Kemantika, Biblia kiijtoua Jesús eli ‘iKone toTeko’ (Juan 1:49). Nopa tlajtoli ‘iKone toTeko’ kinextia toTeotsij eli tlachijchijketl uan katli temaka yolistli, ni kiijtosneki yaya kichijchijki Jesús (Salmo 36:9; Apocalipsis 4:11). Biblia amo kiijtoua toTeotsij kitlakatiltik Jesús kej maseualmej kintlakatiltiaj ininkoneuaj.

 Biblia nojkia kiijtoua iluikaeuanij elij toTeotsij ikoneuaj (Job 1:6). Uan nojkia kiijtoua nopa achtoui tlakatl Adán “eliyaya ikone toTeko” (Lucas 3:38). Biblia kiijtoua toTeotsij tlauel kiiknelia iKone Jesús pampa ya achtoui kichijchijki uan amo aka kipaleuik.

•  ¿Jesús ipa itstoya ne iluikak kema ayamo ualajtoya ipan Tlaltipaktli?

•  ¿Tlake kichiuayaya Jesús ne iluikak kema ayamo ualajtoya ipan Tlaltipaktli?

 Kena. Kema Jesús ayamo ualajtoya ipan Tlaltipaktli itstoya iluikak uan eliyaya se iluikaejketl. Ya kiijtok: “Niualtemok” tlen iluikak (Juan 6:38; 8:23).

 ToTeotsij achtoui kichijchijki Jesús. Biblia techiljuia se keski tlamantli tlen Jesús:

•   Jesús ipa itstoya “kema aya tleno onkayaya tlen tlachijchiuali” (Colosenses 1:15).

•   Ya eli “katli toTeotsij achtoui kichijchijki” (Apocalipsis 3:14, TNM).

 Jesús kiaxitik tlen kiijtok Miqueas, nopa tlajtolpanextili kiijtouayaya itstoya se akajya tlen “nejnentiualajtok uejkajkia” (Miqueas 5:2; Mateo 2:4-6).

 Ipan iluikak kipixtoya se tekitl tlen tlauel pankisayaya. Jesús kiilnamikiyaya nopa tekitl kema kiiljuik toTeotsij: “Sampa xinechmaka nopa ueyitilistli tlen nijpixtoya achtouia kema aya onkayaya Tlaltipaktli uan niitstoya nepa mouaya” (Juan 17:5).

 Jesús kipaleuik iTata kichijchiuas nochi tlen onka. Jesús tekitik iuaya toTeotsij “kej se kuali tekitiketl” (Proverbios 8:30). Biblia kiijtoua tlen Jesús: “ToTeko kitekimakak Cristo ma kichijchiua nochi tlen onka ipan iluikak uan ipan Tlaltipaktli” (Colosenses 1:16).

 ToTeotsij kitekiuik Jesús kema kichijchijki nochi tlen onka ipan iluikak uan ipan Tlaltipaktli (Apocalipsis 5:11). Uelis tikijtosej kema tekitikej sansejko toTeotsij uan Jesús eli kej kema tekitij sansejko se arquitecto iuaya se kalchijketl. Nopa arquitecto kichiua se tlaixkopinkayotl tlen se kali uan nopa kalchijketl kichijchiua.

 Eliyaya Tlajtoli. Kema Jesús ayamo ualajtoya ipan Tlaltipaktli, Biblia kitokaxtiyaya “Tlajtoli” (Juan 1:1). Ni kiijtosneki Jehová kitekiuik iKone ma kinmatilti sekinok iluikaeuanij tlen monekiyaya kimatisej uan tlen kichiuasej.

 ToTeotsij nojkia kitekiuik Jesús ma kinmatilti maseualmej se keski tlamantli. Uelis, Jehová kitekiuik Jesús kej Tlajtoli kema kiniljuik Adán uan Eva tlen monekiyaya kichiuasej ipan Xochimili Edén (Génesis 2:16, 17). Uelis Jesús nojkia elki nopa iluikaejketl katli kinyakanki israeleuanij kema kiixkotonkej nopa uaktok tlali uan monekiyaya kichiuasej tlen kiniljuiyaya (Éxodo 23:20-23). a