Jehová itlajtoltemakauaj kichijchijkej kipano 5,000 kali kampa mosentiliaj ipan Centroamérica a uan México, ipan xiuitl 1999-2015. Uan nojua poliui kichijchiuasej kipano 700 yajyankuik kali, kampa mosentilisej se millón tlen Jehová itlajtoltemakauaj katli nopaya itstokej uan sekinok katli nojkia monechikouaj.

Achtouia, ipan Centroamérica uan México ouij kimatiyayaj kichijchiuasej kali kampa mosentiliskiaj Jehová itlajtoltemakauaj. Ipan México, miakej monechikouayayaj ipan se akajya ichaj. ¿Kenke? Pampa ipan miak xiuitl, onkayaya se tlanauatili tlen amo kinkauiliyaya religiones ma kikouakaj tlali uan kiampa kichijchiuaskiaj kali kampa mosentiliskiaj. Kema ni tlanauatili mopatlak, ipan xiuitl 1990, Jehová itlajtoltemakauaj pejkej kichijchiuaj kali kampa mosentiliaj. Maske kinkauilijkej, uejkauayayaj miak metstli kichijchiuasej se kali.

Ipan xiuitl 1999 mochijki miak tekitl, pampa pejki se yankuik programa; nopa grupos de Construcción de salones del Reino. Nopa grupos de construcción pejkej kichijchiuaj kali kampa mosentiliskiaj Jehová itlajtoltemakauaj ipan altepemej kampa amo tlatominpiaj, kej México uan nopa chikomej altepemej tlen Centroamérica. Ipan xiuitl 2010, kali Betel tlen mopantia ipan México, pejki kiyakana nopa tekitl kema kichijchiuaj kali kampa mosentilisej Jehová itlajtoltemakauaj.

Kemantika, katli tlapaleuiaj kichijchiuasej kali kampa mosentilisej Jehová itlajtoltemakauaj ouij kimatij asitij kampa tekitisej pampa amo onka kuali ojtli. Kiampa kinpanok katli tlapaleuiaj ne panamá, inijuantij kistejkej ipan akali uan eyij horas yajkej ipan ueyi atl, kiampa asitoj kampa tekitiskiaj. Uan ipan Chiapas, katli kichijchiuaj kali kampa timosentiliaj monejki kisasakasej tlen kitekiuiskia ipan se avioneta.

Kemantika maseualmej katli amo eli Jehová itlajtoltemakauaj tlauel kinekij kiitasej se kali kampa timosentiliaj ipan ininaltepeko. Ipan Honduras se tlakatl katli ipan ialtepeko onkayaya se tlali, kiijtok miak maseualmej achtouia kitlajtlaniliyayaj nopa tlali pampa kinekiyaya kichijchiuasej se discoteca. Uan ya amo kinejki. Yeka, kema Jehová itlajtoltemakauaj kiiljuijkej kichijchiuasej kali kampa mosentiliskia, ya kiijtok,:“¡Se ueyi tlateochiualistli!”.

Ipan miak altepemej, maseualmej kuali kiitaj kema Jehová itlajtoltemakauaj tlauel tekitij. Ipan Guatemala se tlakatl kiijtok: “Timomajtokej tikinitasej siuamej san tlakualchiuaj. Uan kema inkichijchijkej se kali kampa inmosentiliaj, tekitikej tlakamej uan siuamej. Nikitak siuamej tlauel chikauak tekitikej, kichijchijkej tlamantli tlen tepostli, tlaalaxokej ika mezcla uan sekinok tlamantli. Tlauel kuali tekitikej”. Kemantika sekij maseualmej kinuikiliaj tlen kikuasej uan tlen kiisej katli nopaya tekitij.

Miakej maseualmej yejyektsi kiitaj kej tijchiuaj nopa kali kampa timosentiliaj. Ipan Nicaragua, se ingeniero kiiljuik nopa tekichijketl tlen ialtepeko, nopa kali kampa mosentiliaj Jehová itlajtoltemakauaj yejyektsi kichijtoyaj uan tlauel kuali kisenkajtoya. Kiijtok ipan ialtepeko amo onkayaya seyok kali tlen tlauel kuali kichijtoya.

Jehová itlajtoltemakauaj nojkia kinpaktia kipiasej se yejyektsi kali kampa kiueyichiuasej toTeotsij. Inijuantij kiitstokej kema kichijchiuaj se yankuik kali kampa mosentiliaj, katli momachtiaj Biblia tlauel kinpaktia yasej tlanechikoli. Ipan México, katli kinpaleuijkej katli kichijchiuaj kali kampa mosentilisej Jehová itlajtoltemakauaj, kiijtojkej: “Tlauel tijtlaskamatiliaj Jehová pampa uelkej tijchijchiuaj se yejyektsi kali kampa uelis tijueyichiuasej”