Nitlakatki ipan San Juan Chancalaíto, se pilaltepetsi tlen mopantia ipan Chiapas (México). Nochampoyouaj elij tlen se grupo étnico tlen nopa mayas katli itoka chol. Notatauaj kinpixkej 12 ininkoneuaj, na nitlakatki kema ya itstoyaj naui noikniuaj. Kema nieliyaya niokichpil noikniuaj uan na timomachtiyayaj Biblia ininuaya Jehová itlajtoltemakauaj. Maske nimomachtik, na amo nijchijki tlen Biblia tetlajtolmaka.

 Kema nijpixtoya 13 xiuitl, ya nijtekiuiyaya drogas uan nitlachtekiyaya. Teipa nikistejki nochaj uan san kampa ueli ninenki. Kema nikaxitik 16 xiuitl, pejki nitekiti kampa kitokayayaj marihuana. Se youali, kema nopaya nitekititoya se xiuitl, se keski tlakamej katli eliyayaj tokualankaitakauaj techtotopotskej kema tijuikayayaj miak marihuana ipan se kuakanaua. Pampa axnijnejki ma nechmiktikaj, nimokuamajkajki atitla uan nopa ueyatl nechuikak. Teipa, niajki Estados Unidos.

 Kema niitstoya nopaya, nojua pejki nijnamaka drogas uan nimokalakik ipan miak kuesoli. Kema nijpixtoya 19 xiuitl, nechtsajkej pampa nitlachtejki uan nijnekiyaya nitemiktis. Ipan cárcel nimokalakik ipan se pandilla uan nojua nijchijtinenki tlamantli tlen axkuali. Yeka, nechtsakuato sejkoyok, kampa itstoyaj tlakamej katli tlauel mosisiniyayaj ipan Lewisburg (Pensilvania).

 Ipan Lewisburg, nojua tlauel amo kuali nimonejnemiltik. Uan pampa ya nijpixtoya tatuajes tlen se pandilla, nima pejki nimouika ininuaya katli eliyayaj tlen nopa pandilla katli itstoyaj ipan nopa cárcel. Nojua tlauel nimosisinik uan san nitlateuijtinemiyaya. Se tonali, kalixpa tlen nopa cárcel pejkej moteuiaj uan na nimokalakik, tijtekiuijkej bates de beisbol uan pesas tlen kitekiuiaj ipan gimnasio. Nelia tlauel timouilankej. Katli techmokuitlauiyayaj kitekiuijkej gas lacrimógeno tlen ika techxelojkej. Teipa, katli kiyakanayayaj nopa cárcel nechuikakej kampa nojua tlauel kuali tlatsaktoyaj. Nimantsi nikualaniyaya uan kema nikamanaltiyaya amo nitlatlepanitayaya. San ika tlen ueli tlamantli nitlateuiyaya, uan nechpaktiyaya nijchiuas nopa. Notlalnamikilis amo nechyolkokouayaya kema nijchiuayaya nopa.

 Kampa nechtsaktoyaj, san kemantika nechkauiliyayaj ma nikisa. Yeka pejki nijpoua Biblia pampa amo tleno nijchiuayaya. Teipa, katli techmokuitlauiyaya nechmakak nopa amochtli Usted puede vivir para siempre en el paraíso en la Tierra. a Kema pejki nijpoua ni amochtli nikilnamijki nochi tlen nimomachtijtoya kema nieliyaya niokichpil, kema Jehová itlajtoltemakauaj nechmachtiyayaj ika Biblia. Nimoyoliljuik nechpanotoya tlamantli tlen tlauel amo kuali pampa tlauel nimosisiniyaya. Nojkia nimoyoliljuik ipan nochampoyouaj, pampa omej nosiuaikniuaj mochijtoyaj Jehová itlajtoltemakauaj, nimoiljuik: “Inijuantij itstosej nochipa”. Uajka nimotlajtlanik: “¿Uan kenke na amo?”. Ipan nopa tonali nimosentlalik nijpatlas nonemilis.

 Tlaj nijnekiyaya nimoyolpatlas, monekiyaya ma nechpaleuikaj. Yeka, achtoui nimomaijtok uan nikiljuik Jehová ma nechpaleui. Teipa, ika se amatlajkuiloli nitlajtlanki ma nechmachtikaj ika Biblia uan nijtitlanki ipan kali Betel tlen eltok ipan Estados Unidos. Inijuantij kintitlankej toikniuaj katli itstoyaj ipan se tlanechikoli tlen nechka eltoya, ma nechitatij ipan carcel. Ipan nopa tonali, san ueliyayaj nechpaxalouaj nochampoyouaj. Yeka, se tlen Jehová itlajtoltemakauaj tlen nopa tlanechikoli pejki nechtitlanilia amatlajkuiloli tlen nechyolchikauayaya uan nojkia pilamochtsitsij tlen nechpaleuik ma nimosentlali nijpatlas nonemilis.

