Miakej maseualmej moiljuiaj nopa indígenas katli euaj ipan Estados Unidos itstokej san ipan se keski tlali tlen kinmakatokej, uejka tlen se altepetl. Maske kiampa moiljuiaj, kipano 70% itstokej ipan altepemej. Ipan Nueva York, se altepetl tlen tlauel ueyi tlen Estados Unidos, nopa indígenas americanos kichijkej se powwow, katli kitokaxtijkej “Gateway to nations” (Puerta a las Naciones). a Mosentilijkej ipan tonali 5 uan tlanki ipan tonali 7, junio 2015. Kema Jehová itlajtoltemakauaj tlen Nueva York kimatkej, nimantsi kiitakej tlake ueliskiaj kichiuasej uan kiampa nojkia yasej. ¿Kenke nojkia kinejkej yasej?

Jehová itlajtoltemakauaj amo san kitlajtolkuepaj amatlajkuiloli ipan miak tlajtoli tlen miakej kiixmatij, nojkia kitlajtolkuepaj ipan tlajtoli katli amo miakej kitekiuiaj, kej tlajtoli cree de las llanuras, dakota, hopí, mohaqués, navajo, odawa uan piesnegros. Yeka Jehová itlajtoltemakauaj kitlalijkej yejyektsitsij mostradores ika se keski amatlajkuiloli, kej pilamatsi Usted puede confiar en el Creador.

Kampa titlamachtiaj ipan Internet onka miak grabaciones ipan nopa tlajtoli tlen tikijtokej. Jehová itlajtoltemakauaj kitlaliyayaj nopa grabaciones kema se keskij maseualmej monechkauiyayaj, pampa amo nochi kiitayayaj eltoya ipan miak tlajtoli. Miakej san kiitayayaj nopa exhibidores, letreros uan sekinok tlanextilili eltoya san ipan tlajtoli inglés uan español.

Miakej maseualmej tlauel kinpaktik nopa tekitl tlen tijchiuaj pampa tijtlajtolkuepaj amatlajkuiloli ipan miak tlajtoli uan pampa titlamachtiaj ika Biblia ipan altepemej uan kampa itstokej indígenas. Kema se tlakatl tlen nopaya tekiti kimatki tlen tijchiuaj, kinejki momachtis Biblia, uan kiijtok: “Tlauel nechpaktiskia ma nechpaxalokaj uan nijyekos tlen Biblia tlamachtia”.

Se tlakatl iuaya isiua katli amo tlakakij monechkauijkej kampa kitlalijtoyaj amatlajkuiloli. Jehová itlajtoltemakauaj katli nopaya itstoyaj amo uelkej kinnojnotskej. Kema itstoyaj nopaya, asiko se tlen Jehová itlajtoltemakauaj katli kiyekouayaya tlajtoli señas. Kinnojnotski se 30 minutos uan kinpaleuik ma kipantikaj kanke mochiuas se ueyi tlanechikolistli tlen Jehová itlajtoltemakauaj ipan tlajtoli señas nechka kampa inijuantij itstokej.

Ipan nopa eyi tonali tlen uejkajki nopa iljuitl, tlapaleuijkej kipano cincuenta Jehová itlajtoltemakauaj. Kinmakakej kipano ciento cincuenta amatlajkuiloli nochi katli monechkauijkej.