Nojua timouikaj iuaya se akajya katli moatsonpoliuiltik uan teipa ayokmo kinejki tlajtolmoyauas o monechikos. Tojuantij tijchiuaj kampeka tikinpaleuisej sampa kuali ma tlaneltokakaj uan sampa ma kitekipanokaj toTeotsij.

 Kema se tlen Jehová itlajtoltemakauaj tlajtlakolchiua, uelis kikixtisej ipan tlanechikoli. Ni amo kiijtosneki nimantsi kikixtisej. Tlaj ayokmo kineki kuali monejnemiltis, kiixpano tlen Biblia tlanauatia uan amo moyolkuepa, uajka kikixtisej ipan tlanechikoli uan nochi toikniuaj ayokmo mouikasej iuaya yon amo kinojnotsasej. Biblia xitlauak tlanauatia: “Xijkixtikaj nopa fiero [o amo kuali] tlakatl” (1 Corintios 5:13).

 ¿Tlake pano kema se tlakatl kikixtiaj ipan tlanechikoli uan isiua uan ikoneuaj nojua kitekipanouaj Jehová? Maske ayokmo kinamiki kamanaltisej iuaya tlen Biblia, nojua moneki kuali mouikasej. Nojua moneki kiiknelis katli iuaya mosenkajtok uan kuali mouikas ininuaya ikoneuaj.

 Katli kinkixtijtokej ipan tlanechikoli uelis monechikosej touaya, uan tlaj inijuantij kinekij, ueuejtlakamej uelis kinpaleuisej. Ueuejtlakamej kinpaleuiaj sampa ma mochiuakaj Jehová itlajtoltemakauaj. Tlaj katli kinkixtijtokej ayokmo kichiuaj tlen amo kuali uan kinextiaj nelia kinekij monejnemiltisej kej Biblia tetlajtolmaka, uajka uelis sampa itstosej ipan tlanechikoli.