Jehová itlajtoltemakauaj amo tiiljuichiuaj kema tikaxitiaj toxiui pampa tijmatij toTeotsij amo kipaktia. Maske ipan Biblia amo kiijtoua tlaj kuali o amo kuali ma tiiljuichiuakaj, kena kiijtoua kenijkatsa kiita toTeotsij kema se akajya iljuichiua kema kiaxitia ixiui. Ma tikitakaj naui tlamantli tlen techpaleuis tijmatisej tlen Biblia tlamachtia.

1.   Ipan religiones tlen amo melauak pejkej iljuichiuaj kema kiaxitiyayaj ininxiui. Se enciclopedia kiijtoua ni iljuitl pejkej kichiuaj pampa kineltokayayaj “nopa amo kuali ajakamej kichiuiliyayaj tlen amo kuali katli kiaxitiyaya ixiui”, uan ueliskia momanauis “tlaj itstoskia ininuaya iuampoyouaj uan kiiljuiskiaj tlen kuali” (Funk Standard Dictionary of Folklore, Mythology and Legend). Ipan seyok amochtli kiijtoua uejkajkia “katli momachtiyayaj sitlalimej” ueliyayaj “kimatij tlake kinpanoskia teipa”, yeka kiijkuilouayayaj kema tlakatiyayaj pilkonetsitsij. Nopa amochtli nojkia kiijtoua: “Miakej kineltokaj nopa velas tlen kitlatiaj kema kiaxitiaj ininxiui uelis kinpaleuis ma mochiua tlen kinekij pampa kipiaj magia” (The Lore of Birthdays).

    Biblia kiijtoua toTeotsij kinkualankaita katli kitekiuiaj magia, katli tlamatij, katli tetlajchiuiaj o sekinok tlamantli tlen ‘kichiuaj ya nopa’ (Deuteronomio 18:14; Gálatas 5:​19-​21). Ipan Biblia kiijtoua nopa babiloniaeuanij tlamatiyayaj pampa momachtiyayaj sitlalimej, yeka toTeotsij kintlatsakuiltik (Isaías 47:11-​15). Maske Jehová itlajtoltemakauaj amo tijtemoliaj kenijkatsa pejki sejse iljuitl o tlen maseualmej momajtokej kichiuaj, kena tijneltokaj kema Biblia kiijtoua amo kuali tlen kichiuaj tetlajchiuiyanij.

2.   Achtoui Cristo itokilijkauaj amo iljuichiuayayaj kema kiaxitiyayaj ininxiui. Se enciclopedia kiijtoua nopa achtoui Cristo itokilijkauaj “kiitayayaj nopa iljuitl kej se tlamantli tlen san kichiuayayaj ipan religiones tlen amo melauak” (The World Book Encyclopedia). Nojkia ipan Biblia kiijtoua nopa apóstoles uan sekinok katli Jesús kinmachtik, tlamachtijkej kenijkatsa nochi Cristo itokilijkauaj monekiskia kiueyichiuasej toTeotsij (2 Tesalonicenses 3:6).

3.   Cristo itokilijkauaj kinnauatijkej ma kiilnamikikaj kema Jesús mijki uan amo kema tlakatki (Lucas 22:17-​20). Biblia kiijtoua “más ipati nopa tonali kema timikisej uan axnopa tonali kema titlakatkej” (Eclesiastés 7:1). Yeka kema Jesús mijki tlauel ipati uan amo kema tlakatki pampa nochipa tlauel kuali kitekipanok toTeotsij (Hebreos 1:4).

4.   Biblia amo kiijtoua tlaj se toTeotsij itekipanojka iljuichijki kema kiaxitik ixiui. Ipan Biblia ijkuilijtok kenijkatsa omej katli amo kitekipanouayayaj Jehová iljuichijkej kema kiaxitijkej ininxiui. Uan nojkia kiijtoua panok tlen amo kuali kema kichijkej nopa iljuitl (Génesis 40:20-​22; Marcos 6:​21-​29).

 Kej sekinok tetajmej, Jehová itlajtoltemakauaj tlauel kinikneliaj ininkoneuaj. Yeka, kemantika kinmakaj se tlenijki, mauiltia sansejko uan iljuichiuaj kampa uelis moyolpakiltisej. Kichiuaj kej Jehová katli nochipa kinmaka kuajkuali tlamantli itekipanojkauaj (Mateo 7:​11). Yeka, Jehová itlajtoltemakauaj ininkoneuaj amo motekipachouaj pampa amo kiniljuichiuiliaj kema kiaxitiaj ininxiui. Kej ni kiijtojkej se keskij konemej:

•   “Tlauel niyolpaki kema nechmakaj se tlenijki uan amo nijchia.” (Tammy, kipia 12 xiuitl.)

•   “Maske notatauaj amo nechmakaj se tlenijki kema nikaxitia noxiui, kena nechmakaj seyok tonali. Tlauel nechpaktia ma nechmakakaj se tlenijki.” (Gregory, kipia 11 xiuitl.)

•   “Amo nechpaktia nopa iljuitl kampa konemej san tlakuaj uan uikaj. Tlen tijchiuaj tochaj nopa kena nechpaktia.” (Eric, kipia 6 xiuitl.)