Biblia kiijtoua toTeotsij kineki teipa kuali ma tiitstokaj uan ma tijselikaj tlen tijchiaj a (Jeremías 29:11). Uan toTeotsij techmakatok Biblia pampa kineki “techyolchikauas para ma tijchiakaj nochi tlen techiljuia para tijselisej teipa” (Romanos 15:4). Ipan ni tlamachtili, tikitasej kenijkatsa Biblia uelis techpaleuis amo tlauel ma timotekipachokaj, uan tlen toTeotsij kiijtoua techmakas, techpaleuia ma timotemachikaj teipa kena kuali tiitstosej.

Ipan ni tlamachtili tikitasej:

•  ¿Kenijkatsa Biblia techpaleuia ma tikitakaj se tlenijki kej kinamiki?

•  ¿Kenijkatsa Biblia kiijtoua tiitstosej teipa?

•  Se keski textos kampa kiijtoua tlen tijchiaj

 Biblia techpaleuia ma tikitakaj se tlenijki kej kinamiki pampa technextilia tlake moneki tijchiuasej uan kiampa amo tlauel timotekipachosej. Ma tikitakaj se keski tlamantli.

•   Xijkaua Biblia ma mitsyakana. Salmo 119:105 kiijtoua: “Motlajtol eltok keja se tlauili tlen kitlauilia noojui kampa ninejnemi para axnimotepotlamis”. Tlauili techpaleuia ipan ome tlamantli: kitlauilia tlen eltok toixteno, uan kitlauilia tlen eltok uejka. Nojkia kiampa pano ika tlen Biblia tetlajtolmaka, pampa techpaleuia ma tijsenkauakaj kuesoli tlen tijpiaj. Uan nopa kichiua ma tikitakaj kej kinamiki tlen mojmostla techpano. Tlen Biblia tlamachtia techyolchikaua uan techpaleuia ma tiitstokaj ika “pakilistli” (Salmo 19:7, 8). Uan Biblia nojkia techiljuia tlake panos teipa, pampa kiijtoua tlake mosentlalijtok techmakas toTeotsij uan kenijkatsa elis Tlaltipaktli. Kema timotemachiaj ipan tlen toTeotsij techmakas, techpaleuia nochipa ma tiyolpaktokaj.

•   Xijkaua sekinok ma mitspaleuikaj. Kema tijpiaj miak kuesoli o tekipacholi, uelis tijnekij tiitstosej toselti uan yeka tikintlalkauiaj touampoyouaj uan tochampoyouaj. Nopa amo techpaleuis, pampa Biblia kiijtoua uelis tijchiuasej tlen amo kinamiki uan ayokmo kuali tiitstosej (Proverbios 18:1). Touampoyouaj uan tochampoyouaj uelis techpaleuisej ma tikitakaj se tlenijki kej kinamiki uan uelis techiljuisej kenijkatsa uelis tijsenkauasej se kuesoli (Proverbios 11:14). Uan maske amo kisenkauasej tokuesoljuaj, kena techyolchikauasej uan techpaleuisej ma tiyolpakikaj, kiampa uelis tikijiyouisej tokuesoljuaj (Proverbios 12:25).

•   Ximomaijto. Biblia kiijtoua: “Nochi mokuesol xijkaua imako toTeko uan yajaya mitsmakas temachili. ToTeko axkikauas ma uetsi se tlen kitlepanita” b (Salmo 55:22). Yeka ipan Biblia kiijtoua Jehová, eli “toTeko Dios ipan tlen timochiaj” (Romanos 15:13). Kema timomaijtos, xikiljui toTeotsij nochi mokuesoljuaj pampa ya kitekipachoua tlen mitspano (1 Pedro 5:7). Biblia kiijtoua: “ToTeko tlen ueyi iyolo inmouaya inmechchiuas inchikajtokej uan intemachmej. Uan inmechmakas yankuik chikaualistli uan tetili” (1 Pedro 5:10).

•   Kema tijpias tlaouijkayotl, ximotemachi ipan tlen tijchia. Ipan Biblia, toTeotsij techiljuia: “[Katli] techtlakakilisej tlen tijpiaj tlalnamikilistli, itstosej ika temachili uan tlaseuilistli. Itstosej ika pakilistli uan axtleno kimakasisej” (Proverbios 1:33). Margaret, se siuatl katli eua Australia, kipolok miak tlamantli kema se chikauak ajakatl uan atl kisojsoljuilik ichaj. Kema kiampa kipanok, ya amo mosentlalik ipan ikuesol, uan moiljuik ipan tlen kiyekok: nochi tlamantli tlen tijpiaj nempoliui uan amo nochipa eltos. Yeka pejki nojua tlauel kinpatiita ichampoyouaj, iuampoyouaj, nojkia pampa kuali mouika iuaya toTeotsij uan pampa motemachia teipa kuali itstos (Salmo 37:34; Santiago 4:8).

 Biblia kiijtoua teipa maseualmej kuali itstosej uan Tlaltipaktli tlauel yejyektsi elis, uan ya nechka mochiuas. Nochi kuesoli tlen nama onka, kinextia tiitstokej ipan “itlamia tonali” (2 Timoteo 3:1-5). ToTeotsij nechka kintsontlamiltis katli kichiuaj tlen amo kuali uan tetlaijiyouiltia, kiampa kichiuas kema iTlanauatijkayo peuas tekichiuas ipan nochi Tlaltipaktli (Daniel 2:44; Apocalipsis 11:15). Jesús moiljuijtoya ipan nopa Tlanauatijkayotl kema kiijtok kenijkatsa moneki timomaijtosej: “Xiuala, xitlanauatiki nikaj. Ma kichiuakaj mopakilis nochi ipan ni Tlaltipaktli” (Mateo 6:9, 10).

 Biblia xitlauak kiijtoua kenijkatsa toTeotsij kinpaleuis maseualmej. Ma tikitakaj se keski kuesoli tlen ayokmo onkas kema tekichiuas toTeotsij iTlanauatijkayo:

•   Ayokmo aka mayankamikis. “Tlali tema[kas] miak pixkistli” (Salmo 67:6).

•   Ayokmo aka mokokos. “Ayok kiijtosej [...] mokokouaj” (Isaías 33:24).

•   Ayokmo aka mikis. “ToTeko kinuachilis nochi ininixayo. Uan ayok kema aki mikis, niyon mokuesos, niyon chokas, niyon mokokos pampa ya panotos nochi ni tlamantli tlen achtouia eltoya ipan nopa achtoui Tlaltipaktli” (Apocalipsis 21:3, 4).