Amo. Jehová itlajtoltemakauaj amo se secta. Tojuantij tijchiuaj kampeka tijchiuasej kej Jesús kichijki uan timonejnemiltisej kej tlamachtik.

 Miakej amo kimatij tlake nelnelia kiijtosneki uan yeka kiijtouaj miak tlamantli. Ma tikitakaj ome tlamantli tlen kiijtouaj, uan kenke Jehová itlajtoltemakauaj amo kinamiki ma kintokaxtikaj se secta.

•   Sekij kiijtouaj se secta eli se yankuik religión katli moxeloua tlen seyok religión. Jehová itlajtoltemakauaj amo se yankuik religión. Tijchiuaj kej kichijkej nopa achtoui Cristo itokilijkauaj uan tijchiuaj kampeka timonejnemiltisej kej tlamachtijkej, tlen ijkuilijtok ipan Biblia (2 Timoteo 3:​16, 17). Tijneltokaj san toTeotsij iTlajtol kinamiki kiijtos kenijkatsa tijueyichiuasej toTeotsij.

•   Sekij kiijtouaj ipan se secta itstokej katli tlauel amo kualmej uan kitokiliaj se akajya. Jehová itlajtoltemakauaj amo kitokiliaj se tlakatl o se siuatl, pampa tijmatij tlen Jesús kiniljuik itokilijkauaj: “San na niCristo [...] niinmotlayakanka” (Mateo 23:10).

 Amo tijchiuaj tlen amo kuali, uan pampa kuali timonejnemiltiaj tlauel techpaleuijtok uan nojkia kinpaleuijtok sekinok. Ika Biblia tikinpaleuijtokej miakej maseualmej ayokmo ma moiuintikaj yon ma kitekiuikaj drogas. Nojkia ipan nochi Tlaltipaktli titemachtiaj ma tlapouakaj uan ma tlajkuilokaj, yeka miakej maseualmej kiyekojkej tlajkuilosej uan tlapouasej. Nojkia titepaleuiaj kema se ajakatl o se tlenijki tetlasojsoljuilia. Kej Jesús tlamachtik, tojuantij tijchiuaj kampeka tikinchiuilisej sekinok tlen kuali (Mateo 5:​13-​16).