Amo. Jehová itlajtoltemakauaj tielij Cristo itokilijkauaj, yeka toreligión amo protestante.

 Miakej maseualmej kimatij nopa religiones protestantes kiijixnamikij uan amo kineltokaj tlen nopa Iglesia Católica Romana tlamachtia. Maske Jehová itlajtoltemakauaj nojkia amo tijneltokaj miak tlamantli tlen nopa Iglesia Católica tlamachtia, amo tielij protestantes. Ma tikitakaj kenke:

1.   Katli protestantes tlamachtiaj kiijixnamiki tlen Biblia tlamachtia. Ximoiljui ipan ni tlamantli, Biblia tlamachtia “itstok san se Dios”, amo kiijtoua toTeotsij se trinidad (1 Timoteo 2:5; Juan 14:28). Nojkia, Biblia amo tlamachtia toTeotsij kintlatsakuiltia katli amo kualmej ipan tlitl, san kiijtoua toTeotsij kintlatsakuiltia pampa ayokmo kema moyolkuisej katli amo kualmej (Salmo 37:9; 2 Tesalonicenses 1:9).

2.   Tojuantij amo tijnekij tijpatlasej nopa Iglesia Católica yon sekinok religiones. Tijnekij tijmoyauasej nopa kuali tlamachtili tlen toTeotsij iTlanauatijkayo uan tikinpaleuisej maseualmej ma motemachikaj ipan nopa kuali tlamachtili (Mateo 24:14; 28:19, 20). Amo tijnekij tijpatlasej yon se religión, tijnekij tikinpaleuisej maseualmej katli techtlakakiliaj ma kiixmatikaj toTeotsij uan iTlajtol (Colosenses 1:​9, 10; 2 Timoteo 2:​24, 25).