Jehová itlajtoltemakauaj kena kitekiuiaj vacunas. Inijuantij kimatij sejse Cristo itokilijka moneki kitlapejpenis tlaj motsopinis o amo. Uan miakej Jehová itlajtoltemakauaj kena motsopiniaj.

 Tijnekij kuali ma techpajtikaj uan tijpatiitaj tlen ixtlamatinij kichiuaj pampa kitemouaj pajtli tlen ika uelis timopajtisej kema tijpiaj se kokolistli tlen temiktia. Tlauel tikintlaskamatiliaj tepajtianij pampa nelnelia kinekij kinpaleuisej sekinok uan kuali kichiuaj ininteki, uan nojua kiampa kichiuaj kema momiakilia se kokolistli.

 Jehová itlajtoltemakauaj kinneltokaj tlanauatiaj kema kiijtouaj ma timomokuitlauikaj kema onka se kokolistli. Ma tikitakaj tlen kichijkej kema pejki nopa kokolistli COVID-19, Jehová itlajtoltemakauaj pejkej kitlaliaj miak tlamachtili ipan miak tlajtoli ipan ni sitio, kampa kiniljuiyayaj maseualmej nojua ma momokuitlauikaj uan ma kichiuakaj tlen kiniljuiyayaj kampa itstokej. Nojkia kiniljuijkej amo ma monechikokaj kampa yauij miakej maseualmej, ma mokauakaj ininchaj, amo ma kinnechkauikaj sekinok, ma momajtekikaj, ma kitekiuikaj mascarilla uan sekinok tlamantli tlen tlanauatianij kiijtojtokej ma kichiuakaj (Romanos 13:1, 2).

 Jehová itlajtoltemakauaj uejkajkia pejkej kichiuaj amatlajkuiloli tlen kiixtoma ni tlamantli:

•   Sejse maseuali moneki kitlapejpenis kenijkatsa mopajtis (Gálatas 6:5).

   “[Ni pilamochtsi] amo kiijtoua kenijkatsa moneki timopajtis o tlake pajtli uelis tijtekiuis. San kiixtoma se tlamantli uan kiampa katli kipoua ni pilamochtsi kitlapejpenis tlake kichiuas” (¡Despertad!, febrero 8, 1987).

   “Amo aka uelis mitsiljuis tlaj ta o mokoneuaj moneki inmotsopinisej, nopa san ta kinamiki tijtlapejpenis” (¡Despertad!, diciembre 8, 1965).

•   Tijnekij timopajtisej pampa tlauel tijpatiitaj tonemilis (Hechos 17:28).

   “Jehová itlajtoltemakauaj kitekiuiaj tlen tepajtianij kichijtokej pampa kinekij mochikauasej. Inijuantij tlauel kipatiitaj nemilistli uan maske amo kinekij kiixpanosej tlen Biblia kiijtoua, kena kitemoliaj kenijkatsa mopajtisej uan kiampa amo nima mikisej” (La Atalaya, mayo 1, 1976).

   “Amo kenijki tlaj se akajya yaui kampa se tepajtijketl pampa amo kineki mokokos uan nojua kineki itstos. Jehová itlajtoltemakauaj kikauaj tepajtianij ma kinpajtikaj. Se Cristo itokilijka tlen achtoui siglo, katli itoka Lucas eliyaya tepajtijketl, uan nama sekij Jehová itlajtoltemakauaj nojkia tepajtiaj [...]. Jehová itlajtoltemakauaj tlauel kipatiitaj pampa tepajtianij kuali kinpajtiaj uan kintlaskamatiliaj pampa kuali kichiuaj ininteki” (La Atalaya, febrero 1, 2011).