Ipan xiuitl 1987, Lyman Swingle, katli eliyaya se Katli kinyakanaj Jehová itlajtoltemakauaj, kinkamanaljuik 63,580 maseualmej katli mosentilijtoyaj ipan nopa Plaza de Toros Monumental de Valencia (Venezuela). Miakej katli nopaya itstoyaj, seyoual monejki yasej ipan autobús. Kiniljuik ayokmo eliyayaj pilkentsitsij, uan nechka eliskiaj “100,000 tlajtolmoyauanij”.

Ipan nopa xiuitl, ipan Venezuela itstoyaj kipano 38,000 tlajtolmoyauanij katli tlamachtiyayaj ika Biblia. Ipan nopa tonali, san onkayaya chikueyi altepemej kampa itstoyaj kipano 100,000 tlajtolmoyauanij.

Jehová itlajtoltemakauaj tlauel momiakilijtokej ipan nochi Tlaltipaktli. Kema tlanki nopa Achtoui Ueyi Tlauilankayotl, san itstoyaj se keskij tlajtolmoyauanij katli tlamachtiyayaj tlen toTeotsij iTlanauatijkayo. Uan nama tlauel miakej itstokej. Ipan 1943 nopa Anuario de los Testigos de Jehová, kiijtok: “Tlen panok ipan xiuitl 1942, maske amo senkistok tijmatij nochi tlen panok, nesi Jehová techteochijtok [...]; kinextia nama itstokej kipano 106,000 tlajtolmoyauanij [katli kimoyauaj nopa kuali tlamachtili] ipan nochi Tlaltipaktli”. Uan kema mochijtoya nopa Ompa Ueyi Tlauilankayotl, miakej mochijkej Jehová itlajtoltemakauaj. Ipan xiuitl 1950, san ipan Estados Unidos itstoyaj kipano 100,000 tlajtolmoyauanij.

Uan teipa, ipan 1974, ipan altepetl Nigeria nojkia itstoyaj 100,000 tlajtolmoyauanij.

Kema panok se xiuitl, ipan altepetl Brasil uan Alemania nojkia momiakilijkej kipanok 100,000 tlajtolmoyauanij. Ni kinextia momiakilijkej tlajtolmoyauanij ipan naui uejueyi altepemej (continentes). Uan nojkia tijmatij iTlajtol toTeotsij kinyoltilantok tlauel miakej maseualmej ipan nochi Tlaltipaktli.

Ipan nochi Tlaltipaktli Jehová itlajtoltemakauaj nojua momiakilijtiauij. Kiampa moaxitia nopa tlajtolpanextili tlen Isaías 60:22, tlen kiijtoua: “Tlen más pilsiltsi, nikinmiakilis uan mochiuasej se mil tlakamej. Uan nopa tlakamej tlen ayok miak mokajtokej, nikinchiuas ma kitemitikaj se tlali uan tlauel kipiasej chikaualistli. Na niinmoTeko nijchiuas ma pano nochi ya ni ipan nopa tonali tlen na nikixtlalijtok”.

Ipan Anuario 2014, tikitaj kenijkatsa ipan 24 altepemej itstokej kipano 100,000 Jehová itlajtoltemakauaj. Tlen ni altepemej, nojkia mopantia Venezuela, katli kiaxitik 100,000 tlajtolmoyauanij ipan xiuitl 2007. Ipan nochi Tlaltipaktli onka 115,416 tlanechikolmej tlen Jehová itlajtoltemakauaj uan 8,201,545 tlajtolmoyauanij.