Biblia amo tleno kiijtoua tlen Halloween o noche de brujas, se iljuitl tlen tlauel kiixmatij uan mochiua ipan octubre 31. Kej pejki uan tlen nopaya mochiua kiixpano tlen Biblia kiijtoua.

Ipan ni tlamachtili tikitasej:

•  ¿Kenijkatsa pejki Halloween uan tlake mochiua ipan nopa iljuitl?

•  ¿Kinamiki tijchiuasej nopa iljuitl maske amo mokixtijtok ipan Biblia?

•  ¿Tlake kiijtosneki Halloween?

•   Samhain: Nopa amochtli Mitos celtas kiijtoua kipano se dos mil xiuitl kema mochiuayaya iljuitl Samhain moiljuiyayaj “katli ya mijkej ueliyayaj nemij ipan Tlaltipaktli uan maseualmej ueliyayaj yauij kampa itstokej mijkatsitsij”. Nojkia kiijtoua: “Tlen mochiuayaya ipan iljuitl Samhain nojua mochiua ipan Halloween uan kema kiniljuichiuiliaj mijkatsitsij” a (xikita nopa recuadro “ ¿Tlake kiijtosneki Halloween?”).

•   Kema motlaliliaj máscaras, tlajtlantinemij dulces uan kema kiijtouaj xinechmaka dulces o nimitschiuilis se tlamantli: Se amochtli kiijtoua celtas motlaliliyayaj máscaras pampa “amo kinekiyayaj ma kinitakaj amo kuali ajakamej” b uan kinmakayayaj dulces pampa amo kinekiyayaj ma kinchiuilikaj tlen amo kuali.

   Nechka xiuitl 500-1500 kema ya ualajtoya Jesús, katli tlayakanayayaj ipan Iglesia católica ipan Europa pejkej kichiuaj iljuitl tlen amo uala ipan Biblia uan kiniljuijkej katli monechikouayayaj ininuaya ma motlalilikaj máscaras, ma yakaj tejtechaj uan ma teiljuikaj tlaj kinekiyayaj ma kinmaijtokaj mijkatsitsij, monekiyaya kinmakasej se tlamantli.

•   Itonal se akajya, vampiros, katli mokuepaj lobos, katli tetlajchiuiaj uan zombis: Ipan miak xiuitl kiijtojtokej ni tlamantli elij amo kuali ajakamej. Nopa amochtli Halloween Trivia kiniljuia “tekuanimej tlen elij kej amo kuali ajakamej” uan tlen kichiuaj “mouika ika mikilistli, mijkatsitsij uan katli kimakasij mikisej”.

•   Ayojtli tlen kitekiuiaj ipan Halloween: Ipan xiuitl 500-1500 kema ya ualajtoya Jesús, ipan Gran Bretaña maseualmej “yauiyayaj kajkalpa uan teiljuiyayaj ma kinmakakaj tlakualistli uan sekinok tlamantli tlaj kinekiyayaj ma kinmaijtokaj ininmijkauaj”. Kiuikayayaj “se nabo tlen nesiyaya kejuak se kamojtli, ijtikakauatik uan iijtiko kitlaliliyayaj se vela tlen kinixnextiyaya mijkatsitsij katli itstoyaj purgatorio” (Halloween—From Pagan Ritual to Party Night). Se keskij ixtlamatinij kiijtouaj nopa tlauili kinpaleuiyaya ma kinmajmatikaj amo kuali ajakamej. Uan ipan siglo 19, ipan Norte tlen América pejkej kitekiuiaj ayojtli pampa nima kiasiyayaj uan amo ouij kiijtiuauanayayaj.

 Amo. Maske miakej maseualmej moiljuiaj amo kenijki tlaj kichiuaj nopa iljuitl pampa nopaya san moyolpakiltiaj, tlen nopaya mochiua kiixpano tlen kiijtoua Biblia. Katli kichiuaj Halloween kineltokaj tlen amo melauak pampa moiljuiaj nojua itstokej mijkatsitsij uan amo kuali ajakamej.

 Ni versículos kinextia kenijkatsa kiita toTeotsij tlen mochiua ipan Halloween:

•   “Amo ma itsto inmouaya katli monojnotsa ininuaya amo kuali ajakamej uan mijkatsitsij” (Deuteronomio 18:10-12, Biblia de la Iglesia en América).

   Tlen kiijtosneki: ToTeotsij amo kineki ma timonojnotsakaj ininuaya mijkatsitsij yon ma tijchiuakaj kejuak tikinnojnotsaj.

•   “Tlen miktokej ayok tleno kimatij” (Eclesiastés 9:5).

   Tlen kiijtosneki: Katli miktokej ayokmo tleno kimatij, yeka amo uelij monojnotsaj ininuaya maseualmej.

•   “Axueli inkiisej ipan nopa taza tlen iaxka Toteko uan nojkia inkiisej ipan nopa tazas tlen eltokej iniixtla ajakamej” (1 Corintios 10:20, 21).

   Tlen kiijtosneki: Tlaj tijnekij timouampojchiuasej iuaya toTeotsij, moneki amo timonojnotsasej ininuaya amo kuali ajakamej.

•   “Ma tijtekiuikaj tlen Toteko techmakatok para ika timomanauisej uan para tijtlanisej Axkualtlakatl pampa [...] timoteuiaj ininuaya ajakamej tlen axkipiaj inintlakayo” (Efesios 6:11, 12).

   Tlen kiijtosneki: Cristo itokilijkauaj moneki kintlanisej amo kuali ajakamej uan amo kichiuasej kejuak mauiltiaj ininuaya.