 Maske tlauel miak xiuitl niitstoya ininuaya, nijnextik nelia nijnekiyaya nijpatlas nonemilis kema nimosentlalik ayokmo nimouikas ininuaya katli itstoyaj ipan nopa pandilla. Katli kiyakanayaya nopa pandilla itstoya nouaya kampa nechtsaktoyaj, yeka nimokamanaljuik iuaya uan nikiljuik nijnekiyaya nimochiuas se tlen Jehová itlajtoltemakauaj. Amo ueliyaya nijneltoka kema kiijtok: “Tlaj nelia tlen tikijtoua, xijchiua. Amo nijneki nimokalakis ipan tlamantli tlen toTeotsij. Uan intla san tijneki tijkajteuas ni pandilla, tijmajtojka tlake mitspanos”.

 Kema panok ome xiuitl, katli tlamokuitlauiyayaj ipan nopa cárcel kiitakej kenijkatsa nimoyolpatlatiauiyaya. Yeka, pejki kuali nechitaj. Ayokmo nechmailpiyayaj ika tepostli kema nechuikayayaj baño. Se tlamokuitlauijketl nechiljuik nojua ma nijpatlatia nonemilis. Teipa, nechtsakuatoj kampa ayokmo tlauel nechmokuitlauiyayaj, uan nopona nitsaktoya se xiuitl. Ipan 2004, kema nikaxitik matlaktli xiuitl nitsaktoya, nechkixtijkej uan nechuikakej México ipan se autobús tlen nopa carcel.

 Kema niasito México, nimantsi nijpantik se Kali kampa mosentiliaj Jehová itlajtoltemakauaj. Ipan nopa achtoui tlanechikoli, nimokentijtiajki nopa yoyomitl tlen nijtekiuiyaya ipan carcel pampa amo nijpixtoya seyok yoyomitl tlen kuali. Maske amo kuali ninesiyaya, Jehová itlajtoltemakauaj nechselijkej ika tlaiknelili. Kema nikitak nopa, nijmatki niitstoya ininuaya melauak Cristo itokilijkauaj (Juan 13:35). Ipan nopa tonali, ueuejtlakamej nimantsi kiiljuijkej se akajya ma nechmachti ika Biblia. Kema panotoya se xiuitl, ipan septiembre 3, xiuitl 2005, nimoatsonpoliuiltik uan nimochijki se tlen Jehová itlajtoltemakauaj.

 Ipan enero 2007, pejki nitlatekipanoua kej precursor, nopa kiijtosneki sejse metstli nitlajtolmoyaua setenta horas. Ipan 2011 tlanki nimomachtia ipan nopa Escuela Bíblica para Varones Solteros (nama kitokaxtiaj Kampa kinmachtiaj tlajtolmoyauanij). Ni tlauel nechpaleuik kuali ma nitlatekipano ipan tlanechikoli.

 Ipan 2013 nimosenkajki iuaya Pilar, katli tlauel nikiknelia. Kema nijpouilia kenijkatsa nimonejnemiltiyaya achtouia, nechixuetskilia uan nechiljuia axkineltoka tlaj na kiampa nieliyaya. Ayokmo kema nimonejnemiltijtok kej achtouia. Nosiua uan na tijmati kej nama nimonejnemiltia kinextia kenijkatsa Biblia kipia chikaualistli uan yeka ueli kichiua ma mopatla ininnemilis maseualmej (Romanos 12:2).

 Nijmati achtouia niitstoya kej Jesús kiijtok ipan Lucas 19:10. Nopaya kiijtok ualajki ‘kintemoko uan kinmakixtiko tlakamej tlen mokuapolojtoyaj’. Ayokmo nijmati nimokuapolojtok. Ayokmo nitechiuilijtinemi tlen axkuali. Pampa Biblia nechpaleuik, nama nijchiua tlamantli tlen kuali ipan nonemilis. Kuali nimouika ininuaya nochi maseualmej. Uan tlen tlauel ipati, kuali nimouampojchijtok iuaya Jehová.