Kena, katli tijtekipanouaj Jehová tikinpaleuiaj katli kintlasojsoljuilia ajakatl o kema kinpano se tlenijki. Tikinpaleuiaj toikniuaj uan sekinok maseualmej, kej techtlajtolmaka Gálatas 6:10: “Ma tikinchiuilikaj tlen kuali nochi [maseualmej]. Uan achi más moneki ma tikinchiuilikaj tlen kuali toikniuaj”. Nojkia tikinyolchikauaj uan tikinpaleuiaj katli tlauel tlaijiyouijtokej (2 Corintios 1:3, 4).

 Kema se ajakatl o seyok tlamantli tetlasojsoljuilia, ueuejtlakamej tlen nopaya itstokej kinnojnotsaj toikniuaj uan kiampa kimatisej tlake kinpoloua o tlaj kinpanok se tlenijki. Teipa kiniljuiaj toikniuaj katli itstokej Betel tlake panotok uan kenijkatsa kinpaleuijtokej.

 Tlaj toikniuaj katli itstokej nechka ipan miak tlanechikoli amo uelij kinpaleuiaj nochi katli kinpanotok nopa tlaouijkayotl, uajka Katli kinyakanaj Jehová itlajtoltemakauaj kiitaj kenijkatsa kinpaleuisej. Toikniuaj katli itstokej ipan Betel kiniljuiaj se keskij toikniuaj ma kiitakaj kenijkatsa kinpaleuisej, uan sekij toikniuaj tlen kampa ueli ualauij nojkia tlapaleuiaj uan temakaj tlen kipiaj, uelis ika tomij o sekinok tlamantli (Proverbios 17:17). Kema itstoyaj nopa achtoui Cristo itokilijkauaj nojkia kinpaleuijkej sekinok Cristo itokilijkauaj katli amo kipixtoyaj tlen kikuasej pampa onkayaya se ueyi mayantli (1 Corintios 16:1-4).

 Se kentsi tlen nopa tomij katli kititlanij ipan nochi kali Betel, tlen kipiaj Jehová itlajtoltemakauaj, kitekiuiaj kema toikniuaj kinpano se tlenijki o kema kintlasojsoljuilia ajakatl (Hechos 11:27-30; 2 Corintios 8:13-15). Uan pampa toikniuaj katli tlapaleuiaj amo kintlaxtlauiaj, nochi nopa tomij san kitekiuiaj kema kinpaleuiaj toikniuaj. Uan nochi nopa tomij amo san kej ueli motekiuia (2 Corintios 8:20).