Kena uelis mitspaleuis pampa eli toTeotsij iTlajtol uan ya kinyoltlalia katli mokuesouaj (2 Corintios 7:6). Maske Biblia amo eli se amochtli tlen kiijtoua kenijkatsa timopajtisej, kena kinpaleuijtok miakej maseualmej ayokmo ma moiljuikaj kinekij momiktisej. Tlen tetlajtolmaka nojkia uelis mitspaleuis ta.

•  ¿Tlake kiijtoua Biblia uelis tijchiuasej?

•  ¿Kiijtoua Biblia inintoka se keskij katli kinekiyayaj mikisej?

•  ¿Tlake textos tlen Biblia uelis mitspaleuis ayokmo tijnekis timomiktis?

•  ¿Tlake uelis tijchiuasej tlaj se touampo techiljuia kineki momiktis?

•  ¿Tlake uelis nijchiuas tlaj uejkajkia nechka nimomiktia?

• ● Xikijto tlen tijyolmati.

   Tlen Biblia kiijtoua: “Se tlen tokualuampo temachtli techiknelia nochipa. Kema onka tlaouijkayotl techpaleuia keja eliskia se toikni” (Proverbios 17:17).

   Tlen kiijtosneki: Kema techtekipachoua se keski tlamantli, tijnekij ma techpaleuikaj.

   Tlaj amo aka tikiljuia tlen tijyolmati, uelis teipa ayokmo tikijiyouis tlen mitspano. Uan tlaj tijpouilia se akajya tlen timoiljuia, uelis achi kuali tijyolmatis uan tikitas kej kinamiki tlen mitskuesoua.

   Xijchiua ni: Xikamanalti nimantsi iuaya se akajya, uelis se tlen mochampoyouaj o se kuali mouampo. a Nojkia uelis tikijkuilos tlen tijyolmati.

• ● Xia kampa se tepajtijketl.

   Tlen Biblia kiijtoua: “Se tetikatlakatl axkineki se tepajtijketl, pero se kokoxketl, kena” (Mateo 9:12).

   Tlen kiijtosneki: Kema timokokouaj moneki tiasej ika se tepajtijketl.

   Kema se akajya kineki momiktis, uelis kiampa kineki kichiuas pampa kipia se kokolistli ipan itsonteko o amo kuali kiyolmati. Kema tijpiaj se kokolistli ipan totlakayo amo tipinauaj tikijtosej, nojkia amo kinamiki tipinauasej tlaj tikijtosej tijpiaj se kokolistli ipan totsonteko o amo kuali tijyolmatij. Maske uelis kiampa techpano, onka se keski tlamantli tlen ika uelis timopajtisej.

   Xijchiua ni: Nima xijtemo se tepajtijketl katli uelis kuali mitspaleuis.

• ● Xikilnamiki toTeotsij tlauel mitspatiita.

   Tlen Biblia kiijtoua: “Yonke kinnamakaj makuili piltototsitsij para ome centavos, toTeko axkiilkaua niyon se tlen inijuantij [...]. Uajka amo ximomajmatikaj. Achi más inmopati iixtla toTeko que miakej totomej” (Lucas 12:6, 7).

   Tlen kiijtosneki: ToTeotsij tlauel mitspatiita.

   Maske tijyolmati moselti tiitstok, nopa amo nelia. ToTeotsij kimati tlen mitspanotok. Uan maske ayokmo tijneki tiitstos, toTeotsij kitekipachoua tlen mitspano. Salmo 34:18 kiijtoua: “ToTeko itstok ininnechka tlakamej tlen mokuesouaj. Uan kinmakixtia”. Uelis timotemachis toTeotsij kineki nojua xiitsto pampa ya tlauel mitsiknelia.

   Xijchiua ni: Xijtemo ipan Biblia se keski tlamantli tlen kinextia toTeotsij tlauel mitsiknelia. Se neskayotl, nopa tlamachtili 24 tlen amochtli Acerquémonos a Jehová, uelis mitspaleuis.

• ● Xikiljui toTeotsij ma mitspaleui.

