Uelis nochi mouampoyouaj kipiaj redes sociales uan san ya nopa kiijtojtokej. Uan uelis mitspinajtiaj pampa ta amo tijpia. ¿Tlake moneki tijmatis tlen redes sociales? ¿Uan tlake uelis tijchiuas?

 Amo san ta kiampa mitspano. Miakej tetajmej amo kinkauiliaj ininkoneuaj ma kipiakaj redes sociales. Uelis amo mitskauaj pampa kimatij katli kipiaj redes sociales, kinpano ni tlamantli:

•   mokuesouaj miak tonali uan kipiaj sekinok kokolistli ipan inintlalnamikilis.

•   kiitaj pornografía, motitlaniliaj tlaixkopinkayomej o videos kampa nesi kichijtokej tlamantli tlen tlauel amo kuali (sexting) uan kinpinajtiaj ipan internet (ciberacoso).

•   mokualaniaj ininuaya ininuampoyouaj.

 Miakej telpokamej ayokmo kitekiuiaj redes sociales. Kiitakej tlauel kintlanauiyaya kema kitekiuiyayaj. Xikita tlen kinpanok se keskij:

•   Priscilla kiitak tlauel motonalpolouayaya kema kitekiuiyaya redes sociales.

•   Jeremy ayokmo kipaktik pampa san nima ualnesiyaya tlamantli tlen amo kuali.

•   Bethany san kiitayaya tlen sekinok kichiuayayaj.

 “Nikixpolok nopa red social tlen nijtekiuiyaya. Uan tlauel kuali pampa kiampa nijchijki, pampa amo nijtemoua. Nama ueli nijchiua tlen tlauel ipati” (Sierra).

 “Nima nimomatki nijtekiuis redes sociales uan kemantika nechtekipachouayaya tlen sekinok ueliskiaj moiljuisej kema kiitaskiaj tlen nijtlaliyaya. Nopa amo nechpaktik. Ouij nijmatki nikixpolos nopa red social pero nijmatki tlauel nechpaleuik. Nama kuali nijyolmati” (Kate).

 Xijtlepanita tlen motatauaj mitsnauatiaj. Xijnexti ya titlalnamiktok, yeka tijchiua tlen mitsnauatiaj uan amo tikualani.

 Texto tlen mitspaleuis: “Se tlen uiuitik kuatsajtsi uan kinextia nochi ikualankayo, pero se tlen tlalnamiki moijiyouia uan moyoltlalia” (Proverbios 29:11).

 Uelis se akajya mitsiljuis xikichtakapia se red social uan amo xikiniljui motatauaj. ¡Amo kuali tlaj kiampa tijchiuas! Tlaj amo tikiniljuis motatauaj, uelis timajmajtos uan amo kuali tijyolmatis. Uan tlaj kimatisej tlen tijchijtok, tijpias kuesoli ika motatauaj uan ayokmo motemachisej ipan ta.

 Texto tlen mitspaleuis: “Tinemij xitlauak iixpa uan keja nopa tijnekiskiaj tijchiuasej nochipa” (Hebreos 13:18).

 Ta xijtlapejpeni tlen tijchiuas. Kej kiijtojkej sekij telpokamej ipan ni tlamachtili, ta nojkia xikita kenke amo mitspaleuis tlaj tijtekiuis redes sociales. Uan tlaj ya tikitak amo mitspaleuia, amo xijtekiui. Kiampa ta tijtlapejpenis tlaj amo tijtekiuis redes sociales uan amo motatauaj. Uan tlaj sekinok telpokamej mitstlatsintokisej tlaj tijpia redes sociales, amo tipinauas tikijtos amo tijpia, uan uelis amo mitspinajtisej.

 Uelis tikijtosej: Xijtlepanita tlen motatauaj mitsiljuiaj. Ximoiljui tlake sanse tlamantli inmechpaleuiskia, kiampa tlen kitlapejpenisej, nojkia tijnekis tijtlapejpenis. Xikilnamiki, amo tleno mitspanos tlaj amo tijtekiuis redes sociales.