TLEN TELPOKAMEJ KINEKIJ KIMATISEJ
¿Kenke notatauaj amo nechkauaj ma nimoyolpakilti?
Mouampoyouaj kichiuasej se iljuitl uan nojkia mitstlaneuij, tikiniljuia motatauaj tlaj uelis tias uan mitsiljuiaj: “Amo uelis tias”. Ya tijmatiyaya kiampa mitsiljuisej, pampa ipa kiampa mitsiljuiaj.
Ipan ni tlamachtili tikitasej ni:
¿Kenke nochipa nechiljuia amo?
Tlaj motatauaj nochipa mitsiljuia amo uelis tias ipan se iljuitl, uelis timoiljuis amo kinekij ximoyolpakilti.
Kema Marie kimakakej se teléfono kiampa kiyolmatki. Ya kiijtoua: “Notata nechiljuik kenijkatsa monekiyaya nijtekiuis noteléfono, tlake aplicaciones nijtemouis, iuaya ajkia uelis nimokamanaljuis uan hasta tlake hora ueliskia nijtekiuis... pero nouampoyouaj nochipa kichiua tlen inijuantij kinekij”.
Ximoiljui ni: ¿Timoiljuia itata Marie amo kinekiyaya ma moyolpakilti? O ¿Kitekipachouayaya tlen ueliskia kipanos?
Kema amo chikauak tijuika mocarro uelis kichiuas amo nima tiasiti kanajya, pero nopa mitspaleuis amo ma mitspano tlen amo kuali. Kiampa pano kema totatauaj kitlaliaj se keski tlanauatili, techpaleuia kuali ma tiitstokaj.
Tlen uelis tijchiuas: Ximoiljui titetata uan tijpia motelpoka katli namanok mokouik se teléfono. ¿Tlake mitstekipachoskia? ¿Tlake tlamantli tikiljuiskia amo ma kichiua?¿Tlake tijnakiliskia tlaj mitsiljuiskia amo kema tijkaua ma moyolpakilti?
“Notata nochipa nechiljuiyaya, ‘ximoiljui tlen nijyolmati’. Nopa nechpaleuiyaya ma nijkuamachili kenke nechiljuiyaya ma amo nijchiua se keski tlamantli. Tlaj nikinpiaskia nokoneuaj nojkia nijnekiskia ma kineltokakaj uan ma kichiuakaj tlen nikiniljuia” (Tanya).
¿Tlake uelis nijchiuas uan kiampa nechkauasej ma nijchiua se keski tlamantli?
“Tlaj nimantsi tikualanis amo mitspaleuis, san timoyolkokos uan nojkia motatauaj. Tlaj tikinkamaijixnamikis, moiljuisej amo titlalnamiki uan amo mitskauasej xia kanajya” (Richard).
“Notatauaj nechiknelia yeka amo nechkauaj ma nijchiua se keski tlamantli. Inijuantij kena kinekij ma nimoyolpakilti, san amo kinekij ma nijpia kuesoli” (Ivy).
Texto tlen mitspaleuis: “Se tlen uiuitik kuatsajtsi uan kinextia nochi ikualankayo, pero se tlen tlalnamiki moijiyouia uan moyoltlalia” (Proverbios 29:11).
“Notata nechiljuik kenijkatsa nijtekiuis noteléfono pero kemantika amo nijchiuayaya tlen nechiljuiyaya. Ika tlayoua nikintlakuiljuiliyaya nouampoyouaj o nijtemouiyaya aplicaciones tlen nechiljuijtoya amo ma nijtemoui. Nochipa kimatiyaya tlen nijchijtoya, uan nojua más nechmokuitlauiyaya pampa ayokmo motemachiyaya ipan na. Tlaj amo tijchiuas tlen mitsiljuisej amo mitspaleuis” (Marie).
“Xijpia moyolo. Uelis motatauaj ika yolik kipatlasej se keski tlamantli. Uan tlaj kiitaj tikinneltoka, teipa uelis mitskauasej nojua xijchiua se keski tlamantli” (Melinda).
Texto tlen mitspaleuis: “Konemej, xikinneltokakaj inmotatauaj ipan nochi tlen inmechiljuiaj” (Colosenses 3:20).
“Tlaj san tikiniljuijtos motatauaj tlen tijneki tijchiuas nopa amo mitspaleuis” (Natalie).
“Tetajmej kineki ininkoneuaj kuali ma kitlapejpenikaj tlen kichiuasej. Kema nikamanalti ininuaya notatauaj, nikiniljuia tlen melauak uan amo san tlen na nijyolmati. Nikitstok kema kiampa nijchiua notatauaj nechneltokaj” (Joseph).
Texto tlen mitspaleuis: “Xijtlepanita motata uan monana” (Efesios 6:2).
Tlen nojkia mitspaktis tikitas
TLAIXKOPINKAYOMEJ TLEN TECHMACHTIA
¿Kenijkatsa uelis nechkauasej ma nijchiua se keski tlamantli?
Maske ta timoiljuia uelis tijchiuas se keski tlamantli tlen kichiuaj katli ya uejueyij, motatauaj kiijtouaj ayamo kinamiki tijchiuas. ¿Tlake uelis tijchiuas uan kiampa motatauaj motemachisej ipan ta?
TLEN TELPOKAMEJ UAN ICHPOKAMEJ KIIJTOUAJ
¿Kenijkatsa uelis tikamanaltis ininuaya motatauaj?
Tlauel mitspaleuis tlaj kiampa tijchiuas.