   Tlen Biblia kiijtoua: “Xikiljuikaj toTeko nochi inmokuesol uan xijkauakaj imako, pampa yajaya inmechmokuitlauia” (1 Pedro 5:7).

   Tlen kiijtosneki: ToTeotsij kineki xikiljui nochi tlen tijyolmati uan mitstekipachoua.

   ToTeotsij uelis mitsmakas tlaseuilistli uan mitsyolchikauas uan kiampa nojua tikijiyouijtos tlen mitspano (Filipenses 4:6, 7, 13). Kiampa kichiua toTeotsij kema kinpaleuia katli kinechkauiaj (Salmo 55:22).

   Xijchiua ni: Namantsi xikiljui toTeotsij ma mitspaleui. Xijtekiui itoka, Jehová, uan xikiljui tlen tijyolmati (Salmo 83:18). Xikiljui ma mitspaleui nojua tikijiyouis tlen mitspano.

• ● Ximoyoliljui ipan nopa tlamantli tlen Biblia kiijtoua mochiuas teipa.

   Tlen Biblia kiijtoua: “Tlen tijchiaj tijselisej eli kejuak se tepostli tlen moatsintlanoua, tlen nelia temachtli uan tetik” (Hebreos 6:19, TNM).

   Tlen kiijtosneki: Tlen tijyolmati uelis kichiuas kemantika kuali tiitstos uan kemantika amo, kej kema se barco kiixnamiki se chikauak ajakatl. Maske kiampa mitspano, tlen Biblia kiijtoua mochiuas teipa, uelis kichiuas kuali xijyolmati.

   Ni tlamantli nelia melauak mochiuas pampa toTeotsij kiijtojtok kitsontlamiltis nochi tlen techtlaijiyouiltia (Apocalipsis 21:4).

   Xijchiua ni: Xikita sekinok tlamantli tlen Biblia kiijtoua mochiuas teipa ipan nopa tlamachtili 5 tlen nopa pilamochtsi ¡ToTeotsij techmaka kuali tlamachtili!

• ● Xijchiua se tlamantli tlen mitspaktia.

   Tlen Biblia kiijtoua: “Yolpakilistli tepaleuia keja eliskia se kuali pajtli” (Proverbios 17:22).

   Tlen kiijtosneki: Kema tijchiuaj se tlamantli tlen techpaktia, techpaleuia kuali ma tijyolmatikaj uan amo ma tijpiakaj se kokolistli ipan totsonteko.

   Xijchiua ni: Xijchiua se tlamantli tlen tijmati mitspaktia. Se neskayotl, xijkaki uikatl tlen mitsyolpakiltia, xijpoua tlen uelis mitsyolchikauas o xijtemo seyok tlamantli tlen tijchiuas. Nojkia uelis tiyolpakis tlaj tikinpaleuia sekinok maske ika se tlamantli tlen amo ueyi (Hechos 20:35).

• ● Xijmokuitlaui motlakayo.

   Tlen Biblia kiijtoua: “Intla tijkualchijchiuas motlakayo, kualtitok” (1 Timoteo 4:8).

   Tlen kiijtosneki: Tlaj tijchiuas ejercicio, kuali tikochis uan kuali titlakuas, mitspaleuis amo tlauel ximokoko.

   Xijchiua ni: Xia xinejnemiti chikauak maske san 15 minutos.

• ● Xikilnamiki uelis mopatlas tlen tijyolmati sanse kej mopatla sekinok tlamantli ipan monemilis.

   Tlen Biblia kiijtoua: “Axinkimatij niyon kentsi tlachke inmopantis mostla” (Santiago 4:14).

   Tlen kiijtosneki: Nochi tlamantli tlen techtekipachoua maske timoiljuiaj amo kema mosenkauas, teipa uelis tlamis.

   Maske timoiljuia tlauel ouij tlen tikixnamiki ipan ni tonali, teipa uelis ayokmo kiampa elis. Yeka, nojua xijchiua kampeka tikixnamikis tlen mitspano (2 Corintios 4:8). Tlen nama mitstekipachoua teipa uelis mopatlas, uan tlaj timomiktis ayokmo uelis tijpatlas.

