Kema Jehová itlajtoltemakauaj mosenkauaj amo kichiuaj miak tlamantli uan kichiuaj ika tlatlepanitakayotl, nopaya kiixtomaj se tlamachtili tlen uala ipan Biblia. Teipa, uelis katli mosenkauaj kinekij kichiuasej iljuitl uan temakasej tlakualistli. a Kema Jesús sanok pejtoya tlajtolmoyaua, yajki ipan se iljuitl kampa mosenkauayaya ipan altepetl Caná (Juan 2:1-11).

•  ¿Kenijkatsa mosenkauaj?

•  ¿Kanke mosenkauaj?

•  ¿Ajkia inijuantij uelis yasej?

•  ¿Kenijkatsa moyoyontiaj?

•  ¿Kinmakaj se keski tlamantli katli mosenkauaj?

•  ¿Kichiuaj brindis?

•  ¿Kintepeuiliaj arroz o confeti katli mosenkauaj?

•  ¿Temakaj tlakualistli uan tlaili?

•  ¿Kitlaliaj uikatl uan mijtotiaj?

•  ¿Kiilnamikij nopa tonali kema mosenkajkej?

 Tlauel ipati eli nopa tlamachtili tlen uejkaua 30 minutos katli kipanoltia se tlen Jehová itlajtoltemajka. Nopaya katli mosenkauaj kinixtomiliaj se keski tlamachtili ika Biblia tlen kinpaleuis ma itstokaj ika pakilistli uan nochipa ma moiknelijtokaj (Efesios 5:33).

 Ipan miak altepemej, tlanauatianij kinkauaj se keskij Jehová itlajtoltemakauaj ma kinamasenkauakaj katli kinekij mosenkauasej. Kema nechka tlamis nopa tlamachtili, katli mosenkauaj moiljuia tlen kitenkauaj kema mosenkauaj uan nopaya uelis momakasej anillos. Teipa katli tlamachtik kiiljuia tlakatl, nopa siuatl ya eli isiua uan siuatl ya eli iueue.

 Ipan sekinok altepemej, nopa tlanauatili kiijtoua se tekichijketl san ya uelis kinamasenkauas katli mosenkauasej. Uajka achtoui moneki moamasenkauasej uan teipa mopanoltia nopa tlamachtili ika Biblia. Tlaj katli mosenkauaj amo kiijtojkej tlen kitenkauaj kema mosenkauaj ininixpa tekichiuanij, uajka uelis kiijtosej kema tlamis nopa tlamachtili. Tlaj ya kiijtojkej kema moamasenkajkej, uelis kiompauisej tlaj inijuantij kinekij. Maske kiompauisej, moneki kipatlasej se kentsi pampa ya kiijtojkej achtouia. Nopa tlamachtili tlami ika se tlamaijtoli kampa kiiljuiaj toTeotsij ma kinteochiua katli ya mosenkajkej.

 Miakej Jehová itlajtoltemakauaj kinekij mosenkauasej ipan Kali kampa timosentiliaj, tlaj onka kampa itstokej. b Tlaj teipa katli mosenkauaj kinekij kichiuasej se iljuitl, kichiuaj sejkanok.

 Tlaj katli mosenkauaj kichiuaj ipan Kali kampa mosentiliaj, uelis yasej Jehová itlajtoltemakauaj o sekinok maseualmej. Tlaj kichiuasej iljuitl, katli mosenkauaj kiijtosej ajkia inijuantij kintlaneuisej.

 Amo onka se tlanauatili kampa kiijtoua kenijkatsa moneki moyoyontisej kema mosenkauaj ipan Kali kampa mosentiliaj. Jehová itlajtoltemakauaj kichiuaj kampeka moyoyontisej kej kinamiki pampa kiampa techtlajtolmaka Biblia. Yeka tlauel kintlaskamatiliaj katli yauij nopaya kema nojkia kiampa kichiuaj (1 Timoteo 2:9). Nojkia moneki kiitasej tlake ininyoyo mokentisej ipan nopa iljuitl.

 Ipan Biblia techiljuia ma titemakakaj tlen tijpiaj (Salmo 37:21). Jehová itlajtoltemakauaj tlauel techpaktia titemakasej uan nojkia tijselisej tlen techmakaj kema timosenkauaj (Lucas 6:38). Maske techpaktia, amo kema titlajtlanij ma techmakakaj se tlenijki uan nojkia amo tikijtouaj ajkia inijuantij techmakakej (Mateo 6:3, 4; 2 Corintios 9:7; 1 Pedro 3:8). Tlaj kej nopa tijchiuaskiaj, tikixpanoskiaj tlen Biblia kiijtoua uan tikinpinaualtiskiaj katli tikintlanejtokej.

 Amo. Jehová itlajtoltemakauaj amo kichiuaj, pampa nopa brindis pejkej kichiuaj ipan religiones tlen amo melauak. c Maske amo kichiuaj brindis, kena kinekij kuali ma itstokaj katli mosenkauaj.

 Amo. Ipan sekij altepemej maseualmej kintepeuiliaj arroz, confeti uan sekinok tlamantli katli mosenkauaj pampa moiljuiaj kinpaleuis ma kipiakaj suerte, ma yolpakikaj uan ma itstokaj miak xiuitl. Yeka Jehová itlajtoltemakauaj amo kichiuaj tlen maseualmej momajtokej kichiuaj, kej kema kiniljuia ma kipiakaj suerte. Pampa ni tlamantli pejkej kichiuaj ipan religiones tlen amo melauak (Isaías 65:11, TNM).

 Ipan Kali kampa mosentiliaj amo temakaj tlakualistli yon tlaili kema mosenkauaj. Tlaj katli mosenkauaj moiljuijtokej kichiuasej iljuitl, nopaya temakaj tlakualistli (Eclesiastés 9:7). Tlaj onkas tlaili, katli mosenkauaj moneki kiitasej keski imiaka temakasej uan ajkia inijuantij uelis kiisej pampa ya kipiaj ininxiui, kej tlanauatianij kiijtouaj (Lucas 21:34; Romanos 13:1, 13).

 Uelis katli mosenkauaj kinekij ma kitlalikaj uikatl uan ma mijtotikaj (Eclesiastés 3:4). Nopa uikatl tlen kitlaliaj eli tlen kikakij ipan ininaltepe, tlen inijuantij kinpaktia uan tlen kuali kakisti. Kema mosenkauaj Ipan Kali kampa mosentiliaj kitlaliaj uikatl tlen mokixtijtok ipan Biblia.

 Jehová itlajtoltemakauaj inijuantij kimatij tlaj kena kiilnamikisej kema mosenkajkej, pampa Biblia amo kiijtoua tlaj kena kuali ma kichiuakaj o amo. Tlaj kena kichiuasej, uelis itstosej san inijuantij, ika ininuampoyouaj o ininchampoyouaj.