Amo, amo kema tijchijtokej nopa. Kema tikitaj se tlamachtili tlen tijneltokaj amo ya nopa tlen Biblia tlamachtia, tijpatlaj ika tlen kena tlamachtia Biblia.

 Nochi tlen tijneltokaj mokixtijtok san ipan toTeotsij iTlajtol. Maske ipan xiuitl 1950 pejki tijchiuaj nopa Traducción del Nuevo Mundo de las Santas Escrituras, ipa kuali timomachtiyayaj Biblia, yeka tijtekiuiyayaj sekinok Biblias. Ma tikitakaj se keski tlamachtili tlen ipa tijneltokayayaj kema ayamo tijpiayayaj Traducción del Nuevo Mundo. Xikita tlaj tlen tijneltokaj ya nopa tlen Biblia tlamachtia.

1.   Tlen tijneltokaj: ToTeotsij amo se Trinidad. Nopa pilamochtsi Zion’s Watch Tower, tlen nama itoka Tlen Tematiltia ika nauatl (Huasteca), mestli julio, xiuitl 1882, kiijtok ni: “Maske miakej maseualmej kimajtokej titlaneltokaj ipan Jehová, ipan itonal uan ipan Jesús, nojkia kimatij amo tijneltokaj ni eyij elij teotsitsij tlen mochiuaj setsi, o setsi teotsij mochiua eyij. Amo tijneltokaj ni pampa amo ya nopa tlamachtia Biblia”.

     Tlen kiijtoua Biblia: “ToTeko [Jehová] itstok setsi” (Deuteronomio 6:4). “Itstok setsi Dios, yajaya toTata, ika tlen pejki nochi tlen onka [...]. Uan itstok san se tlen nelia tekojtli uan yajaya Jesucristo.” (1 Corintios 8:6.) Jesús kiijtok: “NoTata itstok más ueyi keja na” (Juan 14:28).

2.   Tlen tijneltokaj: kema mikij katli amo kualmej, amo kintlaijiyouiltiaj ipan tlitl. Ipan pilamochtsi Zion’s Watch Tower, mestli junio, xiuitl 1882, kipiayaya se tlamachtili tlen motokaxtik: “El salario del pecado es la muerte”. Ni mokixtik ipan Romanos 6:​23, nopa tlamachtili kiijtouayaya: “¡Ni tlajtoli amo ouij se kikuamachilis”! Tlaj miakej maseualmej kineltokaj Biblia nelnelia toTeotsij iTlajtol, amo kinamiki kineltokasej se tlenijki tlen Biblia amo tlamachtia, kej kema kiijtouaj se akajya katli tlajtlakolchiua nochipa tlaijiyouis ipan tlitl”.

     Tlen kiijtoua Biblia: “Ajkeya tlajtlakolchiuas elis tlen mikis ipampa itlajtlakol” (Ezequiel 18:​4, 20). Biblia kiijtoua toTeotsij amo kintlaijiyouiltia ikualankaitakauaj ipan tlitl, san kiijtoua “mokuapolojtosej para nochipa”, o kej kiijtoua nopa Biblia Nácar-Colunga de 1944, kiijtosneki “kintsontlamiltisej” (2 Tesalonicenses 1:9).

3.   Tlen tijneltokaj: toTeotsij iTlanauatijkayo nelnelia tekichijtok uan amo se tlamantli tlen tijpixtokej ipan toyolo. Nopa pilamochtsi Zion’s Watch Tower, mestli diciembre, xiuitl 1881, kiijtok ni tlen toTeotsij iTlanauatijkayo: “Kema peuas tekichiuas ni Tlanauatijkayotl, kintsontlamiltis nochi tlanauatianij tlen itstokej ipan Tlaltipaktli”.

     Tlen kiijtoua Biblia: “Uan ipan nopa tonali kema tlanauatijtosej nopa tlanauatianij tlen kinnextia ixokpiljuaj nopa teteyotl, toTeko Dios tlen itstok iluikak kiketsas se Tlanauatilistli kampa itlakauaj tlen axaka uelis kisemanas, niyon axkikauas nopa itlanauatilis ika seyok. Uan axaki uelis kitlanis nopa Tlanauatijketl tlen toTeko Dios kitlalis para nochipa. ITlanauatijkayo kintlamiltis nochi sekinok tlanauatianij uan inintlanauatijkayo, uan ayok tleno mokauas tlen ne sekinok. Nopa Tlanauatilistli uan nopa Tlanauatijketl tlen toTeko kitlalijtos uejkauas para nochipa” (Daniel 2:​44).

 Amo, Jehová itlajtoltemakauaj nojkia kitekiuiaj sekinok Biblias kema tlamachtiaj tlen kineltokaj. Kema tikiljuiaj se akajya tlaj kineki ma tijmachtikaj ika Biblia, nojkia tikiljuiaj uelis tijmakasej se Biblia tlen nopa Traducción del Nuevo Mundo, uan amo tijnamakiltisej. Uan tlaj se akajya kineki kitekiuis seyok Biblia kema tijmachtisej, tikiljuiaj uelis kitekiuis tlen kipixtok.