Miakej maseualmej katli yajkej ipan nopa Feria Internacional de Ruán 2014 (se altepetl tlen mokaua Francia, ika norte) kiitakej se yejyektsi exhibición kampa kinextijkej miak tlamantli tlen Biblia, kitokaxtijkej: “La Biblia: pasado, presente y futuro”.

Kampa kichijkej nopa tlamantli, nojkia kinextijkej ipan pantallas se video kampa nesiyaya nopa amatlajkuiloli tlen uejkajkia kiijkuilojkej uan nama kitekiuiaj kema kiixkopinaj Biblia. Katli monechkauijkej uan kiitakej nopa video, nojkia kiitakej kenijkatsa Biblia nelia techpaleuia kema tijchiuaj tlen techtlajtolmaka, amo mokuapoloua kema kiijtoua tlake panok uejkajkia, kiijtoua sanse tlamantli ika tlen científicos kiijtouaj uan tlauel kimoyajtokej.

Nojkia kinextijkej kenke nojua tijpiaj Biblia ipan ni tonali uan kenijkatsa tlauel miakej maseualmej uelis kipiasej se tlen kichijchijtokej ika amatl o kipouasej ipan celulares o tabletas. Katli tlachiatoj, kinmakakej se Biblia Traducción del Nuevo Mundo, tlen kichijchijtokej Jehová itlajtoltemakauaj ipan kipano 120 tlajtoli.

Katli yajkej tlachiatoj kintlaskamatilijkej Jehová itlajtoltemakauaj pampa kichijkej se ueyi kampeka kinmakasej Biblias maseualmej. Se siuatl katli kintlajtolmaka telpokamej nojkia yajki nopaya ininuaya se keskij telpokamej uan kiijtok: “Biblia nochi toaxka. Ni amochtli kejuak yoltok. Kema nijpoua, nochipa nijpantia kenijkatsa nijsenkauas tlen nechkuesoua”.

Se siuatl katli kipixtoya 60 xiuitl, tlauel yolpajki pampa kimakakej se Biblia uan amo kiinankej, kiijtok: “Tlauel kuali tlaj nochi tijpouaskiaj; nelia tlauel moneki”.