Tlamantli tlen tijpiaj, kej se kali o se carro moneki kuali eltos. Nojkia kiampa pano kema timouampojchiuaj iuaya toTeotsij. Maske ya timoatsonpoliuiltik, ¿tlake mitspaleuis nojua kuali timouampojchijtos iuaya toTeotsij?

Ipan ni tlamachtili tikitas ni:

•  Nochipa ximomachti Biblia

•  Nochipa ximomaijto

•  Nochipa xikiniljui sekinok tlen tijneltoka

•  Nochipa ximosentili ipan tlanechikoli

 Texto tlen mitspaleuis: “Inkinchiuilisej sekinok tlen kuali uan mojmostla más inkiixmajtiasej toTeko” (Colosenses 1:10).

 Tlen kiijtosneki: Kema ya timoatsonpoliuiltijtos moneki nojua tijpouas Biblia uan timoyoliljuis ipan tlen tijpoua (Salmo 25:4; 119:97).

 Tlen uelis panos: Kemantika amo tijnekis timomachtis, uan uelis timoiljuis amo tieli kej katli kinpaktia momachtisej.

 Tlen uelis tijchiuas: Xijtemo tlamachtili tlen mitspaktiskia tijmatis. Xikijkuilo kema uan tlake tlamachtili tlen Biblia timomachtis, kiampa amo tikuesiuis. Xikilnamikto tijneki nojua tlauel tikiknelis Jehová uan iTlajtol. Tlaj kiampa tijchiuas kema timomachtis, tlauel mitspaleuis uan nojkia tiyolpakis kema timomachtis (Salmo 16:11).

 Uelis tijchiuas ni: Tlaj tijneki kuali timomachtis, xia kampa tlatsitsikatok uan kampa amo tleno uelis kichiuas ximoiljui sekinok tlamantli o ayokmo kuali ximomachti.

 ¿Tijneki ma mitspaleuikaj?

•   Xijpoua:

   “¿Kenijkatsa uelis nechpaleuis Biblia? Tlaxeloli 2: Xikita kenijkatsa uelis mitspaktis tijpouas Biblia”.

   “¿Qué hago si no me puedo concentrar?”.

•   Xikita:

   Tlen telpokamej uan ichpokamej kiijtouaj: Tijpouas Biblia.

•   Xijkixti:

   “Programa de lectura de la Biblia”.

 Texto tlen mitspaleuis: “Ayok ximotekipachokaj ika niyon se tlamantli. Más kuali ximomaijtokaj ika toTeko ika nochi tlen inmechpanotiuala. Xijtlajtlanikaj ma inmechmaka nochi tlen moneki uan xijtlaskamatikaj para nochi tlen inmechchiuilijtok” (Filipenses 4:6).

 Tlen kiijtosneki: Timonojnotsas iuaya toTeotsij kiijtosneki ya mitsnojnotsas uan ta tijnojnotsas. Kema tijpoua Biblia, tijkaki tlen toTeotsij mitsiljuia, uan kema timomaijtoua, ta tijkamanaljuia. Kema timomaijtos uelis tijtlajtlanis ma mitsmaka tlen mitspoloua uan nojkia tijtlaskamatilis nochi tlen mitsmakatok.

 Tlen uelis panos: Teipa uelis peuas tikompauis tlen tikijtoua kema timomaijtoua uan nochipa tikiljuis Jehová sanse tlamantli. Nojkia uelis timoiljuis tlaj Jehová nelia mitstlakakilia kema timomaijtoua o tlaj kineki kimatis tlen mitspano (Salmo 10:1).

 Tlen uelis tijchiuas: Ipan se tonali, ximoiljuijti tlake tlamantli tijneki tikiljuis Jehová kema timomaijtos. Tlaj tlauel timotekiuijtok uan amo uelis tikiljuis nochi tlen tijnekiskia, uajka amo xikilkaua tlen timoiljuijtoya tikiljuis uan ximomaijto kema ayokmo tlauel timotekiuijtos. Uan amo xikiljui san ta ma mitspaleui, nojkia xikiljui ma kinpaleui sekinok (Filipenses 2:4).

