“Tlauel yejyektsi, kichiua ximoyoliljui ipan tlen tijkaki”.

“Kichiua kuali xijkuamachili Biblia”.

“¡Tlauel nechpaktia! Maske ipa nijkaktoya nopa tlapoualistli tlen eltok ipan Biblia, nama nijmati nelia panok”.

Kiampa kiijtojkej miakej maseualmej katli kikaktokej nopa grabación tlen pilamochtsi Mateo, tlen eltok ipan jw.org ipan tlajtoli inglés.

Ipan 1978, Jehová itlajtoltemakauaj pejkej kichiuaj grabaciones tlen nopa achtoui Biblia tlen kipixtoyaj. Teipa kichijkej grabaciones, tlen nochi Biblia o san se keski pilamochtsitsij, ipan 20 tlajtoli.

Ipan xiuitl 2013 kiski nopa Traducción del Nuevo Mundo ika inglés, tlen kiyankuilijtoyaj. Yeka monejki sampa ma kichiuakaj grabaciones. Ipan nopa achtoui grabación, san eyij toikniuaj kakistiyaya inintoskak. Uan nama kintlapejpenijkej miakej toikniuaj, inijuantij kichiuaskiaj ma kakisti inintoskak kipano mil maseualmej katli nesij ipan Biblia.

Kema tijkakij miakej kamanaltijtiauij, techpaleuia ma timoiljuikaj kenijkatsa panok tlen Biblia kiijtoua. Uan maske nopa grabaciones amo eli kej nopa tlapoualistli tlen mokixtijtok ipan Biblia, pampa amo kitlalilijtokej sekinok tlamantli yon amo kipia uikatl, kichiua kuali ma timoiljuikaj kenijkatsa panotiajki tlen kiijtoua Biblia.

Achtoui monejki kuali momachtisej uan kiampa kimatisej ajkia inijuantij kamanaltij ipan sejse tlapoualistli, tlake kiijtosneki tlen ijkuilijtok uan kenijkatsa monekiyaya mopouas. Kemantika, ipan se tlapoualistli kamanalti se apóstol uan amo kimatiyayaj ajkia eli. Uajka, ¿ajkia itoska kitekiuiskiaj? Tlaj tlen kiijtoua nesi amo kuali tlaneltokayaya, uajka uelis eliyaya Tomás, uan tlaj nesi nima kiijtojtikisayaya se tlamantli, uajka eliyaya Pedro.

Nojkia monejki kiitasej keski xiuitl kipixtoyaj katli nesij ipan Biblia. Yeka omej toikniuaj kichijkej itoska apóstol Juan, se kema eliyaya telpokatl, uan seyok kema eliyaya ueuentsi.

Nojkia monejki kintlapejpenisej katli kuali tlapouaj. Kintlapejpenijkej miakej katli tlatekipanouaj ipan ueyi kali Betel ne Estados Unidos. Achtoui kintlakakilijkej kenijkatsa tlapouaj. Kiniljuijkej ma kipouakaj se párrafo tlen pilamochtsi ¡Despertad!, uan nojkia ma kipouakaj se tlapoualistli tlen Biblia kampa kipouaskiaj ika pakilistli, kuesoli, kualantli uan ika tekipacholi. Kiampa kiitakej kenijkatsa tlapouaj katli kintlapejpeniskiaj uan tlake tlapoualistli ueliskia kipouasej.

Kema ya kintlapejpenijkej, sejse kichijki nopa grabación ipan Brooklyn o Patterson. Nopa director de grabación kiitstiajki kuali ma kakisti tlen kipojtiauiyayaj. Yeka nopa director uan katli tlapouayaya, kipixtoyaj se guion kampa kiijtouayaya kenijkatsa monekiyaya kipouas. Nojkia kitlakakilijtiajkej nopa grabación tlen ipa eltoya tlen Traducción del Nuevo Mundo.

Kema kichiuayayaj nopa grabación, nojkia kichijtiauiyayaj nopa edición, kampa kichiuayayaj kuali ma kakisti nopa tlapoualistli. Kinekij kuali ma kakisti nopa tlapoualistli, yeka kemantika nopa toikni miakpa kipoua, uan teipa kisansejkotiliaj kampa kuali kichijki.

Amo tijmatij kema kitlamichiuasej nopa grabación tlen nopa Traducción del Nuevo Mundo tlen kiyankuilijkej ipan xiuitl 2013, ika inglés. Kema motlamichiuas se grabación tlen se pilamochtsi tlen Biblia, uelis tijtlakakilisej ipan jw.org. Kampa kiijtoua “Libros de la Biblia”, nesis inakastla sejse pilamochtsi nopa icono kampa kinextis ya eltok nopa grabación.