¿Kenijkatsa nesiyaya Jesús?
Tlen Biblia kiijtoua
Amo aka kimatiyaya kenijkatsa nesiyaya Jesús pampa ipan Biblia amo kiijtoua. Ni kinextia amo eli tlauel ipati kej nesiyaya. Maske amo kiijtoua, kena techiljuia se keski tlamantli tlen techpaleuis ma timoiljuikaj kenijkatsa nesiyaya Jesús.
Kej nesiyaya: Inana eliyaya judía uan yeka Jesús tlachiayaya kej ya (Hebreos 7:14). Jesús sanse tlachiayaya kej nopa sekinok maseualmej, yeka se tonali kema yajki Jerusalén amo aka kiixmatki (Juan 7:10, 11). Nojkia sanse tlachiayaya kej itokilijkauaj katli itstoyaj iuaya. Yeka Judas Iscariote monejki kitsoponis Jesús uan kiampa kinnextilik nopa soldados ajkia eliyaya (Mateo 26:47-49).
Itsonkal: Jesús amo kipiayaya ueueyak itsonkal, pampa Biblia kiijtoua “kipinaualtiskia se tlakatl intla kipiaskia ueueyak itsonkal” (1 Corintios 11:14).
Itentso: Jesús kipiayaya itentso. Ya kineltokak nopa tlanauatili kampa kiijtouayaya tlakamej amo ueliyayaj motekilisej inintentso (Levítico 19:27; Gálatas 4:4). Nojkia ipan se tlajtolpanextili kamanalti tlen itentso kema kitlaijiyouiltiskiaj Jesús (Isaías 50:6).
Itlakayo: Jesús kipixtoya chikaualistli, ya tlauel ikxinejnenki kema tlajtolmoyajki (Mateo 9:35). Ompa kinkixtik tlen teokali nochi tlanamakanij, kinkuamajkauilik ininkuamesas uan kinkixtik ininuaya inintlapialjuaj (Lucas 19:45, 46; Juan 2:14, 15). Se amochtli kiijtoua: “Tlen kiijtoua nopa naui Evangelios kinextia Jesús kipixtoya chikaualistli” (Cyclopedia de M’Clintock uan Strong, volumen IV, iamayo 884).
Tlen nesiyaya ipan iixayak: Jesús nochipa teiknelik, tetlasojtlak uan ni nesiyaya ipan iixayak (Mateo 11:28, 29). Miakej maseualmej kitemouayayaj pampa kinekiyayaj ma kinyolchikaua uan ma kinpaleui (Lucas 5:12, 13; 7:37, 38). Uan konemej nojkia kuali kiyolmatiyayaj itstosej iuaya Jesús (Mateo 19:13-15; Marcos 9:35-37).
Tlen sekinok kineltokaj kej nesiyaya Jesús
Tlen sekinok kineltokaj: Sekij maseualmej moiljuiaj Jesús eliyaya yayauik pampa ipan Apocalipsis kiixnextia itsonkal kej ichkatl uan iikxi “keja se tepostli bronce tlen kixauanaltijtoyaj” (Apocalipsis 1:14, 15).
Tlen melauak: Ipan Apocalipsis kemantika san kiixnextia se tlamantli (Apocalipsis 1:1). Kej nesi itsonkal uan iikxi Jesús san kiixnextia se tlamantli uan techpaleuia ma tijmatikaj tlake kuajkuali tlamantli pejki kinextia Jesús kema ya moyolkuitoya. Ni amo kinextia kenijkatsa nesiyaya Jesús kema ualajki ipan Tlaltipaktli. Kema Apocalipsis 1:14 kiijtoua “itsonteko uan itsonkal eltoya nelchipauak keja ichkatl o keja nextli” kinekiyaya kipankixtis nopa color. Itsonkal chipauak, kiixnextia Jesús tlauel tlalnamiki pampa uejkajkia itstok (Apocalipsis 3:14). Ipan ni texto amo kinextia itsonkal sanse kej nopa ichkatl yon kej nopa nextli.
Juan kiitak kejuak ipan se temiktli Jesús “iikxi tlauiyaya keja se tepostli bronce tlen kixauanaltijtoyaj uan teipa nelia kuali kipojpojtoyaj” (Apocalipsis 1:15). Nojkia kiijtoua “ixayak tlauiyaya keja tlauia tonati ika tlajkotona” (Apocalipsis 1:16). Ni kiijtosneki nopa temiktli san kiixnextia se tlamantli pampa yon se maseuali eli kej Juan kiitak ipan nopa temiktli. Ni texto kinextia kenijkatsa eliyaya Jesús teipa kema ya moyolkuitoya, nopaya kiijtoua: “Yajaya mokaua ipan nopa tlauili tlen chikauak tlauia hasta axaka uelis monechkauis” (1 Timoteo 6:16).
Tlen sekinok kineltokaj: Jesús amo kipiayaya chikaualistli.
Tlen melauak: Jesús kena kipiayaya chikaualistli uan amo majmauiyaya. Se neskayotl, kema kiitskiskiaj miakej maseualmej katli kinekiyayaj kimiktisej, amo majmajki kiijtos ya eliyaya katli kitemouayayaj (Juan 18:4-8). Jesús eliyaya se tetik tlakatl pampa kuaximayaya, yeka kipiayaya chikaualistli (Marcos 6:3).
Uajka, ¿kenke monejki ma kipaleuikaj kema kikechpanojtiajki nopa kuauitl? ¿Kenke nima mijki uan nopa omej amo? (Lucas 23:26; Juan 19:31-33). Kema nechka kimiktiskiaj tlauel tlaxikojtoya, uan ipan nochi nopa youali amo kochki pampa tlauel motekipachojtoya (Lucas 22:42-44). Ika tlayoua, nopa judíos kitlatsakuiltijkej uan ika ijnalok nopa romaeuanij kitlaijiyouiltijkej (Mateo 26:67, 68; Juan 19:1-3). Nopa uelis kichijki nima ma miki.
Tlen sekinok kineltokaj: Jesús nochipa motekipachouayaya uan mokuesouayaya.
Tlen melauak: Jesús nochipa kinextik nopa kuajkuali tlamantli tlen itata Jehová kinextia, uan Biblia kitokaxtia toTeotsij katli tlauel yolpaki (1 Timoteo 1:11; Juan 14:9). Nojkia, Jesús kinmachtik maseualmej kenijkatsa ueliskiaj yolpakisej (Mateo 5:3-9; Lucas 11:28). Yeka uelis tikijtosej ipan iixayak Jesús nochipa nesiyaya yolpaki.
Tlen nojkia mitspaktis tikitas
TLAMACHTILI TLEN TLAUEL IPATI
¿Kenke uelis timotemachisej nelia tlen kiijtoua Biblia?
Tlaj toTeotsij kichijki ma moijkuilo Biblia, uajka ni amochtli amo sanse ika sekinok amochtli.
TLEN TIJCHIUAJ
Xitlajtlani ma mitspaxalokaj
Xijyeko tlake tlamachtia Biblia o kuali xikinixmati Jehová itlajtoltemakauaj.