Se tlajtlakoli eli kema se akajya kichiua, kiyolmati o moiljuia se tlamantli tlen toTeotsij amo kipaktia (1 Juan 3:4; 5:17). Biblia kiijtoua se akajya tlajtlakolchiua kema kichiua se tlamantli tlen amo kuali o tlen amo kinamiki, o kema amo kichiua tlen xitlauak (Santiago 4:17).

 Ipan tlajtoli tlen kiijkuilojkej Biblia, nopa tlajtoli “tlajtlakoli” kiijtosneki kema se akajya amo kiasi se tlamantli kema kimotla. Se neskayotl, Biblia kiijtoua uejkajkia, se keskij israeleuanij katli tlateuiyayaj kuali kitekiuiyayaj teuitlatstli, uan kema tlamotlayayaj kiasiyayaj “tlen ueli”. Tlaj kitlajtolkuepaskiaj tlen kiijtosneki, kitlaliskiaj: “amo tlajtlakolchiuayayaj” (Jueces 20:16, Nueva Biblia Española). Uajka kema se akajya tlajtlakolchiua, kejuak amo kiasi tlen kiijtoua toTeotsij itlanauatiljuaj.

 ToTeotsij eli katli kichijchijki nochi tlen onka, uajka kinamiki kiijtos tlake moneki kichiuasej maseualmej (Apocalipsis 4:11). Uan kinamiki tikiljuisej nochi tlen tijchiuaj (Romanos 14:12).

¿Uelis se akajya amo kema tlajtlakolchiuas?

 Amo, pampa Biblia kiijtoua “nochi tlakamej tlajtlakolchijtokej. Axaka senkistok kuali keja toTeko tlen nelia kuajkualtsi hasta kipia itlatlanex” (Romanos 3:23; 1 Reyes 8:46; Eclesiastés 7:20; 1 Juan 1:8). Uajka, ¿kenke titlajtlakolchiuaj?

 Achtouia Adán uan Eva amo tlajtlakolchiuayayaj pampa eliyayaj xitlauakej, sanse kej toTeotsij (Génesis 1:27). Uan kema kiixpanokej toTeotsij, inijuantij ayokmo elkej xitlauakej (Génesis 3:5, 6, 17-19). Kema kinpixkej ininkoneuaj kinpanoltilijkej nopa tlajtlakoli kej se kokolistli (Romanos 5:12). Tlanauatijketl David kiijtok: “Na ipa nitlajtlakolchijketl hasta kema nitlakatki” (Salmo 51:5).

¿Onka tlajtlakoli tlen amo kuali uan tlen tlauel amo kuali?

 Kena. Biblia kiijtoua uejkajkia maseualmej katli itstoyaj ipan Sodoma “kipixkej ininyolis tlen tlauel fiero” uan inintlajtlakoljuaj eliyayaj tlauel amo kuali (Génesis 13:13; 18:20). Ma tikitakaj eyi tlamantli tlen kinextia tlake eli se ueyi tlajtlakoli.

1.   Tlen eli se ueyi tlajtlakoli. Biblia kiijtoua eli se ueyi tlajtlakoli kema se akajya momekatia, kinueyichiua teteyomej, tlachteki, moiuintia, tekajkayaua, temiktia uan kema tetlajchiuia, yeka amo kinamiki tijchiuasej yon se tlen ni tlamantli (1 Corintios 6:9-11; Apocalipsis 21:8). Biblia kiijtoua ni amo eli sanse kej kema se akajya kichiua se tlajtlakoli maske amo kinekiyaya kichiuas. Se neskayotl, kema se akajya kiijtoua o kichiua tlen kiyolkokoua se maseuali (Proverbios 12:18; Efesios 4:31, 32). Maske amo eli se ueyi tlajtlakoli kema kiampa pano, Biblia kiijtoua moneki timomokuitlauisej uan kiampa amo tijchiuasej se ueyi tlajtlakoli (Mateo 5:27, 28).

2.   Kenke mochiua se tlajtlakoli. Se keskij tlajtlakolchiuaj pampa amo kimatij tlen toTeotsij tlanauatia (Hechos 17:30; 1 Timoteo 1:13). Biblia kiijtoua ni nojkia eli se tlajtlakoli maske amo eli sanse kej kema tlajtlakolchiua se akajya katli kiixmati toTeotsij itlanauatiljuaj (Números 15:30, 31). Biblia kiijtoua kema se akajya tlajtlakolchiua maske ya kimati toTeotsij itlanauatiljuaj, amo kipia kuali iyolo (Jeremías 16:12).

3.   Imiaka. Biblia kiijtoua amo eli sanse kema se akajya tlajtlakolchiua uan kema kichiua miakpa nopa tlajtlakoli (1 Juan 3:4-8). ToTeotsij ayokmo kuali kinita nopa maseualmej katli kinekij nojua tlajtlakolchijtosej maske kimatij ya amo kipaktia (Hebreos 10:26, 27).

 Katli kichijtokej se tlajtlakoli, uelis tlauel moyolkokouaj. Kej tlanauatijketl David, ya kiijkuilok: “Notlajtlakoljuaj nopan uetstok [...]. Eltok keja se tlamamali tlauel etik tlen axueli nikijiyouia” (Salmo 38:4). Maske kiampa kiyolmatij, Biblia kiijtoua: “Nochi tlajtlakolchijkatlakamej ma kikauakaj nopa fiero ojtli tlen kitokiliaj uan ipan inintlalnamikilis ma kikixtikaj nochi tlamantli tlen axkuali tlen yajuantij moiljuiaj, uan ma mokuepakaj noka na niDios niinmoTeko. Uan na temachtli nikintlasojtlas uan nikintlapojpoljuis” (Isaías 55:7, Traducción en lenguaje actual).