Jehová itlajtoltemakauaj tijchiuaj kampeka tikinkamanaljuisej ipan inintlajtol maseualmej katli itstokej ipan Irlanda uan Gran Bretaña. a Ipan nopa altepemej amo san kamanaltij tlajtoli inglés, nojkia kamanaltij gaélico escocés, galés uan irlandés.

Ipan septiembre, 2012, tijyankuilijkej jw.org ipan miak tlajtoli, nojkia ipan irlandés uan galés. Uan ipan tlajtoli gaélico escocés kitlalijkej ipan agosto, 2014. Nojkia mochijki miak amatlajkuiloli ipan nopa tlajtoli. ¿Kenijkatsa kinpaleuijtok sekinok?

Se katli tlamachtia ipan se iglesia kiselik se pilamatsi ipan tlajtoli gaélico escocés, uan kema kipojki pejki mochokilia. ¿Kenke? Pampa kiitak kuali kitlajtolkueptoyaj nopa pilamatsi, yeka kiijtok: “¿Ajkia kitlajtolkuepki? ¡Tlauel kuali kichijtokej!”.

San ipan nopa achtoui metstli, se 750 maseualmej kiitakej jw.org ipan tlajtoli gaélico escocés.

Se katli tlamachtia ipan Universidad Nacional de Irlanda, ipan altepetl Galway, kiniljuik Jehová itlajtoltemakauaj amo kipaktiyaya religión. Uan kema kimatki ueliskia kipias nopa pilamochtsi Biblia, ¿tlake tlamachtili kipia? ipan tlajtoli irlandés, tlajtlanki se. Uan kiijtok amatlajkuiloli tlen Biblia moneki eltos ipan inintlajtol maseualmej, uan kintlaskamatilik Jehová itlajtoltemakauaj pampa kichijtoyaj amatlajkuiloli ipan tlajtoli irlandés.

Se siuatl katli ya ueyi tlauel kipaktik kema Jehová itlajtoltemakauaj kimakakej se pilamochtsi ipan tlajtoli galés. Ya kiijtok: “Tlaj nechtenkauilijtoskiaj ipan inglés, uelis amo nijselijtoskia. Tlauel nechpaktia pampa eltok ipan notlajtol”.

Ipan agosto, 2014, nojua kitlalijkej ipan jw.org sekinok amatlajkuiloli ipan tlajtoli galés. Uan ipan nopa metstli katli kitlachilijkej jw.org elki ompa imiaka kej katli ipa kitlachiliaj.

Se tonali, kema Jesús uejkajki kinkamanaljuijtoya tlen toTeotsij iTlajtol omej itokilijkauaj, inijuantij kiijtojkej: “¿Axtijmachiliyayaj keja yejyektsi eliyaya ipan toyolo kema yajaya techkamauiyaya ipan ojtli uan techiljuiyaya tlen kiijtosneki itlajtoj toTeko?” (Lucas 24:32). Kema tikinpouiliaj maseualmej tlen Biblia tlamachtia ipan inintlajtol, kemantika kimachilia yejyektsi ipan ininyolo, uan nopa kichiua ma kipatlakaj ininnemilis.

Emyr, se tlakatl katli eua Gales uan mosiuajtijtok iuaya se tlen Jehová itlajtoltemakauaj, axkema kipaktijtoya nopa religión tlen isiua. Teipa kema mouampojchijki iuaya se tlen Jehová itlajtoltemakauaj katli motokaxtia Russell, kipatlak tlen moiljuiyaya. ¿Kenke? Ya kiijtok: “Nimoiljuik nimomachtis Biblia kema Russell nechmakak nopa amochtli ¿Tlake nelnelia tlamachtia Biblia?, uan nechiljuik: “Ni amochtli ijkuilijtok ika tlajtoli galés, uan nama timomachtisej sansejko”. b ¿Kenke Emyr kinejki momachtis kema kiampa kiiljuijkej? Ya kiijtok: “Tiomej tikamanaltij sanse tlajtoli, sanse kampa tieuaj uan kuali timokuamachiliaj”. Emyr tlauel kuali kiyolmatiyaya kema momachtiyayaj Biblia ika itlajtol galés pampa kuali kikuamachiliyaya.

Jehová itlajtoltemakauaj nojua kichiuaj kampeka kinmachtisej maseualmej tlen Biblia tlamachtia ipan inintlajtol, pampa kiampa nopa tlamachtili asis ipan ininyolo.