Nochi Jehová itlajtoltemakauaj nochipa kinmachtiaj kenijkatsa tlajtolmoyauasej. Kiampa kichiuaj pampa Jesús kiniljuik itokilijkauaj ma tlajtolmoyauakaj uan ma kinmachtikaj maseualmej tlen iTlanauatijkayo Dios (Mateo 24:14; 28:19, 20). Momachtiaj kenijkatsa tlajtolmoyauasej ipan tlanechikoli tlen mochiua sejse semana uan ipan uejueyi tlanechikolistli tlen mochiua sejse xiuitl. Pero katli tlayakanaj ipan tlanechikoli uan katli kichiuaj sekinok tlamantli, kemantika nojua más kinmachtiaj ika Biblia.

Ipan ni tlamachtili tikitasej:

•  ¿Tlake tlamantli momachtiaj Jehová itlajtoltemakauaj?

•  Kampa kinmachtiaj Jehová itlajtoltemakauaj

•  ¿Kanke mokixtia tlen kinmachtiaj?

•  ¿Moneki tlaxtlauasej pampa kinmachtiaj?

•  ¿Kenijkatsa kinpaleuijtok Jehová itlajtoltemakauaj pampa momachtiaj?

 Ipan tlanechikoli. Chijchikueyi se keskij katli tiitstokej ipan se tlanechikoli, timosentiliaj uan timomachtiaj ompa ipan kali kampa timonechikouaj, nopaya tijueyichiuaj Dios. Nopa achtoui tlanechikoli mochiua ipan semana uan nopa seyok mochiua ipan sábado o domingo. Nochi uelis yasej uan amo tlainamaj.

•   Tlanechikoli tlen mochiua ipan semana. Nopa tlanechikoli techpaleuia más kuali ma titlapouakaj, ma timokamanaljuikaj ininuaya maseualmej, ma tikamanaltikaj ininixpa sekinok uan más kuali ma titlamachtikaj. Ipan nopa tlanechikoli moixtoma tlamachtili, ipan se keski tlaxeloli uelis titlanankilisej, technextiliaj kenijkatsa titlajtolmoyauasej uan nojkia kitlaliaj videos. Nochi ni tlamantli techpaleuia más kuali ma tijmoyauakaj nopa kuali tlamachtili uan ma tikinmachtikaj maseualmej katli kuali techtlakakiliaj. Nopa tlanechikoli techpaleuia kuali ma titlaneltokakaj, ma tikiknelikaj Dios uan nojkia sekinok katli monechikouaj.

•   Tlanechikoli tlen mochiua ipan sábado o domingo. Ni tlanechikoli moxeloua ika ome tlamachtili. Nopa achtoui tlamachtili moixtoma para nochi maseualmej, maske sekij amo elij Jehová itlajtoltemakauaj. Uan ipan nopa seyok tlamachtili timomachtiaj se tlaxeloli tlen pilamochtsi Tlen Tematiltia, a kampa nochi uelis tlanankilisej. Sejse tlamachtili tlen nopa pilamochtsi kiualika textos uan sekinok tlamantli tlen techpaleuia más kuali ma tijtekipanokaj Dios uan kuali ma timonejnemiltikaj.

 Uejueyi tlanechikolistli. Mochiua expa ipan se xiuitl uan yauij toikniuaj katli itstokej ipan miak tlanechikoli. Ipan nopa uejueyi tlanechikolistli moixtoma tlamachtili tlen mokixtijtok ipan Biblia uan se keskij toikniuaj kiixtontiauij, mopanoltia tlanextilili, videos uan kintlatsintokiaj tlen kinpanotok se keskij. Nopa uejueyi tlanechikolistli techpaleuia ma tijmatikaj sekinok tlamantli tlen Biblia uan más kuali ma titlajtolmoyauakaj, sanse kej mochiua ipan tlanechikoli. Nochi uelis yasej uan amo aka kiinamaj.

 Se keskij Jehová itlajtoltemakauaj kintlaneuij ma momachtitij Kampa kinmachtiaj ika Biblia. ¿Kanke momachtiaj? ¿Kenke kiampa kichiuaj uan keski uejkaua? ¿Uan ajkia inijuantij uelis yasej?

Kampa kinmachtiaj precursores

•   ¿Kenke mochiua? Nopaya kinmachtiaj precursores b. Inijuantij elij Jehová itlajtoltemakauaj katli tlauel tlajtolmoyauaj. Kinmachtiaj kenijkatsa más kuali tlajtolmoyauasej uan tlamachtisej. Nojkia kiixtomaj miak tlamantli tlen Biblia, technextiliaj kenijkatsa titlajtolmoyauasej uan kipanoltiaj tlamachtili.

•   Uejkaua chikuasej tonali.

•   ¿Ajkia inijuantij uelis yasej? Kintlaneuij katli kiaxitiaj se xiuitl kej precursores uan teipa kintlaneuij majmakuilpa xiuitl.

Kampa kinmachtiaj katli senkistok tlatekipanouaj

•   ¿Kenke mochiua? Nopaya kinmachtiaj katli uejkajtok tlatekipanojtokej kej precursores. Tlen nopaya kiyekouaj kinpaleuia más kuali ma tlajtolmoyauakaj uan ma tlamachtikaj. Nojkia kuali momachtiaj sekinok tlamachtili tlen uala ipan Biblia. Miakej tlen inijuantij kintlaneuij ma yakaj ipan altepemej kampa monekij tlajtolmoyauanij.

•   Uejkaua ome metstli.

