Ipan xiuitl 2014, Katli kinyakanaj Jehová itlajtoltemakauaj kichijkej tlen moneki uan kiampa ueliskia momoyauas tlen Biblia tlamachtia ipan pilaltepetsitsij tlen tlauel uejka, ipan Europa uan Norteamérica (Hechos 1:8). Achtoui tlajtolmoyajkej ipan se keskij pilaltepetsitsij tlen Alaska (Estados Unidos), Laponia (Finlandia) uan Nunavut uan pilaltepetsitsij tlen mokauaj ika Noroeste (Canadá).

Miak xiuitl Jehová itlajtoltemakauaj ontlajtolmoyajtoyaj ipan nopa pilaltepetsitsij. Maske kiampa kichiuayayaj, mokauayayaj nopaya san se keski tonali uan san temajmakayayaj amatlajkuiloli.

Katli kinyakanaj Jehová itlajtoltemakauaj kiijtojkej tlake mochiuaskia, yeka nopa uejueyi kali Betel, katli kiitaj kenijkatsa kinamiki tlajtolmoyauasej ipan nopa pilaltepetsitsij, kintlaneuij precursores ma tlajtolmoyauatij eyi metstli ipan se pilaltepetsi tlen nopaya eltok. Tlaj se keskij maseualmej kinekiskiaj momachtisej tlen Biblia, nopa tlajtolmoyauanij ueliskia nojua mokauasej uan ueliskia kichiuasej tlanechikoli.

Katli itstokej ipan ni pilaltepetsitsij kiixnamikij miak tlaouijkayotl. Ome precursores kintitlankej altepetl Barrow (Alaska). Se ualayaya California ika sur, uan se ualayaya Georgia (Estados Unidos): ni omej euayayaj kampa tlauel tlatotonia. Kema achtoui tlaseseski ipan Barrow, nelia tlauel tlaseseski, kixikojkej 38° C bajo cero (-36°F). Uan maske ouij pampa tlauel tlaseseyayaya, san kentsi poliuiyaya kinpaxalosej nochi maseualmej tlen nopaya itstoyaj, uan nauij maseualmej pejtoyaj kinmachtiaj ika Biblia. Se tlen nopa maseuali eliyaya se telpokatl katli motokaxtiyaya John. Ya uan nopa ichpokatl katli kiixtoka momachtiyayaj ika nopa amochtli ¿Tlake nelnelia tlamachtia Biblia?, uan John ya pejtok kinpouilia iuampoyouaj uan katli ininuaya tekiti. Nojkia ipan JW Library kipoua nopa amochtli Examinando las Escrituras diariamente ika iteléfono.

Pampa amo onka carreteras tlen asi ipan Rankin Inlet, ipan altepetl Nunavut (Canadá), omej precursores yajkej ipan avión uan asitoj kampa itstokej nopa maseualmej, katli kiniljuiaj esquimales uan pejkej kinmachtiaj se keskij maseualmej. Kema kiitakej nopa video ¿Tlake tijchiuaj ipan kali kampa timosentiliaj?, se tlakatl tlajtlanki kema mochiuas se kali kampa mosentiliskiaj Jehová itlajtoltemakauaj. Uan kiijtok: “Nias tlanechikoli tlaj nojua niitstos kema inkichiuasej nopa kali”.

Omej precursores, katli kintitlantokej ma tlajtolmoyauatij ipan pipilaltepetsi savukoski (Finlandia), kampa itstokej miakej tlapialmej renos uan san se keskij maseualmej, kiijtojkej: “Tlauel tlaseseya uan onka miak nieve”. Nopa precursores kiijtojkej tlauel kuali pampa asitoj nopa metstli. ¿Kenke? “Ueltok kuali titlajtolmoyauaj pampa kiijkuiniaj nopa nieve tlen onka ipan carretera, kiampa kuali tiauij uejka titlajtolmoyauatij”. Pampa tlauel tlaseseya maseualmej itstokej ininchaj.

Se keskij maseualmej kiitstokej tijchiuaj ueyi kampeka tikinmachtisej katli tlauel uejka itstokej tlen Biblia tlamachtia. Kema omej precursores kipaxalotoj se siuatl katli tlanauatia ipan se ueyi altepetl tlen Alaska, kiijtok se kuali tlamantli ipan Internet pampa kipaktik kema monojnotski ininuaya Jehová itlajtoltemakauaj uan kitlalik se tlaixkopinkayotl tlen nopa pilamatsi ¿Tlake nopa toTeotsij iTlanauatijkayo?

Ipan altepetl Haines (Alaska), omej precursores kichijkej se tlanechikoli ipan se biblioteca, uan mosentilijkej chikueyij maseualmej. Se periódico kiijtok, omej tlakamej tlen Texas uan Carolina del Norte kintenkauiliaj maseualmej se tlamachtili ipan ininchaj. Uan teipa kiijtok: “Tlaj nojua inkinekij inkimatisej sekinok tlamachtili xikitakaj jw.org”.