Ipan 2015, se 175,000 maseualmej kipaxalotoj kali Betel de Centroamérica tlen Jehová itlajtoltemakauaj, tlen eltok México. Ni kiijtosneki mojmostla yauij se 670 maseualmej. Miakej motlanejkej autobuses uan sansejko yajkej. Sekij uejkajkej se keski tonali asitij. Sekinok mokualchijchijkej kema nojua poliuiyaya miak metstli.

Se keskij maseualmej katli kipaxalotoj nopa sucursal, tlen nojkia kitokaxtiaj Betel, kichijkej ueyi kampeka. Kiampa kichijkej miakej Jehová itlajtoltemakauaj katli euaj Veracruz, se altepetl tlen México. Inijuantij amo kipixtoyaj tomij tlen ika kiixtlauaskiaj nopa autobús tlen kinuikaskia Betel, tlen mokaua se 550 kilómetros (340 millas). Yeka moiljuijkej kichiuasej se tlamantli: mosentlalijkej yasej Betel. Mokualchijchijkej uan pejkej tlakualchiuaj uan kinamakakej nopa tlakualistli. Nojkia kisentilijkej botellas tlen plástico. Ipan eyi metstli kisentilijkej nopa tomij tlen ika ueliskia yasej.

¿Kuali tlen kichijkej? Inijuantij kiijtouaj kena. Lucio, se telpokatl tlen nopa tlanechikoli, kiijkuilok: “Pampa niajki Betel, nechpaleuik ma nimosentlali nijchiuas se keski tlamantli tlen ika nijtekipanos Jehová uan tlen nechpaleuis kuali ma nitlaneltoka. Nama kuali nitlapaleuia ipan notlanechikol”. Uan Elizabeth, katli kipia 18 xiuitl, kiijtok: “Ipan Betel nikitak uan nijyolmatki kenijkatsa nelia moikneliaj toTeotsij itekipanojkauaj. Nopa nechyololini nojua nijtekipanos Jehová uan nimochiuas precursora”.

Kemantika tlauel miakej maseualmej kipaxalouaj Betel. Katli kinseliaj paxalouanij mosentlaliaj kuali kinselisej. Lizzy kiijtok: “Nechyolchikaua nikinitas miakej maseualmej. Nechpaleuia nojua kuali ma nitlaneltoka kema nikinita kipatiitaj kiixmatisej Betel uan kichiuaj kampeka ualasej”.

Pampa kinekij kuali kinselisej katli onpaxaloua Betel, katli tlatekipanouaj ipan sekinok tlamantli nojkia kinnejnemiltiaj. Maske kipiaj miak tekitl, kinpaktia kinselisej katli paxalouaj. Juan kiijtoua: “Nipaki kema nikinita tlauel yolpakij uan kenijkatsa tetlaskamatiliaj. Kichiua ma niyolpaki ipan nopa tonali”.

Konemej nojkia kinpaktia kipaxalosej Betel. Noriko, katli tekiti ipan Departamento de Computación, kiijtoua: “Nikintlajtlanilia konemej tlaj kinpaktiskia tlatekipanosej Betel, nochi kiijtouaj: ‘¡Kena!’”. Konemej tlauel kinpaktia nopa Rincón de Caleb, kampa uelis moixkopinasej ika nopa uejueyi tlaixkopinkayomej tlen Caleb uan Sofía, katli nesij ipan videos Ximouampojchiua iuaya Jehová. Noriko kiijtoua: “Konemej kinpaktia”.

Miakej konemej kinextiaj kipatiitaj nopa tekitl tlen mochiua ipan Betel. Kiampa kinextia tlen kichijki Henry, se pilokichpiltsi tlen México. Ipan se alcancía kiajoktiajki tomij tlen temakaskia kema yaskia Betel. Nojkia kiijkuilok ipan se amatl: “Niinmechtlajtlania xijtekiuikaj ni tomij uan kiampa xijchiuakaj amochtli uan pilamochtsitsij. Tlaskamati miak pampa inkitekipanouaj Jehová”.

Kampa Jehová itlajtoltemakauaj kichijchiuaj amatlajkuiloli ipan nochi tlaltipaktli, nochi uelis paxalotij uan amo tlainamaj. Timitstlaneuij xipaxaloti ipan se sucursal tlen tijpiaj. Tijmatij tlauel mitspaktis. Tlaj nojua tijneki tijmatis, xikita TLEN TIJCHIUAJ > XIPAXALOTI IPAN KALI BETEL.