Amo. Ni Tlaltipaktli amo kema kitsontlamiltisej, kitlatisej yon kipatlasej ika seyok. Biblia kiijtoua toTeotsij kichijchijki Tlaltipaktli pampa kineki nopaya ma itstokaj maseualmej nochipa.

•   “Tlakamej tlen itstokej xitlauakej iixpa toTeko moaxkatisej nopa tlali tlen yajaya kinmakas, uan nepa itstosej para nochipa” (Salmo 37:29).

•   “Ta kuali tijtlatskiltik ni Tlaltipaktli para ma axmoijkuenis tlen kampa eltok” (Salmo 104:5).

•   “Ni Tlaltipaktli [...] nochipa mokaua” (Eclesiastés 1:4).

•   “Tlen kichijchijki iluikaktli uan Tlaltipaktli, yajaya Dios. Uan sejse tlamantli kitlalik kampa kinamiki. Uan ni Tlaltipaktli axkichijchijki para eltos kaktok. Kichijchijki uan kikualtlalik para ipan ma itstokaj tlakamej [o maseualmej]” (Isaías 45:18).

 ToTeotsij amo kikauas maseualmej ma kinempolokaj Tlaltipaktli ika tlen kichiuaj kema kisokiuiaj, ika tlauilankayotl o ika sekinok tlamantli. Biblia kiijtoua toTeotsij kintsontlamiltis “inijuantij tlen tlaxoleuayayaj ipan Tlaltipaktli” (Apocalipsis 11:18). ¿Kenijkatsa kichiuas?

 ToTeotsij kintekipatlas ni tlanauatianij ika iTlanauatijkayo katli eli xitlauak, pampa inijuantij amo kuali kimokuitlauijtokej Tlaltipaktli (Daniel 2:44; Mateo 6:9, 10). Katli tlanauatis ipan toTeotsij iTlanauatijkayo eli ikone Jesucristo (Isaías 9:6, 7). Kema Jesús itstoya ipan Tlaltipaktli kinauatik uan kitlakaualtik ajakatl uan atl (Marcos 4:35-41). Uan kema ya tekichiuas ipan Tlaltipaktli kinauatis nochi tlen pano, kikualchijchiuas uan kiyankuilis ni Tlaltipaktli uan sampa elis kej nopa xochimili Edén (Mateo 19:28; Lucas 23:43).

 Amo. Kiampa moiljuiaj pampa amo kuali kikuamachiliaj tlen kiijtoua 2 Pedro 3:7, nopaya kiijtoua: “ToTeko nojkia ika itlajtol ya kiniyokatlalijtok nopa iluikaktli uan Tlaltipaktli tlen ama eltok para teipa kixoleuas ika se tlitl”. Ma tikitakaj ome tlamantli tlen techpaleuis tijkuamachilisej ni tlajtoli:

1.   Ipan Biblia nopa tlajtoli iluikaktli, Tlaltipaktli uan tlitl amo sanse tlamantli kiijtosneki. Kema Biblia kitekiuia nopa tlajtoli “Tlaltipaktli” nojkia kiijtosneki nochi maseualmej. Salmo 97:1, kiijtoua: “¡Nochi Tlaltipaktli ma paki pampa toTeko tlanauatia!”.

2.   Nopa achtoui versículos tlen 2 Pedro 3:7 kiixtoma tlen kiijtosneki “iluikaktli”, “Tlaltipaktli” uan “tlitl”. Ipan versículos 5 uan 6 kiijtoua tlen panok kema tlauel uetski atl kema Noé itstoya. Ipan nopa tonali, amo kitsontlamiltijkej Tlaltipaktli, san maseualmej katli itstoyaj nopaya. Uajka, kema tlauel uetski atl kintsontlamiltijkej maseualmej katli tlauel mosisiniyayaj o nopa “Tlaltipaktli” (Génesis 6:11). Nojkia kiijtoua kitsontlamiltijkej “iluikaktli”, nopa kiijtosneki maseualmej katli tlanauatiyayaj ipan nopa tonali. Noé uan ichampoyouaj momanauijkej kema kintsontlamiltijkej katli kichiuayayaj tlen amo kuali ika miak atl uan inijuantij kinpixkej ininkoneuaj uan sampa momiakilijkej ipan Tlaltipaktli (Génesis 8:15-18).

 Sanse kej nopa atl, nopa tlitl tlen kiijtoua 2 Pedro 3:7, kintsontlamiltis maseualmej katli kichiuaj tlen amo kuali, amo ni Tlaltipaktli. ToTeotsij kiijtojtok onkas “yankuik iluikaktli uan Tlaltipaktli yankuik” kampa “nochi kichiuasej san tlen xitlauak” (2 Pedro 3:13). Nopa “Tlaltipaktli yankuik” kiijtosneki maseualmej katli kichiuaj tlen toTeotsij kipaktia, uan “yankuik iluikaktli” eli toTeotsij iTlanauatijkayo katli kichiuas Tlaltipaktli se xochimili (Apocalipsis 21:1-4).