Tikixmatki se akajya uan tikixtoka. Inkinekij kuali inmoixmatisej uan teipa inkiitasej tlaj uelis inmosenkauasej. Uajka ¿tlake inmechpaleuis kuali inmoixmatisej?

Ipan ni tlamachtili tikitasej se keski tlamantli:

•  Xikijto tlen melauak

•  Amo sanse inmoiljuisej

•  Uelis inmotetsopasej

 Kema initstosej sansejko nojua kuali inmoixmatisej. Uan kema inkichiuasej se keski tlamantli sansejko inkiitasej kenijkatsa nelia eli nopa ichpokatl o nopa telpokatl.

 Maske kiampa, onkas sekinok tlamantli tlen monekis inmoiljuisej xitlauak. Kema inkichiuasej xijchiuakaj ika tlatlepanitakayotl uan amo san ximoiljui ipan tlen ta tijyolmati.

 Se keski tlamantli tlen moneki inmokamanaljuisej:

•   Tomij. ¿Timotlauikilia? ¿Nimantsi tijyaltia motomij? Tlaj inmosenkauasej, ¿kenijkatsa inkitekiuisej inmotomij?

•   Tijpia se kokolistli. ¿Timokokoua? ¿Achtouia tlauel timokokouayaya?

•   Tlen timosentlalijtok tijchiuas. ¿Tlake timosentlalijtok tijchiuas teipa? ¿Tlen timosentlalijtok tijchiuas eli sanse ika tlen monovia o monovio kineki kichiuas? Tlaj inmosenkauasej uan amo uelis inkichiuasej tlen inmosentlalijtoyaj, ¿uelis inyolpakisej?

•   Mochampoyouaj. ¿Tijmokuitlauia se tlen mochampoyouaj? ¿Teipa monekis tijmokuitlauis? ¿Tijneki tikinpias konemej? ¿Keskij?

 Kema inmokamanaljuisej tlen ni tlamantli, xikijto tlen melauak. Amo xijkajkayaua monovio o monovia san pampa tijneki kuali ma mitsita (Hebreos 13:18).

 Ximoiljui ni: ¿Tlake moneki tijmatis tlen monovio o monovia? ¿Uan tlake moneki kimatis tlen ta? ¿Kenijkatsa inmechpaleuis kema inmosenkauasej tlaj nama amo inmokajkayauaj uan kuali inmonojnotsaj?

 Tlen Biblia kiijtoua: “Sejse tlen inmojuantij ma kiniljui sekinok tlen melauak” (Efesios 4:25).

 “Uelis nopa ichpokatl moiljuis ‘ipan chikuasej metstli nechijtlanis’ uan uelis nopa telpokatl moiljuijtok ipan se xiuitl mitsijtlanis. Uan tlaj kiampa panos nopa ichpokatl uelis moyolkokos uan motekipachos pampa moiljuijtoya nima kiijtlanisej. Yeka tlauel ipati inmokamanaljuisej uan inkiijtosej tlen inkichiuasej” (Ariana, kipia se xiuitl mosenkajtok).

 Amo tisansemej. Yeka amo ximoiljui monovio o monovia moiljuis sanse kej ta o inmechpaktis sanse tlamantli. Uelis amo sanse inmoiljuisej pampa amo sanse tlamantli inmomajtokej inkichiuaj o kej inmechitskaltijkej.

 Ximoiljui ni: Maske amo sanse inmoiljuisej ipan se keski tlamantli uan amo kiixpano tlen Biblia kiijtoua, ¿inkichiuasej kampeka initstosej ika tlaseuilistli?

 Tlen Biblia kiijtoua: “Nochi ma kimatikaj para amo inkitemoliaj nochipa ma mochiua san tlen inmojuantij inkinekij” (Filipenses 4:5).

 “Maske inmoiljuisej kuali inmouikasej, kemantika amo sanse inmoiljuisej. Tlauel kuali tlaj inmechpaktis sanse tlamantli, pero tlen más ipati eli inkinextisej nopa kuajkuali tlamantli kema amo inmoiljuisej sanse” (Matthew, kipia makuili xiuitl mosenkajtok).

 Kema peuas timoixmatis iuaya se akajya san tijnekis tiitstos iuaya uan nopa uelis kichiuas tlauel ximotetsopa. ¿Tlake mitspaleuis?

 Ximoiljui keski imiaka inmoitasej. Amo san ximosentlali ipan inmojuantij, nopa ueliskia kichiuas ayokmo tijchiuas se keski tekitl ipan mochaj o ayokmo timoyolpakiltis ininuaya mouampoyouaj. Alana, katli kipia makuili xiuitl mosenkajki kiijtoua: “Kema ya timosenkajtos nojua tijnekis ma mitspaleuikaj mouampoyouaj uan ta nojkia monekis tikinpaleuis. Amo xikintlauelkaua san pampa tijpia monovio o monovia”.

 Xikilnamiki, kema timosenkauas monekis tikitas kej kinamiki nochi tlamantli ipan monemilis. Nama inelij novios uan uelis inkichiuasej ni tlamantli.

 Ximoiljui ni: ¿Tijneki monovio o monovia nochipa ma itsto mouaya? ¿Timoiljuia monovio o monovia kineki nochipa xiitsto iuaya? ¿Tlake inmechpaleuis amo ximotetsopakaj uan kiampa inkiitasej se keski tlamantli kej kinamiki?

 Tlen Biblia kiijtoua: “Nochi tlamantli tlen moneki tijchiuasejkipia tonali kema mochiua” (Eclesiastés 3:1).

 “Tlaj san moyolpakiltisej, kema mosenkauasej ouij kimatisej. Yeka moneki sansejko kichiuasej se keski tlamantli: kej tlakouatij, kichiuasej se keski tekitl kalijtik uan momachtisej sansejko. Ni kinpaleuis kuali ma itstokaj kema mosenkauasej” (Daniel, kipia ome xiuitl mosenkajtok).

 Xikilnamiki, kema elij novios kinpaleuia más kuali ma moixmatikaj uan kiampa kuali kitlapejpenisej tlen kichiuasej, uelis mosenkauasej o ayokmo elisej novios. Ipan Tlaxeloli 3 mitspaleuis kuali xijtlapejpeni tlen ueliskia tijchiuas.