Ipan xiuitl tlen panotiualajtok, asitokej Europa miakej maseualmej katli euaj África, Oriente Medio uan sur tlen Asia, pampa kinekij momanauisej nopaya. Yeka agencias estatales uan katli tlapaleuiaj, kichiuaj kampeka kinmakasej tlen kikuasej, tlen ika moyoyontisej uan kinpajtiaj.

Nopa maseualmej nojkia moneki ma kinpaleuikaj ika sekinok tlamantli. Miakej tlen inijuantij kinpanotok miak tlamantli tlen tlauel amo kuali, yeka moneki nojkia ma kinyolchikauakaj uan ma kiniljuikaj tlen panos teipa. Yeka Jehová itlajtoltemakauaj tlen Europa central kichiuaj kampeka kinpaleuisej; kintlakakiliaj uan kinyolchikauaj ika toTeotsij iTlajtol.

Ipan agosto 2015, Jehová itlajtoltemakauaj katli itstokej ipan kipano 300 tlanechikoli ne Alemania uan Austria, pejkej kichiuaj kampeka kinyolchikauasej nopa maseualmej katli asitokej nopaya. Toikniuaj kiijtouaj nopa maseualmej kinpaktia kimatisej kenijkatsa Biblia kinankilia ni tlajtlanili:

• ¿Kenke tlauel titlaijiyouiaj?

• ¿Tlake kinpano katli mikij?

• ¿Tlake kuali tlamachtili kipia Biblia?

• ¿Tlake itoka toTeotsij?

• ¿Ajkia inijuantij Jehová itlajtoltemakauaj?

Ipan metstli agosto-octubre 2015, Jehová itlajtoltemakauaj tlen nopa altepemej tlajtlankej ipan ueyi kali Betel tlen eltok Europa central kipano naui toneladas amatlajkuiloli. Uan kema kinmajmakakej maseualmej, amo kintlajtlanijkej tomij.

Miakej tlen nopa maseualmej kamanaltij san inintlajtol. Yeka Jehová itlajtoltemakauaj kitekiuiaj jw.org, pampa nopaya onka amatlajkuiloli uan videos ipan miak tlajtoli. Matthias uan Petra, katli tlapaleuiaj ne Erfurt (Alemania), kiijtouaj: “Kemantika timonojnotsaj ininuaya ika toma, ika toixayak uan ika tlaixkopinkayomej”. Nojkia kitekiuiaj nopa aplicación JW Language, katli kinpaleuia kiyekosej sekinok tlajtoli, kiampa uelij kinmachtiaj tlen Biblia ika inintlajtol. Sekinok ika nopa aplicación JW Library multilingüe kinpouiliaj textos tlen Biblia uan kinnextiliaj videos.

Omej toikniuaj katli euaj Schweinfurt (Alemania), kiijtouaj: “Miakej technechkauikoj. Tikinmakakej maseualmej se 360 amatlajkuiloli ipan ome hora uan tlajko. Sekij moixuitsonkej pampa techtlaskamatilijkej”. Wolfgang, se katli tlapaleuia ne Diez (Alemania), kiijtok: “Nopa maseualmej yolpakij pampa sekinok kintekipachoua tlen kinpano. Kemantika tlajtlanij amatlajkuiloli ipan makuili o chikuasej tlajtoli”.

Miakej tlen inijuantij nima peuaj kipoua amatlajkuiloli tlen Jehová itlajtoltemakauaj kinmakaj, uan sekinok mokuepaj uan kintlaskamatiliaj. Ilonca se tlen Jehová itlajtoltemakauaj katli eua Berlín (Alemania), kiijtoua: “Se tonali, omej telpokamej kiuikakej se keski amatlajkuiloli. Kema panok tlajko hora sampa tlakuepilijkej uan techmakakoj pantsi, uan kiijtojkej mokuesouayayaj pampa amo kipixtoyaj miak tlamantli tlen ika techtlaskamatilisej”.

Tlapaleuianij, tekichiuanij uan maseualmej katli nechka itstokej kipatiitaj tlen kichiuaj Jehová itlajtoltemakauaj. Se tlapaleuijketl katli kinmokuitlauiaj se 300 maseualmej kiijtok: “¡Tlaskamati miak pampa inkinpaleuiaj katli euaj ipan sekinok altepemej!”. Seyok tlapaleuijketl katli itstok kampa itstokej nopa maseualmej, kiniljuik Jehová itlajtoltemakauaj kuali tlen kichiuaj pampa kinmakaj tlen kipouasej ipan inintlajtol, “pampa inijuantij amo kipiaj seyok tlamantli tlen kichiuasej, san tlakuaj expa se tonal”.

Marion uan iueue, Stefan, katli euaj Austria, kamanaltikej ika omej policías katli tlamokuitlauiyayaj, uan kinixtomilijkej kenke kinpaleuiyayaj nopa maseualmej. Inijuantij kintlaskamatilijkej uan kintlajtlanijkej ome amochtli. Marion kiijtoua: “Nopa policías miakpa techtlaskamatiliaj pampa tijchiuaj ni kuali tekitl”.

Se siuatl katli eua Austria uan temaka miak tlamantli kampa itstokej maseualmej tlen euaj sekinok altepemej, kiitak Jehová itlajtoltemakauaj nochipa yauij kinpaleuiaj, maske kuali tonali o amo. Se tonali kiniljuik: “Maske ni maseualmej moneki ma tikinmakakaj tlen ika mopanoltisej, nojkia moneki kimatisej tlen panos teipa. Uan ya nopa inkichiuaj inmojuantij”.