Jehová itlajtoltemakauaj tijchiuaj tlen Biblia techtlajtolmaka, yeka amo nochipa timomanauiaj kema techteljuiaj o techpinajtiaj. Biblia techtlajtolmaka ni: “Intla tijchiua kampeka para tijtlalnamiktis se tlakatl tlen kinuiuiita sekinok [...], yajaya san mitspinaualtis” (Proverbios 9:7, 8; 26:4). Tojuantij amo timonajnankiliaj ininuaya sekinok yon timomanauiaj kema techistlakauiaj, pampa san timosentlaliaj tijyolpakiltisej toTeotsij (Salmo 119:69).

 Maske “onka tonali” kema moneki ‘timokamatsakuasej’, nojkia “onka tonali” kema moneki ‘tikamatisej’ (Eclesiastés 3:7). Yeka, san tikinixtomiliaj se tlenijki maseualmej katli kinekij kimatisej tlen melauak, uan amo timonajnankiliaj ininuaya. Kiampa tijchiuaj kej kichijkej Jesús uan nopa achtoui Cristo itokilijkauaj, uan nojkia tijnextiaj tijneltokaj tlen Jesús tlamachtik.

•   Jesús amo tleno kiijtok kema kiteljuijkej ika Pilato (Mateo 27:11-14; 1 Pedro 2:21-23). Nojkia amo tleno kiijtok kema kiijtojkej eliyaya se iuintiketl uan se katli san kipaktiyaya tlakuas. Kej monejnemiltik, kinextik amo nelia tlen kiijtouayayaj. Ika tlen kichijki neski nelia tlen kiijtoua Biblia: “Nopa tlalnamikistli [nima] nesi ika tlen se [akajya] kichiua” (Mateo 11:19). Uan kema monejki momanauis pampa tlauel kiistlakauijkej, ya amo majmajki uan kinnankilik katli kitlaijiljuiyayaj (Mateo 15:1-3; Marcos 3:22-30).

   Jesús kiniljuik itokilijkauaj amo ma moyolkokokaj kema kinistlakauiskiaj. Kiniljuik: “Xipakikaj kema sekinok inmechpinajtiaj uan inmechtlaijiyouiltiaj uan inmechistlakauiaj pampa innechneltokaj” (Mateo 5:11, 12). Jesús nojkia kiniljuik ueliskiaj tlajtolmoyauasej kema kinteljuiskiaj. Kema panoskia nopa, Jesús kichiuaskia tlen kintenkauilik: “Na niinmechmakas tlalnamikistli uan niinmechmakas nopa tlajtoli tlen moneki inkiniljuisej, uan niyon se inmokualankaitaka axuelis inmechnankilis” (Lucas 21:12-15).

•   Apóstol Pablo kintlajtolmakak Cristo itokilijkauaj amo ma monajnankilikaj ininuaya sekinok, “pampa axtleno kinpaleuia” kema kiampa kichiuaj (Tito 3:9; Romanos 16:17,18).

•   Apóstol Pedro kiniljuik Cristo itokilijkauaj ma kimanauikaj inintlaneltokilis nochipa kema ueliskiaj o monekiskia (1 Pedro 3:15). Kiampa kinextik kemantika tlen tijchiuaj tlauel ipati uan amo tlen tikijtouaj. Pedro kiijkuilok: “Xijchiuakaj tlen kuali para axuelis inmechteljuisej nopa tlakamej tlen ama inmechteljuiaj. Yajuantij axkipiaj inintlalnamikilis uan san uiuitikej” (1 Pedro 2:12-15).