Ipan altepetl Botsuana onka se mina kampa kikixtiaj diamantes tlen tlauel pajpatiyo tlen amo kana uelis kipantisej ipan nochi Tlaltipaktli. Uan kema mochijki nopa Feria del Consumidor de Botsuana ipan agosto, tonali 22-28, xiuitl 2016, Jehová itlajtoltemakauaj tlen nopaya euaj nojkia kitlalijkej se tlamantli tlen tlauel ipati. Ipan carritos kitlalijkej amatlajkuiloli tlen mokixtijtok ipan Biblia, kinnextilijkej maseualmej kampa tlamachtiaj ipan internet jw.org, uan kinnextilijkej videos tlen kinpaleuia maseualmej kuali ma itstokaj ininuaya ininchampoyouaj.

Tetajmej uan konemej katli tlachiatoj, kinpaktik nopa videos Ximouampojchiua iuaya Jehová, tlen kinextia kenijkatsa tijchiuasej tlen Biblia tlamachtia. Amo onka miak videos ipan tlajtoli setsuana, nopa tlajtoli katli miakej kamanaltij ipan nopa altepetl, yeka miakej maseualmej kiijtojkej kinekiyaya nopa videos.

Nopa paxolouanij katli kampa ueli euayayaj kiuikakej se 10,000 amatlajkuiloli, uan 120 maseualmej kiijtojkej kinekiyayaj momachtisej Biblia. Miakej tlauel kuali kiitakej kenijkatsa Jehová itlajtoltemakauaj katli kamanaltij inglés tekitiyayaj sansejko ininuaya katli kamanaltij setsuana.

Katli kichijkej nopa feria kiijtoskiaj ajkia inijuantij kitlalijkej tlamantli tlen tlauel kuali uan yejyektsitsij. Uan kema nopa feria tlanki, kinmakakej Jehová itlajtoltemakauaj nopa premio tlen tlauel ipati.