Kema Jesús ayamo itstoya Tlaltipaktli uan kema tlakuepilik iluikak, Biblia kitokaxtia Miguel uan sekij religiones kiiljuiaj “san Miguel”. a Biblia kiijtoua Miguel mokualanik iuaya Satanás teipa kema mijki Moisés, uan kipaleuik se iluikaejketl ma yaui kampa tlajtolpanextijketl Daniel uan ma kiiljui tlen toTeotsij kinekiyaya kimatiltis (Daniel 10:13, 21; Judas 9). Miguel nochipa kinextia san Jehová kinamiki tlanauatis uan moteuia ininuaya toTeotsij ikualankaitakauaj. Yeka, kinamiki ma kitokaxtikaj Miguel, tlen kiijtosneki “¿Ajkia kej toTeotsij?” (Daniel 12:1; Apocalipsis 12:7).

 Ma tikitakaj kenke tikijtouaj Jesús eli nopa tlayakankailuikaejketl Miguel.

•   Miguel yaya “itlayakankailuikaejka toTeko” (Judas 9). Nopa tlajtoli tlayakankailuikaejketl kiijtosneki “katli kinyakana iluikaeuanij”, uan ipan Biblia san nesi ipan ome versículos. Kej moijkuilok nopa tlajtoli kinextia san setsi iluikaejketl uelis kiampa kitokaxtisej. Se texto kiijtoua kema Jesús, nopa tlayakankailuikaejketl ya moyolkuitos, “tsajtsis ika ueyi tlanauatili uan ualtemos tlen iluikak. Uan [...] kamatis nelia chikauak” (1 Tesalonicenses 4:16). Ni texto kinextia Jesús kamanalti “ika ueyi tlanauatili”. Yeka uelis tikijtosej Jesús eli Miguel katli kinyakana iluikaeuanij.

•   Miguel kinyakana itlateuijkauaj. “Miguel, uan nopa iluikaeuanij tlen yajaya kinyakanayaya moteuijkej iuaya nopa dragón” o Diablo (Apocalipsis 12:7). San ya kipia tlanauatili ika iluikaeuanij. Ipan Biblia kitokaxtia “se ueyi tlayakanketl tlen iiluikaejkauaj toTeko” uan “nopa ueyi iluikaejketl” (Daniel 10:13, 21; 12:1). Ni tokajyotl kinextia Jesús eli “katli kinyakana iluikaeuanij”. David Aune katli tlauel momachtijtok nopa Nuevo Testamento kiampa kiijtok.

   Biblia san kitekiuia seyok tokajyotl kema kiijtoua se akajya kipia tlanauatili ika iluikaeuanij. Nopaya kiijtoua “Jesucristo moualnextiki tlen iluikak iuaya iiluikaejkauaj tlen kipiaj uejueyi chikaualistli. Ualas ipan tlitl tlen kipias miak tlixochitl” (2 Tesalonicenses 1:7, 8; Mateo 16:27). Nojkia ipan 1 Pedro 3:21, 22 kiijtoua, Jesucristo “yajtok iluikak [...]. Uan nopano kichiuaj ipakilis nochi iluikaeuanij uan nojkia yajuantij tlen inintoka tlen kipiaj tekiuejkayotl uan tlen kipiaj chikaualistli”. Uajka tlen tikitstokej kinextia toTeotsij amo kitekimakatok Jesús ma kinyakana se keskij iluikaeuanij uan Miguel sekinok. Yeka tikijtouaj Jesús uan Miguel elij sanse.

•   Miguel “motlalanas” kema “onkas tlaijiyouilistli tlen más ueyi” (Daniel 12:1). Kema ipan Daniel motekiuia nopa tlajtoli “motlalanas” kiijtosneki kema se tlanauatijketl peua kichiua se tlamantli tlen tlauel ipati (Daniel 11:2-4, 21). Jesucristo, katli nojkia kiiljuiaj “iTlajtol toTeko”, elis “Tlanauatijketl tlen nochi tlanauatianij” uan kiampa kintsontlamiltis toTeotsij ikualankaitakauaj uan kinmanauis itekipanojkauaj (Apocalipsis 19:11-16). Kiampa kichiuas kema “onkas se ueyi tlaijiyouilistli keja tlen axkema onkatok hasta kema pejki Tlaltipaktli. Uan axkema onkas seyok kej ni” (Mateo 24:21, 42).