Istlakatili: Jehová itlajtoltemakauaj amo mopajtiaj pampa moiljuiaj amo mochikauasej ika pajtli.

 Tlen melauak: Tojuantij nojkia tijnekij kuali ma techpajtikaj. Yeka, kema se tlen tojuantij o se tlen tochampoyouaj kipia se kokolistli o moneki kitekisej, tikintemouaj tepajtianij katli amo kitekiuiaj estli kema tepajtiaj. Uan tikintlaskamatiliaj katli momachtiaj kenijkatsa kichiuasej nopa. Ipan miak altepemej nojkia kinpajtiaj sekinok maseualmej uan amo kitekiuiaj estli, pampa kiitstokej kenijkatsa kinpaleuijtok Jehová itlajtoltemakauaj. Ipan ni tonali miakej uelis kitlapejpenisej kenijkatsa uelis mopajtisej uan amo kitekiuisej estli, pampa kemantika katli kintlaliliaj estli kinmauaj ika se kokolistli tlen ika uelis mikisej, amo nima mochikauaj kema kipiaj kokolistli o kemantika katli tepajtiaj mokuapolouaj.

 Istlakatili: Jehová itlajtoltemakauaj mochikauaj san ika inintlaneltokilis.

 Tlen melauak: Tojuantij amo kema timoiljuiaj techchikauas totlaneltokilis.

 Istlakatili: Tlauel patiyo tlainamaj kema amo tepajtiaj ika estli.

 Tlen melauak: Maske uelis patiyo tlainamasej, tlauel tepaleuia kema amo se mopajtia ika estli. a

 Istlakatili: Miakej Jehová itlajtoltemakauaj, uejueyij uan konemej, mikij sejse xiuitl pampa amo kinekij ma kintlalilikaj estli.

 Tlen melauak: Amo melauak tlen kiijtouaj. Ipan ni tonali miakej tepajtianij uelij kintekij katli kipiaj se kokolistli maske tlauel ouij, uan amo kitekiuiaj estli, kej kema kinkualtlaliliaj se tlamantli ipan inintlakayo o ininyolo, o kema kinpatiliaj se tlamantli ipan inintlakayo. b Katli amo kinekij ma kintlalilikaj estli kema kinpajtiaj mochikauaj sanse kej katli kintlaliliaj estli o kemantika nimantsi mochikajtiuetsij maske nojua konemej. c Amo aka uelis kiijtos mikis se kokoxketl tlaj amo kitlalilisej estli o mochikauas tlaj kitlalilisej.

 Pampa ya nopa timomachtijtokej ipan Biblia uan amo pampa amo tijnekij tepajtianij ma techpajtikaj. Nopa Achtoui Tlajtoli (Antiguo Testamento) uan ipan Nopa Yankuik Tlajtoli (Nuevo Testamento) technauatia amo ma tijkuakaj estli, nopa kiijtosneki nojkia amo timotlalilisej ipan totlakayo (Génesis 9:4; Levítico 17:10; Deuteronomio 12:23; Hechos 15:28, 29). Nojkia tijmatij toTeotsij tlauel kipatiita estli pampa kiixnextia tonemilis (Levítico 17:14). Yeka katli tijtekipanouaj Jehová tijneltokaj tlen Biblia technauatia uan yeka amo timotlaliliaj estli, kiampa tijnextiaj tijtlepanitaj toTeotsij, katli techmakatok tonemilis.

 Ya uejkaj nopa tepajtianij moiljuiyayaj tlaj amo kitekiuiskiaj estli kema tepajtiskiaj ueliskiaj mikisej katli kinpajtiyayaj, uan kiijtouayayaj kema se akajya amo kinekiyaya ma kitlalilikaj estli eliyaya pampa kinekiyaya mikis. Nama ayokmo kej nopa moiljuiaj. Ipan xiuitl 2004 kiijkuilojkej ni ipan se pilamochtsi: “Teipa nochi kinpajtisej ika nopa tlamantli tlen kitekiuiaj kema kinpajtiaj Jehová itlajtoltemakauaj”. d Uan ipan xiuitl 2010, nopa amochtli tlen itoka Medicina transfusional kiijtok pampa kichijtokej miak tlamantli tlen ika tepajtiaj “uelis kintekisej katli kipiaj se kokolistli uan ‘ayokmo kintlalilisej estli’ uan nochi uelis kinpajtisej ika nopa tlamantli”.

 Miakej tepajtianij tlen itstokej ipan nochi Tlaltipaktli kitekiuiaj miak tlamantli tlen kichiua amo tlauel ma eskisa kema kintekij katli kinpajtiaj, kej nopa ayokmo kintlaliliaj estli. Katli itstokej ipan altepemej tlen amo tlauel kipiaj tomij nojkia uelis mopajtisej ika nopa tlamantli, uan miakej maseualmej katli amo Jehová itlajtoltemakauaj nojkia kiniljuiaj tepajtianij ma kitekiuikaj nopa tlamantli kema kinpajtisej, uan kiampa ayokmo kintlalilisej estli.