nimonamiktis, nikinpias nokoneuaj uan teipa nikixpolos kampa nesi nimoamasenkajtok” (Jessica).

 Xikilnamikto ni: Maske motatauaj kiixpolojkej nopa amatl kampa nesi mosenkajtokej amo kiijtosneki nojkia kiampa mitspanos. Tlen kinpanok motatauaj mitspaleuis, tikitas tlake kuajkuali tlamantli tijneki ma kinexti katli iuaya tijneki timosenkauas. Tlen kinpanok motatauaj nojkia uelis mitspaleuis tijnextis kuajkuali tlamantli tlen mitspaleuis xiitsto kuali iuaya monamik.

 Eyi tlamantli tlen uelis tijchiuas

 1). Xikijto tlen tijyolmati. Maseualmej katli amo kiijtouaj tlen kiyolmatij, peuaj kichiuaj tlen amo kuali, kej kiisej vino o kitekiuisej drogas. Tlaj amo tijneki kiampa ma mitspano, uelis tijchiuas ni tlamantli:

 Xikamanalti ininuaya motatauaj. Tlaj motatauaj mitsiljuia xikinpaleui ma kisenkauaj ininkuesol, uajka ika tlatlepanitakayotl uan xitlauak xikiniljui tlen tijyolmati. Uan tlaj ouij tijmati tikamanaltis ininuaya, uelis tikijkuilos tlen tijyolmati.

 Xikamanalti iuaya mouampox. Kema se mouampox kuali mitstlakakilia mitspaleuis kuali xijyolmati. Biblia kiijtoua “se tlen tokualuampo temachtli techiknelia nochipa. Kema onka tlaouijkayotl techpaleuia keja eliskia se toikni” (Proverbios 17:17).

 Xikamanalti iuaya Dios. Jehová kitlakakilia “kema timomaijtouaj”, ya nochipa kineki mitstlakakilis (Salmo 65:2). Biblia kiijtoua uelis tikiljuis Jehová nochi tlen mitstekipachoua, pampa ya kitekipachoua tlen mitspano. (1 Pedro 5:7).

•   ¿Iuaya ajkia amo nima tikualani kema timakanalti iuaya monana o motata?

•   ¿Tijpia se mouampox katli uelis mitspaleuis?

•   ¿Tlake tlamantli tlen mitspano uelis tikiljuis Jehová?

 2. Ximomati kej nama tiitstok

 Pampa motatauaj moamaxelojkej nama mopatlas miak tlamantli kej: inkiitasej kanke initstosej, ipan tlake escuela timomachtis, uelis ayokmo tijpias tlen achtouia tijpiayaya uan tikinpias sekinok mouampoyouaj. Amo kenijki tlaj amo kuali tijyolmati o tlauel timotekipachoua pampa mopatlak kej tiitstoya. ¿Tlake mitspaleuis? Xijchiua kampeka timomatis kej nama tiitstok.

•   ¿Tlake tlamantli tijmatki ouij tijchiuas kema motatauaj moamaxelojkej?

•   ¿Tlake uelis mitspaleuis ximomati?

 3. Xikita nopa kuajkuali tlamantli tlen tijpia

 Maske tlauel timoyolkokoua pampa motatauaj kiixpolojkej nopa amatl kampa nesi mosenkajtokej. Uelis mitspaleuis tijnextis kuajkuali tlamantli, nojkia tijyekos tijchiuas se keski tlamantli. Kema Jeremy kipixtoya 13 xiuitl itatauaj moamaxelojkej ya kiijtoua: “Kema notatauaj moamaxelojkej, monejki nijpaleuis nonana uan nopilikni pampa na nieliyaya niachtouiejketl”.

•   Ika tlen panok, ¿tikitak tlake kuajkuali tlamantli tijpia o tlake tlamantli ueli tijchiua?

•   ¿Tlake sekinok tlamantli mitspaktiskia tijchiuas?