Ipan Alemania itstokej tlauel miakej maseualmej tlen kintokaxtiaj sinti uan romaníes. a Amo uejkajtok, Jehová itlajtoltemakauaj pejkej kitlajtolkuepaj pilamatsitsij, pilamochtsitsij uan videos ipan tlajtoli romaní. b

Ipan metstli septiembre uan octubre, xiuitl 2016, Jehová itlajtoltemakauaj kichijkej kampeka kinmakasej amatlajkuiloli ipan tlajtoli romaní, maseualmej sinti uan romaníes tlen itstokej ipan Berlín, Bremerhaven, Friburgo, Hamburgo uan Heidelberg. Nojkia ipan nopa kali kampa mosentiliaj kipanoltijkej tlamachtili ipan tlajtoli romaní.

Miakej romaníes uan sinti tlauel kinpaktik tlen kichijkej Jehová itlajtoltemakauaj. Andre uan isiua Esther, katli tlapaleuijkej ipan ni tlajtolmoyaualistli, kiijtojkej: “Maseualmej kuali kiyolmatkej pampa tijchijkej kampeka tikinmachtisej ika Biblia”. Miakej tlauel yolpajkej kema kipojkej uan kikajkej tlen Biblia tlamachtia ipan inintlajtol. Se siuatl kitlachilik nopa video ¿Kenke moneki timomachtis Biblia?, uan kiijtok: “¡Ni notlajtol! ¡Ni notlajtol!”.

Matthias, katli tlapaleuik ipan ni tlajtolmoyaualistli ipan Hamburgo, kiijtok: “Nosiua, na uan chikuasej toikniuaj tiajkej titlajtolmoyauaj kampa itstokej 400 sinti uan romaníes. Nochi maseualmej katli tikinkamanaljuijkej techtlajtlanijkej amatlajkuiloli”. Bettina, katli nojkia tlajtolmoyajki ipan Hamburgo, kiijtok: “Sekij mochokilijkej pampa tikinnextilijkej amatlajkuiloli ipan romaní”. Miakej nimantsi pejkej kipouaj, uan sekij tlajtlankej amatlajkuiloli pampa kinekiyayaj kinmakasej ininuampoyouaj.

Miakej sinti uan romaníes yajkej tlanechikoli. Miakej tlen nopa 94 maseualmej katli mosentilijkej amo kema yajtoyaj ipan Kali kampa mosentiliaj Jehová itlajtoltemakauaj. Ipan nopa tlanechikoli tlen mochijki ipan Reilingen, katli mokaua nechka Heidelberg, mosentilijkej 123 maseualmej. Kema tlanki nopa tlanechikoli makuiltij maseualmej katli kamanaltij romaní kinejkej ma kinmachtikaj ika Biblia.

Jehová itlajtoltemakauaj kimoyajkej nechka 3,000 pilamatsitsij uan pilamochtsitsij. Kinkamanaljuijkej 360 sinti uan romaníes, uan pejkej kinmachtiaj ika Biblia 19 maseualmej. Miakej kiijtojkej: “Tlauel tiyolpakij pampa tijmatkej toTeotsij kitekipachoua tlen techpano”.