Ipan selva amazónica Jehová itlajtoltemakauaj kichijchijkej se yankuik kali kampa mochiua uejueyi tlanechikolistli. Ni kali kichijchijkej tlajkotipa se kuatitlamitl ipan altepetl Manaos (Brasil), uan nopa tlali iuexka 52 hectáreas. Ipan nopa kuatitlamitl itstokej yejyejtsitsij guacamayos, tucanes uan sekinok totomej tlen amo san se uikaj. Moketsaj ipan uejueyij kuatinij, kej nopa kuauitl nuez de Brasil, nopa cupuarana uan nopa angelim pedra. ¿Kenke nopaya kichijchijkej se kali kampa mochiua uejueyi tlanechikolistli?

Altepetl Manaos mokaua se 1,450 kilómetros tlen kampa onasi ueyatl Amazonas. Nopaya itstokej nechka ome millones tlen maseualmej. Ipan ni yankuik kali uelij monechikouaj 7,000 Jehová itlajtoltemakauaj tlen itstokej ipan Manaos uan katli itstokej itejteno ueyatl Amazonas. São Gabriel da Cachoeira eli nopa altepetl tlen achi uejka mokaua; iuejkaka kipano 800 kilómetros ika oeste tlen Manaos. Se keskij Jehová itlajtoltemakauaj yauij ipan akali eyi tonali uan kej nopa asij ipan nopa kali kampa mochiua uejueyi tlanechikolistli.

Monejki tlauel tekitisej uan kej nopa kichijchiuasej se kali tlajtlajko tlen nopa kuatitlamitl. Kiuikakej 13 contenedores kampa kiuikayayaj tlamantli tlen kitekiuiskiaj. Kistejkej altepetl Santos (São Paulo), panotiajkej iteno nopa ueyi atl uan asitoj ipan nopa ueyatl Amazonas, uan teipa yajkej kampa kichijchiuayayaj nopa yankuik kali.

Nama, ipan Brasil, ya onka 27 kali kampa mochiua uejueyi tlanechikolistli. Ipan domingo 4, tlen metstli mayo, 2014, kiixtonkej se tlamachtili uan kej nopa pejkej kitekiuiaj ni kali; mosentilijkej 1,956 maseualmej. Miakej tlauel yolpajkej

pampa amo kema mosentilijtoyaj ipan se kali kampa mochiua uejueyi tlanechikolistli.

Katli mosentilijkej amo san kitlakakilijkej katli tlamachtiyaya, nojkia kiitakej. ¿Kenke tlauel pankiski nopa tlamantli? Pampa achtouia ipan nopa kali kampa mosentiliyayaj amo ueliyayaj kinitaj katli tlamachtiyayaj. Se tlen Jehová itlajtoltemak kiijtok: “Miak xiuitl niualajtok ipan uejueyi tlanechikolistli uan amo kema nikitstoya nopa tlanextilili tlen mopanoltia; san nijtlakakiliyaya”. Nama nochi uelij kinitaj katli pano tlaixpa.