Ipan ni tlamachtili tikitasej:

•  ¿Tlake kiijtosneki tikisas iuaya se akajya?

•  ¿Ya uelis tikisas iuaya se akajya?

 Se keskij maseualmej kisaj iuaya se akajya san pampa kinekij moyolpakiltisej. Pero ipan ni tlamachtili nopa tlajtoli “tikisas” kiijtosneki kema se tlakatl uan se siuatl kisaj pampa kinekij kuali moixmatisej uan kiitasej tlaj kena o amo uelis mosenkauasej. Uajka, kema tikisas iuaya se akajya eli pampa tijneki timosenkauas uan amo san pampa tijneki timoyolpakiltis.

 Kej panotias tonali, moneki tikitas tlaj timosenkauas o ayokmo tijnekis tinemis iuaya. Yeka moneki kuali tijmajtos uelis panos se tlen nopa ome tlamantli.

 Tlen tikitstokej: Tlaj timoiljuia ya uelis tikisas iuaya se akajya uajka nojkia kiijtosneki ya uelis timosenkauas.

 Kema tikisa iuaya se akajya uelis kichiuas ximosenkaua, yeka moneki kuali tikitas tlake kuajkuali tlamantli tijnextia uan kenijkatsa uelis kipaleuis katli tikixtoka. Ni tlamantli uelis mitspaleuis:

•   Kej timouika ininuaya mochampoyouaj. Kej timouika ininuaya motatauaj uan moikniuaj kema tlauel timotetsoptok, kinextia kenijkatsa tielis iuaya monamik.

   Texto tlen mitspaleuis: “Ayok ximoyolkuitlamakakaj. Ayok ximochiuakaj inyolkentsitsij. Ayok xikualanikaj. Ayok xikualankatlauejchiuakaj. Ayok xitetlaijiljuikaj. Ayok xitekokolikaj” (Efesios 4:31).

   Ximotlajtlani: “¿Kiijtoskiaj notatauaj uan noikniuaj nikintlepanita? Kema amo nechpaktia se tlamantli ¿nima nikualani uan nikinkualankanojnotsa?”.

•   Ximoiljui ipan sekinok. Kema tijpia monamik, moneki timoiljuis ipan tlen mosiua o moueue kineki kichiuas uan ayokmo san ipan ta.

   Texto tlen mitspaleuis: “Axaka ma kitemo tlen kuali para ya iselti, pero ma tijchiuakaj tlen kinpaleuis sekinok” (1 Corintios 10:24).

   Ximotlajtlani: “¿Nochipa nijneki ma kichiuakaj tlen na nikijtoua? ¿Kenijkatsa kiitaj sekinok tlen nijchiua? ¿Nijnextia nikachtouitlalia tlen sekinok kinekij uan amo san tlen na nijneki?”.

•   Amo ximoueyimati. Katli mosenkajtokej kimatij kemantika mokuapolouaj, yeka moneki kitlajtlanisej ininnamik ma kintlapojpoljui.

   Texto tlen mitspaleuis: “Nochi titlakamej [miakpa] timokuapolouaj” (Santiago 3:2).

   Ximotlajtlani: “¿Nima nikijtoua kema nimokuapoloua o san nimotechtia? ¿Nikualani o nimoyolkokoua kema nechiljuiaj ma nijpatla se keski tlamantli?”.

•   Kuali xijtekiui tomij. Se akajya katli kitekiuia tomij kej kinamiki, amo kipias kuesoli iuaya inamik ika nopa tlamantli.

   Texto tlen mitspaleuis: “Intla se tlen inmojuantij kineki kichiuas se ueyi kali, uajka achtoui moseuis uan kipouas keski tomij monekis para kimatis intla kiaxilia para kitlamiltis” (Lucas 14:28).

   Ximotlajtlani: “¿Kuali nijtekiuia tomij o nochipa nitlauikatinemi? ¿Kenijkatsa nijnextijtok kuali nijtekiuia tomij?”.

•   Kuali xitlaneltoka. Tlaj tieli se Jehová itlajtoltemajka, moneki mojmostla tijpouas, timomachtis Biblia uan tias tlanechikoli.

   Texto tlen mitspaleuis: “Pakij katli kimatij moneki momachtisej toTeotsij iTlajtol” (Mateo 5:3).

   Ximotlajtlani: “¿Nijchiua kampeka nimomachtis pampa nijneki kuali nitlaneltokas? ¿Nikachtouitlalia nimomachtis o nijkaua sekinok tlamantli ma nechtsakuili?”.

 Tlen tikitstokej: Katli iuaya timosenkauas moneki kiitas ta ya timokualchijchijtok. Tlaj kiampa tijchiua uelis tijpantis se akajya katli nojkia kiampa kichiua.