•   ¿Ajkia inijuantij uelis yasej? Precursores katli kititlankej solicitud, katli kiaxitiaj se keski tlamantli tlen kintlajtlaniaj uan katli amo tleno kintsakuilia para yasej tlajtolmoyauatij sejkanok.

Kampa kinmachtiaj ueuejtlakamej

•   ¿Kenke mochiua? Nopaya kinpaleuiaj katli tlayakanaj ipan tlanechikoli, katli nojkia kiniljuiaj ueuejtlakamej. Kinmachtiaj kenijkatsa kichiuasej ininteki, kenijkatsa tlamachtisej uan kinpaleuisej toikniuaj kuali ma tlaneltokakaj. Tlen nopaya momachtiaj kinpaleuia más ma kiiknelikaj Dios uan toikniuaj (1 Pedro 5:2, 3).

•   Uejkaua makuili tonali.

•   ¿Ajkia inijuantij uelis yasej? Kintlaneuij ueuejtlakamej katli namanok pejtokej tlatekipanouaj uan teipa kintlaneuij majmakuilpa xiuitl.

Kampa kinmachtiaj katli tepaxalouaj chijchikuasej metstli uan ininsiuajuaj

•   ¿Kenke mochiua? Kinpaleuiaj katli tepaxalouaj chijchikuasej metstli c más kuali ma kichiuakaj ininteki ipan tlanechikoli kampa tepaxalouaj (1 Timoteo 5:17). Nojkia kinpaleuia nopa toikniuaj uan ininsiuajuaj más kuali ma kikuamachilikaj tlen Biblia tlamachtia.

•   Uejkaua se metstli.

•   ¿Ajkia inijuantij uelis yasej? Katli kiuikaj se xiuitl tepaxalojtokej chijchikuasej metstli uan ininsiuajuaj. Teipa uelis kintlaneuisej majmakuilpa xiuitl.

Kampa kinmachtiaj ueuejtlakamej uan tlapaleuianij

•   ¿Kenke mochiua? Kinpaleuiaj ueuejtlakamej uan tlapaleuianij d más kuali ma kichiuakaj ininteki ipan tlanechikoli pampa ipan ni tonali mopatlatia tlen mochiua ipan Tlaltipaktli, tlen techpoloua uan kej tiitstokej (2 Timoteo 3:1). Ni mochiua kema pano ome o eyi xiuitl.

•   Uejkaua se tonali uan kemantika más.

•   ¿Ajkia inijuantij uelis yasej? Katli tepaxalouaj chijchikuasej metstli, ueuejtlakamej uan tlapaleuianij.

Kampa kinmachtiaj katli tlatekipanouaj ipan Betel

•   ¿Kenke mochiua? Kinpaleuiaj katli tlatekipanouaj ipan Betel e kuali ma kichiuakaj ininteki uan más ma kiiknelikaj Dios uan katli ininuaya tekitij.

•   Uejkaua makuili tonali uan tlajko.

•   ¿Ajkia inijuantij uelis yasej? Kintlaneuij nochi katli namanok pejkej tlatekipanouaj ipan Betel. Teipa kintlaneuij majmakuilpa xiuitl.

Kampa momachtiaj ipan Galaad

•   ¿Kenke mochiua? Kinpaleuiaj katli yauij nojua tlauel ma kiiknelikaj itlajtol Dios uan ma kichiuakaj tlen momachtiaj (1 Tesalonicenses 2:13). Nopa tlakamej uan siuamej katli kuali tlaneltokaj uan yauij ipan Galaad, más tlapaleuiaj ipan Jehová itlanechikol uan ipan tlajtolmoyaualistli. Katli nopaya momachtiaj kintitlanij ma yakaj tlajtolmoyauatij sejkanok o ma tlatekipanotij ipan kali Betel tlen ininaltepe o ipan seyok altepetl.

•   Uejkaua makuili metstli.

•   ¿Ajkia inijuantij uelis yasej? Se keskij Jehová itlajtoltemakauaj katli tlatekipanouaj kej misioneros, precursores especiales, katli tlatekipanouaj ipan Betel uan katli tepaxalouaj chijchikuasej metstli uan ininsiuajuaj. Kali Betel kinmaka nopa solicitud para uelis yasej. Kinmachtiaj ipan Centro Educativo de la Watchtower, ipan Patterson (Nueva York).

Kampa kinmachtiaj katli kiyakanaj Betel uan ininsiuajuaj

•   ¿Kenke mochiua? Kinmachtiaj katli tlayakanaj ipan Betel f uan kiampa kuali kiyakanasej sejse tekitl tlen nopaya mochiua. Nojkia kiitaj tlen kichiuaj Jehová itlajtoltemakauaj ipan nopa altepetl o sekinok altepemej tlen kiyakana nopa kali Betel.

•   Uejkaua ome metstli.

•   ¿Ajkia inijuantij uelis yasej? Ueyi kali Betel kintlaneui se keskij katli kiyakanaj kali Betel uan ininsiuajuaj. Kinmachtiaj ipan Centro Educativo de la Watchtower, ipan Patterson (Nueva York).

 Jehová itlajtoltemakauaj nochipa timoyakanaj ika Biblia. Timotemachiaj eli itlajtol Dios uan kipia miak tlamachtili tlen techpaleuia kuali ma timonejnemiltikaj (2 Timoteo 3:16, 17).

 Amo. Kampa kinmachtiaj Jehová itlajtoltemakauaj amo kininamaj uan moixtlaua ika tomij tlen sekinok temakaj ika nochi ininyolo (2 Corintios 9:7).