Tlen Biblia kiijtoua

 Daniel elki se tlajtolpanextijketl judío katli itstoya ipan siglo séptimo uan sexto, kema ayamo ualayaya Jesús. ToTeotsij kipaleuik ma kimati tlake kiijtosnekiyaya tlen sekinok kitemikiyayaj, nojkia kejuak ipan se temiktli kipaleuik ma kiita tlen panoskia teipa uan ika itonal kipaleuik ma kiijkuilo nopa amochtli tlen kiuika itoka (Daniel 1:17; 2:19).

¿Ajkia elki Daniel?

 Daniel moskaltik ipan Judá, nopaya eltoya altepetl Jerusalén uan nopa teokali. Ipan xiuitl 617 kema ayamo ualayaya Jesús, tlanauatijketl Nabucodonosor tlen Babilonia moaxkatik Jerusalén uan kinuikak nopa tlakamej tlen más ininpati (2 Reyes 24:15; Daniel 1:1). Daniel, katli uelis eliyaya san se piltelpokatsi nojkia kiuikakej.

 Daniel, Sadrac, Mesac uan Abednego kinuikakej ichaj tlanauatijketl tlen Babilonia pampa nopaya kinmachtiskiaj kenijkatsa kuali kitekipanoskiaj nopa tlanauatijketl. Maske kintetsopayayaj pampa kinekiyayaj ma kichiuakaj tlen kiixpanoskia toTeotsij itlanauatiljuaj, Daniel uan eyij iuampoyouaj amo kitlauelkajkej Jehová (Daniel 1:3-8). Kema panotoya eyi xiuitl, tlanauatijketl Nabucodonosor kuali kinitak pampa inijuantij tlalnamikiyayaj uan ueliyayaj kichiuaj miak tlamantli, uan kiijtok inijuantij “kimatiyayaj hasta matlaktli ueltas más que ne tlalnamijkatlakamej tlen momachtijkej sitlalimej o kinkamauijkej ajakamej”. Yeka kikajki Daniel uan iuampoyouaj ma tekitikaj kampa ya tlanauatiyaya (Daniel 1:18-20).

 Teipa, kema Daniel kipixtoya kipano 90 xiuitl, kiiljuijkej monekiyaya yas kampa itstoya tlanauatijketl Belsasar, katli tlanauatiyaya Babilonia ipan nopa tonali. Nopa tlanauatijketl kiiljuik Daniel ma kiiljui tlake kiijtosnekiyaya nopa tlajtoli tlen neski ipan tlapepecholi. Jehová kipaleuik Daniel ma kiixtomili tlen kipanoskia Babilonia. Kiiljuik medopersiaeuanij kintlaniskiaj uan moaxkatiskiaj Babilonia uan kiampa panok ipan nopa youali (Daniel 5:1, 13-31).

 Tlanauatijketl tlen medopersa kimakak Daniel se tekitl tlen tlauel ipati uan tlanauatijketl Darío nojua kinekiyaya kitekimakas (Daniel 6:1-3). Sekinok tekichiuanij pejkej kikualankaitaj Daniel, yeka kichijkej ma kimajkauakaj kampa itstoyaj leones, maske kiampa kichijkej, Jehová kimanauik (Daniel 6:4-23). Uan kema ya ueuejtixtoya se iluikaejketl monextik iixtla uan kiiljuik: “ToTeko tlauel mitsiknelia” (Daniel 10:11, 19).

 Xikita tlen kipanok Daniel ipan tlanextilili tlen kipia ome tlaxeloli, tlen itoka “Daniel nochipa kuali tlaneltokak”.