“Kampa na niitstok nochi telpokamej katli ayamo kiaxitiaj 25 xiuitl tlachichinaj o kichichinaj cigarros electronicos” (Julia).

Ipan ni tlamachtili tikitasej:

•  Tlen moneki tijmatis

•  Tlen uelis tijchiuas

•  ¿Tetlanauia marihuana?

•  Tlen telpokamej uan ichpokamej kiijtouaj

 Tlen moneki tijmatis

•   Nopa cigarros temiktia. Nicotina eli se tlamantli tlen kipia cigarros, tlauel tetlanauia uan kichiua katli tlachichinaj más ma kinekikaj tlachichinasej. Nopa Centros de Control uan Prevención de Enfermedades de los Estados Unidos, kiijtoua: “Tlaj telpokamej amo tlachichinaj, kinpaleuis amo nima ma mikikaj yon kipiasej kokolistli”.

   “Nitekiti kampa kikixtiaj ultrasonido, uan ipan se keski ultrasonido nikitstok kenijkatsa nesi inintlakayo katli tlachichinaj. Nimosentlachilia kema nikita kenijkatsa iijtiko se akajya nempolijti pampa tlauel tlachichinayayaj. Tlauel nijpatiita notlakayo, yeka amo nitlachichina” (Teresa).

   ¿Tijmajtoya? Cigarros kipia se 7 mil tlamantli tlen tlauel tetlanauia. Sejse xiuitl, tlauel miakej maseualmej mikij pampa tlachichinaj.

•   Katli kichichinaj cigarros electrónicos nojkia kintlanauia. Katli kichichinaj cigarros electrónicos kitlanauiaj ininpulmón uan teipa mikij. Nopa cigarros electrónicos nojkia kipia nicotina. Yeka telpokamej katli kichichinaj ni cigarros, teipa kinekij kitekiuisej sekinok drogas.

   “Sekij cigarros electrónicos kipia tlamantli tlen tsopelik uan ajuiyak, yeka kinpaktia konemej uan telpokamej. Kiajuiyakmatij, yeka moiljuiaj amo tetlanauia” (Miranda).

   ¿Tijmajtoya? Nopa cigarros electrónicos amo san kipia atl. Ipan ipokyo kipia tlamantli tlen tlauel kitlanauia pulmones.

 Tlen uelis tijchiuas

•   Xijmati sekinok tlamantli. Amo xijneltoka nochi tlen kiijtouaj, sekij moiljuiaj nopa cigarros electrónicos amo tetlanauia o uelis mitspaleuis kema tlauel timotetsoptok. Xijtemo se keski tlamachtili tlen nopa cigarros electrónicos, kiampa kuali tijtlapejpenis tlen tijchiuas.

   Tlen Biblia kiijtoua: “Se tlen uiuitik nimantsi kineltoka nochi tlen iuampoyouaj kiiljuiaj ma kichiua, pero se tlakatl tlen tlalnamiki moiljuia intla kuali para kichiuas se tlamantli o axtle” (Proverbios 14:15).

   “Kema tijkuamachilis kenijkatsa tlauel mitstlanauis tlaj titlachichinas o tijchichinas cigarros electrónicos, tikitas amo nelnelia timoyolpakiltis kej kinekij ximoiljui katli tlauel kinixmatij o katli ininuaya timomachtia” (Evan).

   Ximoiljui ni: ¿Nelnelia yolpakij telpokamej katli tlachichinaj o kichichinaj cigarros electrónicos? ¿Kinpaleuia ma kiixnamikikaj kuesoli tlen nama kipiaj o tlen teipa kipiasej? ¿O kichiuas ma kipiakaj más kuesoli teipa?

•    Tlen mitspaleuis ayokmo tlauel timoyolkuesos. Onka se keski tlamantli tlen uelis tijchiuas para ayokmo tlauel timoyolkuesos, uelis tijchiuas ejercicio, titlapouas uan tiitstos ininuaya mouampoyouaj katli mitsyolchikauaj. Kiampa ayokmo tlauel tijnekis titlachichinas pampa onkas miak tlamantli tlen uelis tijchiuas.

