¿Uelis se maseuali ayokmo elis se tlen Jehová itlajtoltemakauaj?

Ma kakisti ipan

Kena. Ika ome tlamantli se akajya uelis kinextis ayokmo kineki elis se tlen Jehová itlajtoltemakauaj:

Kema kiijtos. Se maseuali uelis kiijtos o kiijkuilos ayokmo kineki elis se tlen Jehová itlajtoltemakauaj.
Kej monejnemiltia. Se maseuali uelis kichiuas se tlenijki tlen ika kinextis ayokmo kineki ma kiixmatikaj kej se tlen Jehová itlajtoltemakauaj (1 Pedro 5:9). Se neskayotl, peuas monechikos ipan seyok religión uan nopaya kinekis mokauas (1 Juan 2:19).

¿Uan tlaj se akajya ayokmo tlajtolmoyaua yon monechikoua? ¿Ayokmo inkiitaj kej se tlen Jehová itlajtoltemakauaj?

Amo. Pampa amo eli sanse kema se akajya ayokmo kineki ma kiixmatikaj kej se tlen Jehová itlajtoltemakauaj uan se tlen ayokmo kuali tlaneltokaj. Kema se akajya ayokmo tlajtolmoyaua yon monechikoua amo kiijtosneki ayokmo kineki elis se tlen Jehová itlajtoltemakauaj, uelis nopa maseuali motekipachojtok o ayokmo kuali tlaneltoka. Yeka, tijchiuaj kampeka tikinyolchikauasej uan tikinpaleuisej, uan amo tikintlauelkauaj (1 Tesalonicenses 5:14; Judas 22). Tlaj nopa maseuali kineki ma kipaleuikaj kuali tlaneltokas, ueuejtlakamej moneki nimantsi kipaleuisej (Gálatas 6:1; 1 Pedro 5:1-3).

Ueuejtlakamej amo kinamiki kichiualtisej se akajya ma tlatekipano kej se tlen Jehová itlajtoltemakauaj. Sejse maseuali kimati tlake religión kitlapejpenis (Josué 24:15). Tijmatij se katli kineki kiueyichiuas Jehová moneki kichiuas ika pakilistli uan ika nochi iyolo (Salmo 110:3; Mateo 22:37).