Ipan Nueva York (Estados Unidos) Jehová itlajtoltemakauaj kichijchiuaj se Ueyi kali Betel nechka lago de Sterling Forest (Blue Lake), kampa onka miak kuauitl. ¿Tlake kichiuaj uan kiampa kinmokuitlauisej piltlapialtsitsij o sekinok tlamantli tlen nopaya onka?

Jehová itlajtoltemakauaj tlatsajkej kampa tekitiskiaj, kiampa amo panoskiaj tlapialmej kej nopa crótalo del bosque, tlen eli kej se kouatl, nopa tortuga de caja de las Carolinas uan nopa galápago del bosque. Ni kichijkej pampa amo kinekiyayaj nopa tlapialmej nopaya ma kuatakanikaj uan ma mokokokaj. Yeka, Jehová itlajtoltemakauaj nochipa ontlachiayayaj kampa tlatsaktoyaj. Kema tlamis kichiuaj nopa kali uajka kiijkuinisej tlen ika tlatsaktokej. Uan tlaj se crótalo del bosque monechkauis kampa eltok nopa kali, kiuikasej sejkanok, ni kichiuasej katli kimatij kenijkatsa kinmokuitlauisej nopa tlapialmej.

Nojkia, nopa kuauitl kitsontejkej ipan nopa metstli kema tlaseseya, kiampa nopa tototl azulejo garganta amarilla (o venturas azulillos) ueliskia kichiuas itepasol uan amo tleno kitsakuiliskia. Kema kitlamichiuasej nopa kali, Jehová itlajtoltemakauaj kichijchiuasej pilkuakajontsitsij uan kiampa nopa tototl sampa tlakuepilis.

Nopaya tlaixuitekij uan tlalpoxoniaj san ipan metstli octubre uan tlamij ipan marzo, kiampa uelis momoyauas ixinach nopa xiuitl Scutellaria integrifolia, katli ayokmo onka miak. Kiampa mochiua nopa tekitl, maske nopa xiuitl ayokmo kipantijtokej nopaya, san kipantijkej ipan 2007.

Kampa kichiuaj nopa kali mokaua nechka tlen nopa lago de Sterling Forest, kampa itstokej miak totomej tlen kinpaktia nemisej atitla, nojkia itstokej truchas, lobinas, lucios uan percas. Pampa amo kinekij kisokiuisej nopa atl, kichiuaj nochi tlen kinamiki. Yeka, kitokasej xiuitl kalpani uan kema uetsis atl, tlaachichinas, tlachipauas uan kichiuas amo ma momana miak atl. Kiampa kimokuitlauisej nochi nopa xiuitl tlen nopaya onkayaya.

Se tlen Jehová itlajtoltemakauaj katli tekiti kampa kiitaj kenijkatsa kinmokuitlauisej tlapialmej uan xiuitl, kiijtok: “Maske moneki mochiuas miak tekitl uan kiampa tikinmokuitlauisej xiuitl uan tlapialmej ininnemilis, ipan Warwik kiampa tijchiuaj, pampa tijmatij kiampa moneki mochiuas uan tijnekij tijchiuasej”.