   Tlen Biblia kiijtoua: “Se tlakatl tlen moyolkuesoua nelia tlaijiyouia, pero se kuali tlajtoli kimakas pakilistli ipan iyolo” (Proverbios 12:25).

   “Maseualmej kiijtouaj tlaj titlachichinas o tijchichinas cigarros electrónicos amo tlauel timotetsopas. Pero mitspaleuis san se tlalochtli uan tlauel mitstlanauis. Onka sekinok tlamantli tlen uelis mitspaleuis amo tlauel ximotetsopa” (Angela).

   Ximoiljui ni: ¿Tlake mitspaleuis amo tlauel timotetsopas? Tlaj tijneki tijmatis, xikita “Los jóvenes preguntan” ipan tlamachtili “¿Cómo puedo dejar de preocuparme por todo?”.

•    Kuali ximokualchijchiua, kiampa uelis tikijiyouis kema mitstetsopasej. Uelis mitstetsopasej katli ininuaya timomachtia o tlen tikita kema timoyolpakiltia. Kej películas, tlen tijmauisoua ipan televisión uan redes sociales, pampa nopaya nesi katli tlachichinaj o kichichinaj cigarros electrónicos moyolpakiltiaj.

   Tlen Biblia kiijtoua: “Tlakamej tlen ya moskaltijtokej [...]. Kitekiuijtokej inintlalnamikilis para kiixmatisej tlen kuali uan tlen axkuali” (Hebreos 5:14).

   “Miakej katli ininuaya nimomachtiyaya nechtlepanitayayaj pampa amo nitlachichinayaya yon nijchichinayaya cigarros electrónicos. Kema nikiniljuik kenke amo kiampa nijchiuayaya, pejkej nechtemanauiaj” (Anna).

   Ximoiljui ni: ¿Tlake mitspaleuis kema sekinok mitstetsopasej xijchiua tlen amo kuali? ¿Tikilnamiki kema amo tijchijki tlen sekinok mitsiljuijkej? Tlaj tijneki tijmatis tlake tijchiuas, xikita tlamachtili 15: “¿Cómo puedo resistir la presión de grupo?” tlen amochtli Lo que los jóvenes preguntan. Respuestas prácticas. Volumen 2.

•   Kuali xikintlapejpeni mouampoyouaj. Amo tijnekis titlachichinas o tijtekiuis cigarros electrónicos tlaj mouampoyouaj nojkia amo kiampa kichiuaj.

   Tlen Biblia kiijtoua: “Se tlakatl tlen nemi ininuaya tlen tlalnamikij mochiuas tlalnamiki. Pero aki nemi ininuaya uiuimej, kipantis ajkeya kinpojpostekis iomiyouaj” (Proverbios 13:20).

   “Tlauel mitspaleuis tlaj mouampoyouaj kinextiaj kuajkuali tlamantli, tlaj monauatiaj uan mosentlaliaj kichiuasej tlen kuali. Kema tikitas kuali itstokej, nojkia tijnekis tijchiuas kej inijuantij” (Calvin).

   Ximoiljui ni: ¿Mouampoyouaj mitspaleuiaj kuali ximonejnemilti uan amo xijsokiui motlakayo, o kichiuaj ouij xijmati kiampa tiitstos?

 ¿Tetlanauia marihuana?

 Miakej kiijtouaj marihuana amo tetlanauia, pero nopa amo nelia.

•   Telpokamej katli kichichinaj, uelis nima momatisej kitekiuisej. Ixtlamatinij kiijtouaj marihuana uelis kiijtlakos motsontekuich uan kichiuas tlauel xitlailkaua.

•   Nopa Administración de Servicios de Salud Mental uan Abuso de Sustancias de los Estados Unidos, kiijtoua: “Ixtlamatinij kiitstokej katli kichichinaj marihuana nima mokualaniaj ininuaya sekinok, amo kikixtiaj kuali calificaciones, amo kuali tekitij uan amo yolpakij”.

   “Nijnekiyaya nijchichinas marihuana pampa nimoiljuiyaya kiampa amo tlauel nimoyolkuesoskia. Pero kema nimoiljuik nima nimomatiskia, nijsojsoloskia tomij uan kenijkatsa nechtlanauiskia, amo nijchijki pampa nikitak nopa kichiuaskia más ma nimoyolkueso” (Judah).