Apóstol Pablo kiijkuilok: “Kema nijneki nijchiuas tlen kuali, nikita más nechyoltilana nijchiuas tlen amo kuali” (Romanos 7:21). Tlaj ta nojkia kiampa mitspano, ni tlamachtili mitspaleuis amo xijchiua tlen mitsyoltilana.

•  Tlen moneki tijmatis

•  Tlen uelis tijchiuas

•  Tlen kiijtouaj sekinok telpokamej

 Kema sekinok mitstetsopaj uelis tijnekis tijchiuas tlen mitsyoltilana. Biblia kiijtoua: “Tlaj se akajya mouika iuaya se katli amo kuali monejnemiltia, ayokmo kichiuas nopa kuali tlamantli tlen momajtoya kichiua” (1 Corintios 15:33). Kema sekinok peuaj mitstetsopaj, uelis peuas mitsyoltilanas tlen amo kuali o uelis kichiuasej xijchiua kej inijuantij (Éxodo 23:2).

 “Kema timotetsopa pampa tijneki tikinyolpakiltis sekinok o pampa tijneki kuali timouikas ininuaya, uelis peuas tijchiuas kej inijuantij uan tlen inijuantij kinekij” (Jeremy).

 Ximoiljui ni: ¿Kenke tlauel ouij tijmatis amo tijchiuas tlen mitsyoltilana tlaj tlauel mitstekipachoua kej sekinok mitsitaj? (Proverbios 29:25).

 Xikilnamikto: Nochipa xijchiua tlen Biblia kiijtoua uan amo xijkaua ma mitstetsopakaj katli ininuaya timomachtia.

 Xijchiua tlen tijneltoka. Tlaj amo timotemachia ipan tlen tijneltoka, uelis tielis kej se títere uan sekinok kiijtosej tlen monekis tijchiuas. Tlauel mitspaleuis tlaj tijchiuas tlen Biblia kiijtoua: “Kuali xikitakaj nochi tlamantli uan ximotlatskilikaj ika tlen kuali” (1 Tesalonicenses 5:21). Tlaj kuali tijkuamachilia tlen tijneltoka, amo ouij tijmatis timoyakanas ika tlen Biblia kiijtoua uan amo tijnekis tikixpanos Jehová.

 Ximoiljui ni: ¿Kenke timoiljuia tlauel ipati tijneltokas Dios itlanauatiljuaj?

 “Nikitstok kema nijneltoka tlen Biblia kiijtoua uan amo nijchiua tlen nechyoltilana sekinok más nechtlepanitaj” (Kimberly).

 Se neskayotl tlen nesi ipan Biblia: Daniel. Kema nojua eliyaya piltelpokatsi, ya mosentlalik “ipan iyolo” kineltokas uan kitlepanitas itlanauatiljuaj Dios (Daniel 1:8).

 Xikita tlen mitsyoltilana. Biblia kiijtoua tlen nopa “tlamantli tlen kinyoltilana telpokamej”, kiijtosneki kema piltelpokatsitsij kinyoltilana kichiuasej tlen amo kuali (2 Timoteo 2:22). Uan amo san kema tijnekis timotekas iuaya se akajya, nojkia tijnekis tijchiuas tlen inijuantij kichiuaj uan timonauatis moselti.

 Ximoiljui ni: Biblia kiijtoua “Sejse maseuali kiyejyekoua tlen kiyoltilana uan kimasiltia” (Santiago 1:14). Uan ¿ta tlake tlamantli tlauel mitsyoltilana?

 “Moneki kuali tijmatis tlake tlamantli tlauel mitsyoltilana. Xijtemo tlamachtili tlen mitspaleuis tikixnamikis tlen mitsyoltilana uan xikijkuilo se keski tlamantli. Kiampa kema sampa tikixnamikis tlen mitsyoltilana tijmatis tlake tijchiuas” (Sylvia).

 Se neskayotl tlen nesi ipan Biblia: David. Kemantika kichijki tlen kiiljuijkej sekinok uan nojkia tlen itlajtlakolchijkanakayo kinekiyaya. Maske mokuapolok kichijki kampeka ayokmo kiampa kichiuas. Uan kiiljuik Jehová: “NoTEKO Dios, xijchiua para noyolo ma eli yankuik uan tlapajpaktik. Xijchiua para ma nimoyoliljuis san ipan tlamantli tlen kuali, uan para ma nijnekis nijchiuas san tlen xitlauak” (Salmo 51:10).

 Xijtlapejpeni tlen tijchiuas. Biblia kiijtoua: “Amo xijkaua ma mitstlani tlen amo kuali” (Romanos 12:21). Kiijtosneki amo tijkauas ma mitsyoltilana tlen amo kuali. San ta uelis tijtlapejpenis tijchiuas tlen kuali.

 Ximoiljui ni: ¿Tlake mitspaleuis tijchiuas tlen kuali kema mitsyoltilanas tlen amo kuali?

 “Nimoiljuia kenijkatsa nimomachilis tlaj nijchiuas tlen nechyoltilana. ¿Kuali nijyolmatis? Uelis kena, pero san se tlatoktsi. Uan ¿kema ya panotos se keski tonali? Nojua tlauel nimoyolkokojtos. Uajka ¿nechpaleuis tlaj nijchiuas? Amo” (Sophia).

 Se neskayotl tlen nesi ipan Biblia: Pablo. Maske kinekiyaya kichiuas tlen amo kuali, ya monauatiyaya. Yeka kiijtok kinauatiyaya itlakayo uan kichiuayaya kej itlatekipanojka (1Corintios 9:27).

 Xikilnamikto: Kema tikixnamikis tlen mitsyoltilana san ta tijmatis tlaj tijchiuas o amo.

 Xikilnamiki tlen nama mitsyoltilana san panos. Melissa, katli kipia 20 xiuitl kiijtoua: “Kema nieliyaya nipilichpokatsi nechyoltilanayaya miak tlamantli uan nama nikita amo tlauel ipati”. Nojua kiijtoua: “Nijmati nopa tlamantli tlen nama nechyoltilana nojkia panos. Teipa kema nikilnamikis amo nijchijki tlen nechyoltilanayaya tlauel niyolpakis pampa amo nitlaixpanok”.