Dios amo kichiua ma pano tlen amo kuali, ya kitekipachoua kema maseualmej kintlasojsoljuilia se tlenijki. ITlanauatijkayo Dios kitsontlamiltis kema techtlasojsoljuilia se tlenijki uan nochi tlen techtlaijiyouiltia. Maske ayamo asi nopa tonali, Dios kinyoltlalia maseualmej katli kintlasojsoljuilia se tlenijki (2 Corintios 1:3).

•  ¿Kenke tijmatij Dios amo techtlatsakuiltia kema techtlasojsoljuilia se tlenijki?

•  ¿Kema techtlasojsoljuilia se tlenijki kinextia tiitstokej ipan itlamia tonali?

•  ¿Kenijkatsa kinpaleuia Dios katli kintlasojsoljuilia se tlenijki?

•  ¿Uelis techpaleuis Biblia kema ayamo techtlasojsoljuilia se tlenijki?

•  Textos tlen techpaleuia ma tikinyolchikauaj katli kintlasojsoljuilik se tlenijki

 Ipan Biblia kiijtoua, Dios kitekiuik se keski tlamantli para kintlatsakuiltis tlen amo kualmej, pero tlen nama techtlasojsoljuilia amo eli sanse. ¿Kenke?

•   Kema tetlasojsoljuilia se tlenijki kinpano nochi maseualmej. Kema Dios kitekiuik se keski tlamantli para kintlatsakuiltis tlen amo kualmej ya kinmanauik katli kualmej. Se neskayotl, kema kintsontlamiltik Sodoma uan Gomorra, kinmanauik Lot uan omej iichpokauaj pampa inijuantij kuali monejnemiltiyayaj (Génesis 19:29, 30). Jehová kimatiyaya tlen eltoya ipan ininyolo maseualmej yeka san kintsontlamiltik katli kichiuayaya tlen amo kuali (Génesis 18:23-32; 1 Samuel 16:7).

•   Kema tetlasojsoljuilia se tlenijki san nima asi. Uan kema Dios kintlatsakuiltiskia katli amo kualmej, achtoui kinmatiltik tlen kinpanoskia uan katli kineltokakej momanauijkej (Génesis 7:1-5; Mateo 24:38, 39).

•   Maseualmej ika tlen kitlapejpeniaj kichiuaj ma kintlasojsoljuili se tlenijki. ¿Kenke? Pampa kisojsolojtokej Tlaltipaktli, kichijtokej ininchaj kampa uelis tlatemis, kampa mojmolinia tlali o itstokej kampa tlauel tlatotonia o tlaseseya (Apocalipsis] 11:18). Amo uelis tijtlajtlakoltisej Dios ika tlen kitlapejpeniaj (Proverbios 19:3).

 Kena, ipan Biblia onka se keski tlajtolpanextili tlen kinextia “nechka tlamis tlen mochijtok ipan Tlaltipaktli” o “itlamia tonali” (Mateo 24:3; 2 Timoteo 3:1). Se neskayotl, Jesús kiijtok tlen panoskia ipan ni tonali “onkas mayantli uan ejeliuis mojmolinis tlali” (Mateo 24:7). Dios nechka kitlamiltis nochi tlen techtlaijiyouiltia uan nojkia kema techtlasojsoljuilia se tlenijki (Apocalipsis 21:3, 4).

•   Dios kinpaleuia maseualmej ika Biblia. Biblia kiijtoua Dios kitekipachoua tlen techpano uan nojkia kiijtoua kitekipachoua kema titlaijiyouiaj (Isaías 63:9; 1 Pedro 5:6, 7). Nojkia kiijtoua kitsontlamiltis tlen techtlasojsoljuilia. (Xikita nopa recuadro “ Textos tlen techpaleuia ma tikinyolchikauaj katli kintlasojsoljuilik se tlenijki”).

•   Dios kinyolchikaua maseualmej ika itekipanojkauaj. Tlajtolpanextili kiijtouayaya Jesús kinyolchikauaskia “tlen tlauel moyolkuesouaj” uan katli “choka” (Isaías 61:1, 2). Ipan ni tonali Jehová itekipanojkauaj kichiuaj kampeka kinyolchikauasej sekinok kej Jesús kichijki (Juan 13:15).

   Dios itekipanojkauaj kinpaleuiaj maseualmej katli kintlasojsoljuilik se tlenijki ika tlen kinmonekiliaj (Hechos 11:28-30; Gálatas 6:10).

 Kena. Maske Biblia amo eli se amochtli kampa techiljuia tlake moneki tijchiuasej kema ayamo techtlasojsoljuilia se tlenijki, kena kiualika se keski textos tlen techpaleuis kuali tijtlapejpenisej tlen tijchiuasej. Ma tikitaj se keski:

•   ¿Tlake uelis tijchiuas uan kiampa timokualchijchijtos tlaj panos se tlenijki? Biblia kiijtoua: “Se tlakatl tlen tlalnamiki nimantsi momaka cuenta intla mauilili kampa yaui uan axpano” (Proverbios 22:3). Moneki tikijtosej tlake tijchiuasej tlaj panos se tlenijki tlen amo kuali. Nojkia ininuaya tochampoyouaj moneki tikajokuisej tlamantli tlen uelis tijtekiuisej kema techtlasojsoljuilis se tlenijki uan tikijtosej kanke timopantisej tlaj panos tlen amo kuali. Teipa uelis inkiompauisej tlen inkichiuasej.

•   Xikilnamiki más ipati monemilis uan amo tlen tijpia. Biblia kiijtoua: “Amo tleno tijualikakej ipan ni Tlaltipaktli uan amo tleno uelis tijuikasej” (1 Timoteo 6:7, 8). Tlaj tijnekij timomanauisej moneki tijkajteuasej tochaj uan nochi tlen tijpiaj. Ma tikilnamikikaj más ipati tonemilis uan amo tlen tijpiaj (Mateo6:​25).