Ipan julio 5, xiuitl 2013, Anthony Morris se katli kinyakana Jehová itlajtoltemakauaj tlayolmelajki se tlamantli ipan kali Betel tlen Estados Unidos, kiijtok: “Tijnamakakej nopa chikuasej uejueyij kaltinij tlen eltok ipan calle Adams número 117 uan ipan calle Sands número 90. a Katli kikojkej nopa kaltinij kiijtojkej ipan agosto tlen ni xiuitl monekiyaya ayokmo tleno ma onka ipan makuili kaltinij”.

Monekiyaya kichiuasej miak tekitl. Iuexka nochi kaltinij eli sanse iuexka kej 11 uejueyi campos kampa mauiltiaj fútbol. ¡Uan monekiyaya tlaijkuenisej ipan 60 tonali.

Ipan nopa makuili kaltinij kiajokuiyayaj tlamantli tlen ika kichijchiuaj amatlajkuiloli. Uan ipan 2004 nochi tlen nopaya kiajokuiyayaj kiuikakej Wallkill (Nueva York).

Teipa, nopa kaltinij pejkej kitekiuiaj kej talleres uan nojkia nopaya kiajokuiyayaj tlen motekiuia ipan oficinas uan tlen ika kalchiuaj. Nopaya nojkia kiajokuiyayaj tepostli tlen ika tekitij uan máquinas tlen ueliskia kitekiuisej ipan Estados Unidos o ipan sekinok altepemej.

Monekiyaya kuali moiljuisej kenijkatsa nima tlaijkueniskiaj, yeka achtoui kitlachilijkej nochi tlen eltoya ipan nopa kaltinij. Teipa kiitakej tlake ueliskiaj kinamakasej, tlen ayokmo kuali uan tlen ueliskia kiajokuisej. Uan teipa kitlachilijkej kenijkatsa nimantsi tlakijkixtiskiaj.

Katli itstokej ipan Betel tlapaleuijkej ika nochi ininyolo. Nojkia, 41 Jehová itlajtoltemakauaj katli euaj ipan nochi Estados Unidos ualajkej Betel uan tlapaleuijkej. Miakej telpokamej tlapaleuikoj matlaktli semanas. Monejki kinkauasej ininchampoyouaj uan ininuampoyouaj, uan nojkia ininteki. ¿Kenijkatsa kiyolmatkej pampa tlapaleuijkej?

Jordan, kipia 21 xiuitl uan eua Washington. Ya kiijtoua: “¡Achi nima nijtitlantoskia nopa solicitud!”.

Steven, kipia 20 xiuitl uan eua Texas. Ya kiijtoua: “Nijyolmati kejuak nikinpia nochampoyouaj katli kampa ueli euaj, katli kinpaktia tekitisej uan tlauel yolpakij”.

Justin, se telpokatl tlen kipia 23 xiuitl, kiijtoua: “Nikaj ipan Betel nimomachilia kejuak niitstoskia ipan nochaj”.

Adler, kipia 20 xiuitl uan eua Puerto Rico. Ya kiijtoua: “Maske ouij nijmati kualka nimeuas, nikaj nikinpantijtok kuali nouampoyouaj”.

William, kipia 21 xiuitl. Ya kiijtoua: “Kema nieliyaya okichpil ipa nijnektoya niualas Betel. Maske nimoiljuiyaya amo nimomatiskia, teipa nikitak amo nelia tlen nimoiljuiyaya. ¡San nikaj tlauel kuali nijyolmati!”.

Uajka, ¿kena kitlamiltijkej nopa tekitl? Kena, uan kichijkej san ipan 55 tonali.