“Nijneki xia kampa tijchiuaj grabaciones ipan Nueva York; tijnekij xiuika uan timitschiuilisej se grabación. Amo aka xikiljui”.

Ipan itlamia xiuitl 1913, William Mockridge kichijki tlen kiiljuik Charles Taze Russell. a Nopa uikatl tlen motokaxtik “The Sweet By-and-By” (“El día sin igual”, kej motokaxtik ipan español uan eltoya ipan se tlen nopa achtoui amochtinij tlen ika uikayayaj Jehová itlajtoltemakauaj), mochijchijki ipan discos tlen ipan se minuto momalakochouayaya 78 imiakpa (78 revoluciones por minuto). Teipa, William kimatki nopa uikatl motekiuiskia ipan nopa “Foto-Drama de la Creación”. Ipan nopa “Foto-Drama” kinextiyayaj películas uan tlaixkopinkayomej tlen kichijchijtoyaj ipan teskatl, uan iyoka kitlaliyayaj grabaciones kampa tlamachtiyayaj uan nojkia kitlaliyayaj uikatl. Nopa “Foto-Drama” iyojyok kitlachilijkej ipan Nueva York, ipan enero, 1914.

Nopa grabación tlen William kichijki eltoya ipan kipano 50 discos tlen motekiuiyayaj ipan nopa “Foto-Drama” ipan tlajtoli inglés. Miak tlen nopa uikatl tlen kisayaya ipan nopa “Foto-Drama” kichijchijtoyaj maseualmej katli amo eliyayaj Jehová itlajtoltemakauaj. Maske kitekiuiyayaj uikatl tlen ya eltoya, kipatlayayaj tlen kiijtouayaya uan kitlaliliyayaj tlen kiijtouayaya nopa amochtli La Aurora del Milenio, se amochtli tlen ika uikayayaj.

Achtouia Jehová itlajtoltemakauaj kitekiuiyayaj nopa uikatl tlen sekinok maseualmej kiijkuilouayayaj. Kema nopa uikatl amo eliyaya sanse ika tlen Biblia tlamachtiyaya, kipatlayayaj tlen kiijtouayaya.

Se neskayotl, se uikatl tlen motekiuik ipan “Foto-Drama”, motokaxtiyaya “Our King Is Marching On!” (“¡Aquí está nuestro rey!”, kej nesiyaya ipan amochtli La Aurora del Milenio ipan español), uan kikixtijtoyaj tlen nopa uikatl “The Battle Hymn of the Republic” (El himno de batalla de la República). Ni uikatl kiijtouayaya: “Mis ojos han visto la gloria de la venida del Señor”. Yeka Jehová itlajtoltemakauaj kipatlakej, uan kitlalijkej: “Mis ojos ya contemplan la presencia del Señor”. Kipatlakej pampa inijuantij amo tlamachtiyayaj tlaj Cristo itlanauatijkayo peuaskia kema ualaskia, inijuantij tlamachtiyayaj Cristo itlanauatijkayo peuaskia kema nechka ualaskia (Mateo 24:3).

Ipan xiuitl 1966 kiski nopa amochtli “Cantando y acompañándose con música en su corazón”. Kichijchijkej ni amochtli pampa kiampa ayokmo kitekiuiskiaj uikatl tlen sekinok maseualmej kichijchijtoyaj o tlen uikayayaj ipan sekinok religiones. Ipan nopa xiuitl, Jehová itlajtoltemakauaj kichijkej se orquesta, uan kichijkej 119 tlatsotsonali. Jehová itlajtoltemakauaj kitekiuiyayaj nopa tlatsotsonali ipan tlanechikoli, uan sekinok kikakiyayaj ininkalijtik.

Ipan xiuitl 2009, Jehová itlajtoltemakauaj kichijkej seyok amochtli tlen ika uikaskiaj, motokaxtik Cantemos a Jehová. Nopa uikatl nojkia kichijchijkej ipan coro uan ipan orquesta ipan tlauel miak tlajtoli. Uan ipan xiuitl 2013 pejkej kichijchiuaj videos ika uikatl; ni videos kinpaleuiskia konemej. Se tlen nopa videos motokaxtia Nochipa nimomaijtos. Sejse metstli ipan jw.org kikixtiaj tlauel miak videos.

Miakej maseualmej kiijtouaj tlauel kinpaktia nopa uikatl. Se siuatl katli motokaxtia Julie kiijtok: “¡Nopa yajyankuik uikatl tlen nopa amochtli Cantemos a Jehová nelia tlauel yejyektsitsij! Kema noselti niitstok, nijkaki nopa uikatl katli kiijtoua tlen na nijyolmati. Nopa kichiua ma nikita kenijkatsa nojua tlauel nikiknelijtia Jehová. Uan nechyololinia ma nijtekipanojto ika nochi noyolo”.

Heather, kinpia omej ikoneuaj, se kipia chikome xiuitl uan seyok chiknaui xiuitl, kiijtok kenijkatsa nopa video Nochipa nimomaijtos tlauel kinpaleuijtok ikoneuaj. Kiijtoua: “Nopa video kinyololinijtok nokoneuaj ma momaijtokaj, amo san kema meuaj o kema itstokej touaya, kinyololinijtok nochipa ma kinojnotsakaj Jehová”.