 Uelis tijchiuas ni: Tlaj kema timomaijtoua tikita tikompauia tlen tikijtoua, xikiljui Jehová ma mitspaleui. Ya kineki kimatis nochi tlen mitstekipachoua, uan nojkia kineki xikiljui ma mitspaleui kuali timonojnotsas iuaya (1 Juan 5:14).

 ¿Tijneki ma mitspaleuikaj?

•   Xijpoua:

   “¿Kenke tlauel moneki timomaijtosej?”.

•   Xijkixti:

   “¿Cómo puedo mejorar mis oraciones?”.

 Texto tlen mitspaleuis: “Ximotlachili para san tlen xitlauak tijchiuas uan para san tlen kuali titlamachtis. [...] Intla kej ni tijchiuas, toTeko mitsmakixtis ta uan inijuantij tlen mitstlakakilisej” (1 Timoteo 4:16).

 Tlen kiijtosneki: Kema titlajtolmoyaua, mitspaleuia nojua kuali xitlaneltoka. Tlaj kiampa tijchiuas, uelis timomanauis uan nojkia uelis momanauisej katli mitstlakakilisej.

 Tlen uelis panos: Kemantika uelis amo tijnekis titlajtolmoyauas o uelis kampa timomachtia timajmauis tikiniljuis sekinok tlen tijneltoka.

 Tlen uelis tijchiuas: Maske timajmaui titlajtolmoyauas, amo xijkaua nopa ma mitstsakuili. Apóstol Pablo kiijkuilok: “Yonke axnijnekiskia, noja moneki nitlakamanalos itlajtol, pampa toTeko kitlalik nomako ni tekitl uan moneki nijchiuas” (1 Corintios 9:16, 17).

 Uelis tijchiuas ni: Xikiniljui motatauaj tlaj uelis timouampojchiuas iuaya se toikni katli kuali tlajtolmoyaua uan katli uelis mitspaleuis (Proverbios 27:17).

 ¿Tijneki ma mitspaleuikaj?

•   Xijpoua:

   “¿Por qué temo hablar de mi fe?”.

 Texto tlen mitspaleuis: “Ma tijtemokaj kejatsa timosemakasej se ika seyok para más timoiknelisej uan tijchiuasej tlen kuali. Ximomokuitlauikaj para axinkikauasej inmosentilisej ininuaya sekinok tlaneltokanij” (Hebreos 10:24, 25).

 Tlen kiijtosneki: Tojuantij tiauij tlanechikoli pampa tijnekij tijueyichiuasej Jehová. Uan nojkia pampa techpaleuia ipan sekinok tlamantli. Ximoiljui, kema tia tlanechikoli, toikniuaj mitsyolchikauaj uan ta nojkia tikinyolchikaua kema nochipa tia uan titlanankilia (Romanos 1:11, 12).

 Tlen uelis panos: Kema tiitstos tlanechikoli uelis peuas timoiljuis sekinok tlamantli uan nopa kichiuas amo kuali xijtlakakili nopa tlamachtili tlen moixtoma nopaya. Nojkia uelis ayokmo nochipa tias tlanechikoli pampa mitskauiliaj miak tarea ipan escuela o pampa timotekiuijtok ipan sekinok tlamantli.

 Tlen uelis tijchiuas: Maske moneki tijchiuas tarea tlen mitskauiliaj ipan escuela, ximosentlali tias ipan nochi tlanechikoli uan kuali xijtlakakili nochi tlamachtili tlen moixtoma. Nojkia, xijchiua kampeka titlanankilis, uan kema tlamis tlanechikoli, xijyolchikaua se toikni katli nojkia tlanankilik o katli kipanoltik se tlamachtili.

 Uelis tijchiuas ni: Achtoui ximomachti tlen moixtomas ipan tlanechikoli. Xijkixti nopa aplicación JW Library® uan xijtemo kampa kiijtoua “Reuniones” kiampa tijmatis tlake tlamachtili moixtomas.

 ¿Tijneki ma mitspaleuikaj?

•   Xijpoua:

   “¿Por qué debo ir a las reuniones cristianas?”.