   Xijchiua ni: Xijpoua ipan Biblia kenijkatsa se keskij maseualmej tlauel moyolkuesojtoyaj uan kinekiyayaj mikisej. Xikita kenijkatsa maske achtouia tlaijiyouiyayaj, teipa kuali itstoyaj. Ma tikitakaj se keski neskayotl.

 Kena. Biblia kiijtoua itstoyaj se keskij maseualmej katli kiijtojkej kinekiyayaj mikisej. ToTeotsij amo kualanki ininuaya uan kinpaleuik. Ya nojkia kineki mitspaleuis.

Elías

•  ● ¿Ajkia elki Elías? Maske eliyaya se tlajtolpanextijketl katli amo majmauiyaya, kemantika nojkia tlauel moyolkuesok. Santiago 5:17 kiijtoua Elías “nojkia elki se tlakatl keja tojuantij”.

•  ● ¿Kenke kinekiyaya mikis? Se tonali, Elías kiyolmatki iselti itstoya, majmajki uan moiljuik amo tleno ipati. Yeka kiijtok: “¡NoTeko! ¡Xinechkixtili noyolis!” (1 Reyes 19:4).

•  ● ¿Tlake kipaleuik? Elías kiiljuik toTeotsij nochi tlen kiyolmatiyaya. ¿Kenijkatsa kiyolchikajki Jehová? Kinextilik kitekipachouayaya tlen kipanoyaya uan nojkia kinextilik kenijkatsa ya kipia nochi chikaualistli. Nojkia kiiljuik tlauel kipatiitayaya uan kimakak se akajya katli kipaleuiskia uan kimokuitlauiskia.

•  ▸ Xijpoua tlen kipanok Elías: 1 Reyes 19:2-18.

Job

•  ● ¿Ajkia elki Job? Elki se tlakatl katli tlauel tlatominpiayaya uan kinpiayaya miakej ichampoyouaj. Nojkia elki se toTeotsij itekipanojka.

•  ● ¿Kenke kinekiyaya mikis? Inemilis Job sanima mopatlatiuetski. Kipolok nochi tlen kipixtoya, nochi ikoneuaj mijkej uan kipixki se kokolistli tlen tlauel amo kuali. Uan amo san ya nopa, se keskij tlakamej kitlaijiljuijkej uan kiiljuijkej ya itlajtlakol tlen kipanoyaya. Yeka, Job kiijtok: “Nikijia noyolis” (Job 7:16).

•  ● ¿Tlake kipaleuik? Job kiiljuik Jehová tlen kiyolmatiyaya uan nojkia kamanaltik ininuaya sekinok maseualmej (Job 10:1-3). Se kuali iuampo katli motokaxtiyaya Eliú, kiyolchikajki uan kipaleuik ma kiita tlen kipanoyaya kej kinamiki. Uan tlen tlauel ipati, Job kiselik itlapaleuil toTeotsij uan kikajki ma kiyakana.

•  ▸ Xijpoua tlen kipanok Job: Job 1:1-3, 13-​22; 2:7; 3:1-13; 36:1-7; 38:1-3; 42:1, 2, 10-13.

Moisés

•  ● ¿Ajkia elki Moisés? Moisés kinyakanki israeleuanij uan nojkia elki se tlajtolpanextijketl katli amo kema kitlauelkajki toTeotsij.

•  ● ¿Kenke kinekiyaya mikis? Moisés kipiayaya miak tekitl, ajachika kitlaijiljuiyayaj uan teipa tlauel siajki. Yeka kiiljuik toTeotsij: “Achi más kuali tinechmiktis” (Números 11:11, 15).

•  ● ¿Tlake kipaleuik? Moisés kiiljuik toTeotsij tlen kiyolmatiyaya. Uan ya kipaleuik amo tlauel ma motekimaka, kiampa amo tlauel motetsopaskia.

•  ▸ Xijpoua tlen kipanok Moisés: Números 11:4-6, 10-17.